اسلام آباد۔23اپریل (اے پی پی): سارک چیمبر آف کامرس اینڈ انڈسٹری ءِ سیکرٹری جنرل ذوالفقار بٹ ءِ سروکی ءَ ڈل ءَ بنجاھی وزیر تجارت جام کمال خان ءَ گوں گند ءُ نند کت۔ وزارت ءِ نیمگ ءَ جاڑی بوتگیں بیان ءِ رد ءَ چار شمبے ءِ روچ ءَ برجم داشتگیں دیوان ءَ زالبولانی چیمبر ءِ چیئرپرسن حنا منسب ءُ نامداریں صنعت کار زبرز ملک ءَ ھم بھر زوری کتگ۔ گند ءُ نند ءِ تہ ءَ ھاسیں رنگ ءَ بنگلہ دیش ءِ گوما تجارتی سیادی آناں مھکم کنگ ءِ سر ءَ دلگوشی دیگ بیت۔ ڈل ءَ وزیر تجارت ءَ را سرپد کت کہ ایف پی سی سی آئی ءِ کمک ءَ ڈیڈ لائن ءَ پد مزنیں تجارتی ڈل بنگلہ دیش ءَ روگ ءَ انت۔ بنگلہ دیش ءِ وتی گوستگیں تر ءُ تاب ءِ حوالہ ءَ آئی ءَ گوشت کہ اودا مردم ءُ واکدار آنی نیمگ ءَ آئی ءَ را بے دروریں احترام، مھر ءُ گامگیج انداری رستگ کہ ایشی ءَ چہ آئی ءَ را سک باز وشی ءِ احساس بوتگ۔ ڈل ءَ گوشت کہ بنگلہ دیش ءِ وزیر تجارت ءَ گوں ھم گند ءُ نند کتگ آئی ءَ دوئیں ملک آنی نیام ءَ تجارتی سیادی آنی دیمروئی ءِ واستہ سک باز دلبڈی داتگ۔ زالبولانی چیمبر ءِ چیئرپرسن حنا منسب ءَ گوشت کہ بنگلہ دیش زالبولیں کاروباری مردم آنی واستہ ھم یک جوانیں کاروباری منزل اِنت پرچا کہ دوئیں ملک آنی دود ءُ ربیدگ، گامگیج ان نوازی ءُ کاروباری چاگرد ءِ تہ ءَ مزنیں یکوئی است اِنت۔ ڈل ءَ گوشت کہ 19 مئی ءَ بگر داں 21 مئی ءَ تجارتی میلہ ءِ برجائی کنگ بیت، ایشی ءِ تہ ءَ 44 کمپنی بھر زوری کن اَنت ءُ وتی پروڈکٹس ءُ سروسز ءِ نمائش کن اَنت۔ بنجاھی وزیر جام کمال خان ءَ ڈل ءِ کوشست آناں ساڑات ءُ گوشت کہ بنگلہ دیش یک مزنیں مارکیٹ یے کہ ایشی ءِ آبادی 180ملین اِنت کہ ایشی ءِ تہ ءَ بازیں کاروباری موہ است اَنت۔ آئی ءَ ڈل ءَ را سرجمیں ممکنہ حکومتی کمک ءِ دل یکیمی دات۔ گند ءُ نند ءِ ساھت ءَ بنجاھی وزیر ءَ اسلام آباد ءَ جوڑ بوھوکیں سارک چیمبر آف کامرس ءِ ماڑی ءِ بابت ءَ ھم جست ءُ پرس کت کہ آئی ءَ را ڈل ءَ ھال دات کہ اے 9 منزلہ ماڑی نوں سرجمی ءِ گڈی بھر ءَ انت۔ اے ماڑی کہ یک دہائی ءَ بس یک سرمئی ڈھانچے بوتگ ات، نوں سرکاری مداخلت ءِ سبب ءَ سرجمی ءِ نزیک ءَ انت، ءُ یک زیبائیں تجارتی مرکزے جوڑ بیت۔
