اسلام آباد۔26اپریل (اے پی پی):توانائی ءِ وفاقی وزیر سردار اویس احمد خان لغاری ءَ گشتگ کہ ورلڈ اکنامک فورم ءَ اے گپ من اِتگ کہ ہر چاگرد ءِ تہا مزنیں چیلنج ردیں ھال ءُ اھوال اِنت، وتی سرجمیں زند ءَ را نودربر ءِ بستار ءَ گوازینگ ءِ وعدہ کتگ۔ اے ھیالانی درشانی آئی ءَ شمبے ءِ روچ ءَ جامعہ غازی ءِ دومی کانووکیشن ءَ گوں تران کنان ءَ کت۔ وفاقی وزیر ءَ گوشت کہ جامعہ غازی ءِ کانووکیشن ءَ ھاسیں مہمان ءِ بستار ءَ بھر زوری کنگ منی واستہ شرپ ءِ گپ اِنت، وانگ ءُ زانگ ءِ اے نقطہ ءَ سر بوھگ ءِ واستہ مزنیں مشکلات ءِ دیمپانی کنگی اِنت۔ اویس احمد خان لغاری ءَ گوشت کہ ورلڈ اکنامک فورم ءَ اے گپ من اِتگ کہ ھر چاگرد ءِ تہ ءَ مستریں چیلنج ردیں ھال ءُ اھوال اِنت، ردیں ھال سرجمیں دگنیا ءَ مزنیں جیڈھ اِنت، مسلمان بوھگ ءَ چہ سرجمیں پائدگ چست بہ کن اِت، مسلمان آنی گور ءَ قرآن ءِ دروشم ءَ زند گوازینگ ءِ سرجمیں فارمولہ ھست، زند ءِ ھرچ جیڈھ ءِ گیواری قرآن ءِ تہ ءَ اِنت۔ آئی ءَ گوشت کہ وتی سرجمیں زند ءَ را نودربر ءِ بستار ءَ گوازینگ ءِ جزم بہ کن اِت، ناکامی ءَ چہ مہ ترس اِت، ھر سال ءِ واستہ ھاسیں مول ءُ مراد ءِ ٹھینگ بہ کن اِت، سوشل میڈیا ءَ چہ در بہ کپ اِت ءُ سنگینیں راجدپتر ءَ بہ وان اِت۔ وفاقی وزیر ءَ گوشت کہ ما مریم نواز شریف ءِ شگر ءُ منت وار آں آئی ءَ ہائیر ایجوکیشن ءِ تہ ءَ 50 ہزار اسکالرشپ داتگ، نودربر آنی واستہ ٹرانسپورٹ ءُ لیپ ٹاپ داتگ۔
