لاہور۔27اپریل (اے پی پی):یک شمبے ءِ روچ ءَ درملکی سرمایہ کاری کمپنی آنی ڈل ءَ وفاقی تہی کارانی وزیر محسن نقوی ءَ گوں گند ءُ نند کت، ایشی ءِ ساھت ءَ سرمایہ کار آنی رکھینگ ءُ سرمایہ کاری ءِ رکھینگ ءِ واستہ کتگیں گامگیج آنی سر ءَ تران کت۔ وزیر داخلہ ءَ ڈل ءَ را ھمک رنگ ءِ کمک ءِ دل یکیمی دات۔ گند ءُ نند ءِ ساھت ءَ وفاقی تہی کارانی وزیر محسن نقوی ءَ گوشت کہ پاکستان ءَ سرمایہ کاری کنوکیں سرمایہ کار آنی رکھینگ حکومت ءِ اولی ترجی انت۔ آئی ءَ گوشت کہ پاکستان ءَ سرمایہ کاری ءِ واستہ چاگرد ایمن ءُ جوان اِنت، وھدیکہ سرمایہ کار پاکستان ءِ کجام ھم شوبگ ءَ بید ءَ سرمایہ کاری کت کن اَنت، ءُ سرمایہ کار آنی رکھینگ ءِ ذمہ واری ھمک رنگ ءَ پیلو کنگ بیت۔ وزیر داخلہ ءَ گوشت کہ حکومت ءَ ملک ءَ ملکی ءُ درملکی سرمایہ کاری ءَ را دیمروئی دیگ ءِ واستہ ھمک رنگ ءِ گامگیج چست کتگ۔ آئی ءَ گوشت کہ حکومت ءَ لھتیں بدکار آنی اُرش آنی سر ءَ سکیں نوٹس زرتگ کہ آھاں ملک ءَ ناشرکاری ءِ وئیل کتگ ءُ ملزم آنی سر ءَ کانود ءِ رد ءَ کارروائی کنگ بوھگ ءَ اِنت وھدیکہ آیوکیں وھد ءَ اے وڑیں وئیل آنی گر ءُ دار ءِ واستہ حکمت عملی جوڑ کنگ بوتگ۔ محسن نقوی ءَ گیش کرتگ کہ مئے دین اسلام امن ءُ ایمنی ءِ درس ءَ دنت۔ ڈل ءَ جیڈھ آنی گیواری ءِ واستہ وزیر داخلہ محسن نقوی ءِ منت گپت۔
