مزن وزیر شہباز شریف ءُ ترکیہ ءِ صدر رجب طیب اردوان ءَ گند ءُ نند کتگ ءُ دمگ ءَ امن، مھکم ءُ وشھالی ءِ دیمروئی ءِ واستہ پاکستان ءُ ترکیہ ءِ نیام ءَ اسٹریٹجک شریکداری ءَ را گیش مھکم کنگ ءِ وتی جزم ءِ  درشان

انقرہ ۔22اپریل  (اے پی پی): مزن وزیر محمد شہباز شریف ءُ ترکیہ ءِ صدر رجب طیب اردوان ءَ دوئیں ملک آنی نیام ءَ دیریں براتی سیادی آنی سر ءَ دل یکیمی ءِ درشانی کت ءُ جتا جتائیں پڑ آنی تہ ءَ دو نیمگی کمک ءَ را گیش مھکم کنگ ءِ واستہ وتی جزم ءِ پدر کنگ کت۔ ایشاں پڑ ءَ امن، مھکم، دیمروئی ءُ وشھالی ءِ واستہ پاکستان ءُ ترکیہ ءِ نیام ءَ اسٹریٹجک شریکداری ءَ را گیش مھکم کنگ ءِ جزم ءِ درشان کت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ انقرہ ءِ سرکاری تر ءُ تاب ءِ ساھت ءَ جمہوریہ ترکیہ ءِ صدر رجب طیب اردوان ءَ گوں گند ءُ نند کتگ۔ گند ءُ نند ءِ ساھت ءَ دوئیں راہشوناں پاکستان ءُ ترکیہ ءِ نیام ءَ دیریں براتی سیادی آنی سر ءَ دل یکیمی ءِ درشان کت ءُ جتا جتائیں شوبگ آنی تہ ءَ دو نیمگی کمک ءَ را گیش مھکم کنگ ءِ واستہ وتی جزم ءِ پد ءَ زور دات۔ مزن وزیر ءَ ھاسیں رنگ ءَ یکجائی منصوبگ ءُ دو نیمگی سرمایہ کاری ءِ وسیلگ ءَ اقتصادی کمک ءَ را گیش کنگ ءِ سر ءَ زور پر دات۔ آئی ءَ دوئیں ملک آنی نیام ءَ توانائی، کان کنی، دفاع، کشت ءُ کشاری پیداوار ءِ تہ ءَ یکجائی منصوبگ، تجارت ءِ دیمروئی ءُ مردم آنی نیام ءَ تبادلہ ءِ دیمروئی، دمگی ءُ دو نیمگی سیادی آناں گیش کنگ ءُ مصنوعی ذہانت ءُ سائبر سیکورٹی ءِ وڑیں نوکیں ٹیکنالوجی آنی تہ ءَ کمک ءِ موہ آنی سر ءَ زور پر دات۔ گپ ءُ تران ءِ ساھت ءَ دوئیں سروک آں 13فروری 2025 ءَ اسلام آباد ءَ برجم داشتگیں 7می مزن تک ءِ اسٹریٹجک کوآپریشن کونسل ءِ پیشرفت ءِ سر ءَ چار ءُ تپاسی کت، دوئیں سروک آں پاکستان ءُ ترکیہ ءِ نیام ءَ کثیر جہتی دو نیمگی کمک ءِ رفتار ءِ سر ءَ دل یکیمی ءِ درشان کت۔ مزن وزیر شہباز شریف ءُ صدر اردگان ءَ دمگی ءُ جھان ءِ جیڈھ آنی سر ءَ ھم ھیال ءُ لیکہ ءِ درشان کت ءُ راجی مفاد ءِ جیڈھ آنی سر ءَ یک دومی ءِ کمک ءِ یک رند ءَ پدر کت۔ رھشوناں غزہ ءِ انسانی جاور ھال آنی سر ءَ سک باز جیڈھ ءِ درشانی کتگ ءُ زوت جنگ بندی ءُ آماچیں آبادی ءَ را انسانی کمک ءِ پھجارینگ ءِ لوٹ کتگ۔ صدر اردگان ءَ پاکستان ءِ برجاھیں فلسطین ءِ کمک ءُ انسانی کمک ءَ را ساڑات۔ دوئیں بامرد ءَ پڑ ءَ امن، برجائی، دیمروئی ءُ وشھالی ءِ واستہ پاکستان ءُ ترکیہ ءِ نیام ءَ اسٹریٹجک شریکداری ءَ را گیش مھکم کنگ ءِ جزم ءِ درشان کت۔ پاکستانی ڈل ءِ تہ ءَ نائب مزن وزیر ءُ دری کارانی وزیر محمد اسحاق ڈار، وزیر ءِ ھال ءُ اھوال عطا اللہ تارڑ، ھاسیں کمکار طارق فاطمی، ءُ ترکیہ ءَ پاکستان ءِ سفیر ڈاکٹر یوسف جنید  ھوار بوتگ اَنت۔ صدر اردوان ءَ مزن وزیر شہباز شریف ءُ آئی ءِ ھمراھیں ڈل ءِ شرپ ءَ شپ ءِ ورگ ءِ ھم میزبانی کت۔