بنجائی وزیر واپار تون سینٹ پیٹرزبرگ انٹرنیشنل مرکنٹائل ایکسچینج نا نائب صدر نا اوڑدہی

اسلام آباد۔ 24 اپریل (اے پی پی) بنجائی وزیر واپار جام کمال خان روس انا سینٹ پیٹرزبرگ انٹرنیشنل مرکنٹائل ایکسچینج نا نائب صدر دمتری چرنیشیف و اونا ڈل اتون اہم اوڑدہی کرے۔ وزارت واپار اٹی مروک آ اوڑدہی نا مسخت پاکستان و روس انا نیام اٹ زرگزرانی کمکاری ءِ پین زیات کننگ ئس، اوڑدہی ٹی ہڑتوم آ کنڈآتا واپاری میکانزم ءِ ادارہ جاتی ہن و بر نا کمک اٹ گچین کننگ وحقی اجناس نا واپار نا پوسکن آ وڑڈول پٹنگ آ گپ وتران کننگا۔ وزیر واپار جام کمال خان روس اتون واپاری تعلقداری ءِ مو ن آ دننگ کن پاکستان نا عزم انا درشانی ءِ کرے و پارے کہ جہانی اقتصادی چیلنج آتیان پد ہم ہڑتوم آ ملک آتا نیام اٹ واپاری تعلقداری ٹی مثبت پیش رفت مسنے۔ اوپارے  کہ مالی سال 2023-24ٹی ہڑتوم آکنڈآتا واپاری کچ کم و ود 963 ملین امریکی ڈالر ئس، ہراٹی پاکستان نا برآمد آک 83 ملین ڈالر و درآمد آک 880 ملین ڈالر اسکان رسینگار۔ دمتری چرنیشیف سینٹ پیٹرزبرگ انٹرنیشنل مرکنٹائل ایکسچینج (سپائی میکس) ءِ اجناس نا اہم انگا روسی ایکسچینج گوندساپارے کہ داادارہ پیٹرولیم مصنوعات، گیس، کھد ، پاٹ اتون اوار بھلو کچ اسے آ اجناس نا واپار ءِ مون آدیک۔ اوشفاف نہاد آتا تعین و گچین واپاری نظام نا جوڑکننگ ءِ سپائی میکس نامشن گوندا و جہانی اجناس ایکسچینجز نا اسہ جہانی نیٹ ورک اس ٹہیفنگ نا ڈٹ ءِ ہم مون آتخا۔ اوڑدہی ٹی سپائی میکس و پاکستان مرکنٹائل ایکسچینج(پیمیکس) نا نیام اٹ مہالو آن طے مروک مفاہمتی یات داشت ءِ فعال کننگ آہم گپ وتران مس، تانکہ تکنیکی کمکاری، معلومداری تا ہل و تس و واپاری پلیٹ فارم آتا ڈیجیٹل انضمام ءِ ممکن کننگ مرے۔ وزیر واپار جام کمال خان ہڑتوم آ ایکسچینجز آتا نیام اٹ علم و آزموندہ نا ہل و تس نا پبی مخ تفی ءِ کرے و پارے کہ روس آن تیل، خولم، کھد وخت اس کہ پاکستان آن برنج، کرپاس، میوہ و سوزی کون آ آب اٹ و تبادلہ پذیر اجناس نا عملی واپار کن پتی گام گیج کننگے۔