اسلام آباد۔26اپریل (اے پی پی):وفاقی وزیر ءِ اھوالکاری ءُ شنگکاری عطا اللہ تارڑ ءَ گوشت کہ پاکستان ءَ کریپٹو ءُ ڈیجیٹل فنانس ءِ شوبگ ءَ سرمایہ کاری ءُ دیمروئی ءِ نوکیں دور ءِ بندات بوھگ ءَ انت۔ ورنا آنی زرباری صلاحیت، نوکیں معیشت ءُُ جھان ءِ مالیاتی ادارگ آنی تہ ءَ گیش بوھوکیں اعتماد ءِ رد ءَ پاکستان کریپٹو انڈسٹری ءِ تہ ءَ تیزی ءَ گوں نامداریں جاہ ءِ گرگ ءَ اِنت۔ پاکستانی ورنا آنی تہ ءَ بے دروریں توانائی است انت کہ ایشی ءَ را نوکیں روزگار ءِ موہ آنی پیداک کنگ ءِ واستہ کارمرد کنگ بوت کنت۔ حوالہ جات ءِ ڈیجیٹل کنگ ءِ راہ ءُ در شوہازگ بوھگ ءَ انت تانکہ حکومت ءُ الس دوئیں دیم پہ دیم ءَ نپ چست بہ کن انت۔ آئی ءَ اے گپ شمبے ءِ روچ ءَ وزارت ءِ ھزانگ ءَ پاکستان کرپٹو کونسل ءُُ ورلڈ لبرٹی فنانشل ءِ نیام ءَ معاہدہ ءِ دستخط کنگ ءِ مراگش ءَ پد تران کنان ءَ کت۔ اے موہ ءِ سر ءَ پاکستان کریپٹو کونسل ءِ سی ای او بلال بن ثاقب ءُ ورلڈ لبرٹی فنانشل ءِ شریک چیئرمین زاک وٹکوف ءُ چیس ہیرو ھم ھوار بوتگ اَنت۔ وفاقی وزیر ءِ اھوالکاری ءَ کرپٹو ءِ ھوالگ ءَ پاکستان ءَ استیں موہ آنی بابت ءَ گپ جنان ءَ گوشت کہ کرپٹو کونسل ءِ جوڑیشت ءَ پاکستان ءَ نوکیں نوکیں دیمروئی ءِ سبب جوڑ بوتگ۔ کریپٹو شعبہ ءِ تہا ریگولیٹری فریم ورک ءِ سرا تیزی ءَ گوں کار بوھگ ءَ انت۔ ورلڈ لبرٹی فنانشل ءِ شریک چیئرمین زاک وٹکوف ءُُ آئی ءِ ڈل ءَ را پاکستان ءَ وش اتک کنان ءَ آئی ءَ گوشت کہ ورلڈ لبرٹی فنانشل یک مزنیں پلیٹ فارم ءِ انت کہ آ ڈی سنٹرلائزڈ فنانس پروٹوکول ءِ چیر دستی ءَ ریگولیشن ءُُ اسٹیبل کوائنز ءِ شوبگ آنی تہ ءَ مزنیں کار کنگ ءَ انت۔ آئی ءَ گوشت کہ اے منوگری ءَ چہ پاکستان ءَ کریپٹو ریگولیٹری فریم ورک ءَ را مھکم کنگ ءُُ کارآمد کنگ ءَ کمک رسیت ءُُ ورنا اے ھاسیں شوبگ ءَ سرجمی ءَ بھر زوری ءِ توان ءَ رسیت۔ وفاقی وزیر ءَ گوشت کہ پاکستان ءِ آبادی ءِ تہ ءَ شست درسد 30سال ءَ چہ کم عمر ءِ ورنا ھوار اَنت، پاکستانی ورنا آنی تہ ءَ بے دروریں توانائی است اِنت، ایشی ءَ را ملک ءَ نوکیں روزگار ءِ موہ پیداک کنگ ءِ واستہ فعال کنگ بوت کنت۔ وفاقی وزیر ءَ گوشت کہ پاکستان ءَ ھمک سال ارباں ڈالر ءِ زرّ دیم کیت ایشی ءَ چہ ڈیجیٹل کنگ ءِ راہ ءُُ در شوھازگ بوھگ ءَ انت تانکہ حکومت ءُُ الس دوئیں براہ راست سیت بہ زور اَنت۔ آئی ءَ گوشت کہ پاکستان ءَ سک کمیں وھد ءِ تہ ءَ کرپٹو ءِ شوبگ ءَ مزنیں دیمروئی کتگ ءُُ مرچی ءِ کمک ءَ چہ پاکستان ءَ کرپٹو ءِ موہ آناں گیش وسعت رسیت۔ عطا اللہ تارڑ ءَ ورلڈ لبرٹی فنانشل ءِ ڈل ءَ را پاکستان ءَ وش اتک کنان ءَ گوشت کہ پاکستان یک جوانیں ملکے کہ ایشی ءِ تہ ءَ کاروبار ءُُ سرمایہ کاری ءِ واستہ بے دروریں موہ است انت۔ اے موہ ءِ سر ءَ پاکستان کریپٹو کونسل ءِ سی ای او ءُُ وزیر ءِ ھزانگ ءِ مشیر بلال بن صاقب ءَ ورلڈ لبرٹی فنانشل ءِ ڈل ءَ را پاکستان ءَ وش اتک کت۔ آئی ءَ گوشت کہ میاں اوستمانی ادارگ آنی گوما کمک ءِ وسیلگ ءَ ما پاکستان ءَ را گلوبل ڈیجیٹل اکانومی ءِ یک ھاسیں بھرے جوڑ کنگ ءِ واستہ کار کنگ ءَ آں۔ ورلڈ لبرٹی فنانشل ءِ گوما اے کمک پاکستان ءَ نوکیں مالیاتی ٹیکنالوجی آنی سر ءَ عمل درآمد ءِ تہ ءَ مزنیں کردے پیلو کنت۔ اے موہ ءِ سر ءَ ورلڈ لبرٹی فنانشل ءِ شریک چیئرمین زاک وِٹکوف ءَ تران کنان ءَ گوشت کہ پاکستان یک ترندی ءَ گوں دیمروئی کنوکیں معیشت اِنت۔ ادا ءِ ورناہ باصلاحیت انت ءُُ ٹیکنالوجی ءَ را زوت زوت ءَ وتیگ کنگ ءِ یک مھکمیں توانائی یے است انت۔ آئی ءَ گوشت کہ پاکستان ءَ ڈیجیٹل فنانس ءِ شوبگ ءَ سرمایہ کاری ءِ جوانیں موہ است انت آئی ءِ واھشت انت کہ پاکستان گلوبل ڈیجیٹل معیشت ءِ تہ ءَ ھاسیں کرد پیلو بہ کنت۔ آئی ءَ امیت سہرا کت کہ ورلڈ لبرٹی فنانشل ءُ پاکستان کرپٹو کونسل ءِ نیام ءَ اے کمک ءَ چہ آیوکیں وھد ءَ جوانیں آسراتی پیداک بیت ءُ دوئیں ملک آنی نیام ءَ سیادی ءَ را گیش مھکم کنگ بیت۔ اے معاہدہ ءِ سرا ورلڈ لبرٹی فنانشل ءِ چیس ہیرو ءُ پاکستان کریپٹو کونسل ءِ سی ای او بلال بن ثاقب ءَ اے مراگش ءِ تہا دستخط کتگ۔
