اسلام آباد۔26اپریل (اے پی پی):نائب مزن وزیر /درئی کارانی وزیر سینیٹر محمد اسحاق ڈار ءَ بھارت ءِ بے بنیں الزام آناں سک رد کتگ ءُ دمگی امن ءُ ایمنی ءِ دیمروئی ءِ وھد ءَ وتی راجی مفاد آنی رکھینگ ءِ پاکستان ءِ عزم ءِ پدا زور داتگ۔ دری کارانی کارگس ءِ جارچین ءِ نیمگ ءَ جاڑی بوتگیں بیان ءِ رد ءَ شمبے ءِ روچ ءَ عرب جمہوریہ مصر ءِ دری کارانی وزیر ڈاکٹر بدر عبدالعتی ءَ گوں ٹیلی فون ءِ سر ءَ گپ ءُ تران ءِ ساھت ءَ نائب مزن وزیر … دری کارانی وزیر سینیٹر محمد اسحاق ڈار ءَ اے ھیالانی درشانی کت۔ درئی کارانی کارگس ءِ رد ءَ انوگیں دمگی دیمروئی آنی سر ءَ گپ ءُ تران کنان ءَ اسحاق ڈار ءَ بھارت ءِ بے بنیں الزام آناں سک رد کتگ ءُ پاکستان ءِ ھلاپ ءَ بھارت ءِ یک نیمگی کارروائی ءُ دروگیں پروپیگنڈا ءِ مذمت کتگ۔ آئی ءَ دمگی امن ءُ ایمنی ءِ دیمروئی کنگ ءِ وھد ءَ وتی راجی نپ آنی رکھینگ ءِ واستہ پاکستان ءِ جزم ءِ سر ءَ زور پر دات۔ دوئیں راہشون آں پاکستان ءُ مصر ءِ نیام ءَ دو نیمگی کمک ءَ را گیش کنگ ءِ واستہ جتا جتائیں راہ آنی سر ءَ ھم ھیال ریچی کت ۔
