پاکستان ءُ ترکیہ ءَ جتا جتائیں شوبگ آنی تہ ءَ دو نیمگی سیادی ءَ را گیش مھکم کنگ ءُ ھمک رنگ ءِ ناشرکاری ءِ ھلاسی ءِ واستہ یکجائی کوشست کنگ ءِ واستہ وتی جزم ءِ پدا پدر کت،  اسلام آباد ءَ دستخط کتگیں 25 معاہدہ آنی سر ءَ عملدرآمد بندات بوتگ، پاکستان ءِ مزن وزیر ءُ ترکیہ ءِ صدر ءِ پریس کانفرنس

انقرہ ۔23اپریل  (اے پی پی): پاکستان ءُ ترکیہ ءَ ھرچ وڑیں ناشرکاری ءِ ھلاسی ءُ جتا جتائیں شوبگ آنی تہ ءَ یکوئی ءِ سیادی ءَ را گیش مھکم کنگ ءِ وتی جزم ءِ یک رندے پدا گوشت کہ اسلام آباد ءَ دوئیں ملک آنی نیام ءَ کشت ءُ کشاری ءُ توانائی ءَ ھوار جتا جتائیں شوبگ آنی تہ ءَ دستخط بوتگیں 25معاہدہ آنی سر ءَ عمل کنگ بندات بوتگ۔ اے گپ سئے شمبے ءِ روچ ءَ مزن وزیر محمد شہباز شریف ءُ ترکیہ ءِ صدر رجب طیب اردوان ءِ نیمگ ءَ یکجائی پریس کانفرنس ءِ ساھت ءَ کنگ بوتگ اَنت۔ مزن وزیر محمد شہباز شریف ءَ گوشت کہ صدر رجب طیب اردوان ءَ گوں گند ءُ نند ءَ چہ من ءَ وشی بوتگ۔ آ ترکیہ ءِ مہلوک ءِ دل ءَ نشتگ۔ آئی ءِ بازیں سالانی جہد ءَ ترکیہ یک مھکمیں معیشت ءُ دیمروئی پسندیں چاگردے جوڑ کتگ ءُ دنیا ءِ بااثریں ملکانی تہا ہوار کتگ۔ ما آئی ءُ آئی ءِ کھول ءِ پاکستان ءِ تر ءُ تاب ءِ منت وار ایں ۔ 2010 ءِ زمین چنڈ ءِ موہ ءَ آئی ءَ بحالی ءِ کار، موبائل ہسپتال ءُ دگہ گامگیج آنی وسیلگ ءَ سرجمیں کمک کتگ۔ آئی ءَ سیلاب ءِ آماچیں دمگ آنی تر ءُ تاب کتگ ءُ 2022 ءِ سیلاب ءِ وھد ءَ ترکاہی ءَ سندھ ءُ بلوچستان ءِ سیلاب ءِ آماچیں مردم آناں ھم سرجمیں کمک کتگ۔ سیلاب ءِ سبب ءَ سداں لوگ تباہ بوتگ انت ءُ کشاراں تاوان رستگ۔ آ اے ھمدردی ءُ کمک ءِ واستہ ترکاہی ءِ سرکار ءُ مہلوک ءِ منت وار انت۔ مزن وزیر محمد شہباز شریف ءَ گوشت کہ آئی ءِ تر ءُ تاب ءَ چہ ھپتمی مزن تک ءِ اسٹریٹجک کوآپریشن کونسل ءَ بوتگیں معاہدہ آناں سرجمی ءَ چہ سرجمی ءَ عمل کنگ ءَ کمک رسیت ھاسیں رنگ ءَ توانائی، آئی ٹی، انفراسٹرکچر، کان کنی ءُ کشت ءُ کشاری ءِ ھواریں شوبگ آنی تہ ءَ کمک رس ایت۔ آئی ءَ گوشت کہ مئے یکجائی کوشست آنی وسیلگ ءَ وت مہ وتی تپاک کتگیں دو نیمگی تجارتی کساس ءَ را 5ارب ڈالر ءَ سر کنگ ءَ کمک رسیت۔ پاک ترکیہ ءِ سیادی آنی تہ ءَ دفاعی کمک ءِ ھاسیں کرد اِنت۔ ما وتی انسداد ناشرکاری ءِ کوشست آنی تہ ءَ ترکیہ ءِ کمک ءِ منت وار ایں ۔ مزن وزیر ءَ گوشت کہ گوستگیں وھداں بلوچستان ءَ چہ ناشرکاراں جعفر ایکسپریس ریل ءِ سر ءَ اُرش کتگ ءُ بے گناھیں مسافر آناں نشانگ جوڑ کتگ۔ حملہ آور کشگ بوتگ انت۔ ایشی ءِ پُشت ءَ بی ایل اے ءُ ٹی ٹی پی اتنت۔ ما یکجائی کوشست ءَ گوں ناشرکاری ءِ اے آفت ءَ را ھلاس کت کن ایں ۔ ایشی ءَ چہ نہ ایوک ءَ پاکستان ءُ ترکیہ ءَ بلکیں سرجمیں دگنیا ءَ امن ءِ بڈ بوت کنت۔ آئی ءَ گوشت کہ ما میاں اوستمانی تک ءَ پیداکیں جاور ھال، دمگی ءُ جھان ءِ جیڈھ آنی سر ءَ یکجائی ءَ ھیال ءُ لیکہ درشان کتگ ءُ مسلم امت ءِ نیام ءَ یکوئی وھد ءِ لوٹ اِنت۔ ما غزہ ءِ ھراب بوھوکیں جاور ءُ فلسطینیانی سر ءَ بے مٹیں زلم ءُ زوراکی ءَ را مذمت کن ایں ۔ پنجاہ ہزار ءَ چہ گیش بے گناہیں فلسطینی چہ زالبول ءُ چُکاں ھوار کُشگ بوھگ ءَ اَنت۔ ترندیں جنگ بندی ءِ جار جنگ بہ بیت ءُ فلسطینی آں انسانی کمک دئیگ بہ بیت۔ ما 1967 ءَ پیسر ءِ سیمسر آنی تہ ءَ فلسطینی ریاست ءِ جوڑ کنگ ءِ حمایت ءَ پدا کن ایں کہ ایشی ءِ دارالحکومت القدس الشریف بہ بیت۔ اے فلسطینی راج ءِ جیڑہانی گیش ءُ گیوار ءِ تہنا ءُ عادلانہ راہ اِنت، اے رد ءَ اقوام متحدہ ءُ اسلامی تعاون ءِ تنظیم ءِ رھبندانی رد ءَ اِنت۔ آئی ءَ گوشت کہ اقوام متحدہ ءِ سرپرستی ءَ گلوبل فورم ءَ دوئیں ملک آنی نیام ءَ کمک است انت، ءُ اے تر ءُ تاب ءِ مول ءُ مراد دوئیں ملک آنی نیام ءَ اسٹریٹجک شریکداری ءُ مھکمیں سیادی ءَ را گیش مھکم کنگ انت۔ ترکیہ ءِ صدر رجب طیب اردوان ءَ گوشت کہ آ مزن وزیر شہباز شریف ءِ ڈل ءَ را اسلام آباد ءَ وش آتک کنگ ءَ آں کہ آ فروری ءَ مزن تک ءِ اسٹریٹجک کوآپریشن کونسل ءِ دیوان ءَ بھر زوری ءَ بہ کن اَنت۔ باہمی رابطہ مضبوط دوستانہ تعلقات ءِ نشانی انت۔ گند ءُ نند ءَ وت مہ وتی سیادی ءُ جھان ءِ معاملہ آنی سر ءَ ھیال ریچی کنگ بوت۔ آئی ءَ گوشت کہ ناشرکاری ءِ ھلاسی ءَ پاکستان ءِ کرد ستا کرز انت۔ پاکستان ءَ ناشرکاری اُرشاں شہید بوتگیں مردمانی گس ءِ گس ءِ گوما دلپدردی ءِ درشان کناں۔ اقوام متحدہ ھمک رنگ ءِ ناشرکاری ءِ ھلاسی ءِ واستہ پاکستان ءِ کوشست آنی کمک ءَ کنت ۔ آئی ءَ گوشت کہ پاکستان ءِ تر ءُ تاب ءِ وھد ءَ 25 معاہدہ ءِ سر ءَ دستخط کنگ بوت۔ دوئیں ملک آنی نیام ءَ تجارت، کشت ءُ کشاری، توانائی، دود ءُ ربیدگ، بینکنگ، ءُ جان سلامتی ءِ پڑ ءَ معاہدہ آنی سر ءَ دستخط کتگ کہ ایشی ءِ سر ءَ زوتیں وھد ءَ دلجمی ءَ گوں عمل کنگ بیت۔