کوئٹہ۔ 24 اپریل (اے پی پی) وزیراعلیٰ بلوچستان نا سلاہکار گوازی و امور نوجوانان مینا مجید بلوچ تون لسبیلہ یونیورسٹی آف ایگریکلچر ، واٹر اینڈ میرین سائنسز اوتھل نا ڈپٹی ڈائریکٹر اسپورٹس جنید خان، سعید احمد و اسسٹنٹ ڈائریکٹر پلاننگ اینڈ ڈویلپمنٹ زوہیب امان ئسک اوڑدہی کریر۔ اوڑدہی ٹی یونیورسٹی ٹی برجا خوانوک آ مار و مسن تا غیرنصابی سرجز، خاص کر گوازی تا مون آ دننگ نا بابت سرجم آتے پیش کننگا۔ ڈپٹی ڈائریکٹر اسپورٹس صوبائی سلاہکار گوازی ءِ معلومدار کرے کہ لسبیلہ یونیورسٹی ٹی چندی گوازی تا سرجزباقاعدگی اٹ اڈتننگک ہرافتے ٹی فٹبال، والی بال، کرکٹ، ایتھلیٹکس ، و انڈور گیمک اوار ءُ۔ دا سرجزآتا کمک اٹ خوانوک آ مارتا جونی و ذہنی تربیت تون اوار اوار اوفتا قائدانہ لائخی تے ہم مون آ دننگ انگ ءِ۔ داوخت آ سعید احمد لسبیلہ یونیورسٹی نا وائس چانسلر، پروفیسر ڈاکٹرعبدالمالک ترین نا کنڈآن نیک است خواہی نا درشانی و خیرخواہی نا کلو ءِ ہم سرکرسا گوازی و ورناتا شونداری کن محکمہ گوازی و امور نوجوانان نا جم کوشست آتاستاءِ کرے۔ سلاہکار گوازی مینامجید بلوچ خوانوک آ مار تا غیرنصابی سرجزآتے مثبت و وخت انا اہم گرج گوندسا پارے کہ تعلیم تون اوار اوار گوازی ورناتا جونی و ذہنی نشوونما ، راجی ہم گرنچی، و شخصیت سازی کن بھا زالمی ءِ۔ اوپارے کہ حکومت ءِ بلوچستان ورناتے مثبت سرجزآتیٹی اوار کننگ کن ہرممکن وسیلہ غاتے کاریم اٹ اتنگ ءِ۔ مینامجید بلوچ باوری کرفے کہ لسبیلہ یونیورسٹی تون اوار صوبہ نا غٹ تعلیمی ادارہ غاتیٹی گوازی تا آسراتی تا فراوانی، کوچنگ، و المی گڑاتا فراوانی ٹی محکمہ ہذاپبی کمک کیک۔ صوبائی سلاہکار گوازی پارے کہ گوازی بیرہ تفریح آخا، بلکن دا اسہ مثبت طرز زند ءِ ہراورناتے نظم وضبط، سگ و سرکڑدہ ئی نا اصول آتے ہیل ایتک۔ نن خوانہ کہ بلوچستان نا ورناک قومی و جہانی کہول آ ملک انا پن ءِ روشنا کیر۔ داوخت آ اسپورٹس نا ڈل اسہ وار ولدا صوبائی سلاہکار نا منت واری ءِ ہرفسا داعزم انا درشانیءِ کرے کہ او جامعہ ٹی گوازی و غیرنصابی سرجزآتے مون آ دننگ کن پبی گام گیج آتے برجاتخرہ۔
