حکومت ورناتے مارکیٹ نا گرج آتا رداٹ کسبکار کننگ کن ووکیشنل ٹریننگ آ چکار کننگ ءِ، وزیراعظم شہباز شریف

اسلام آباد۔ 22 اپریل (اے پی پی) وزیراعظم محمد شہباز شریف پارینے کہ حکومت ورناتے مارکیٹ نا گرج آتا رداٹ کسب کار کننگ کن ووکیشنل ٹریننگ آ چکار کننگ ءِ، ایمپلائز اولڈ ایج بینیفٹ و ورکرز ویلفیئر فنڈ انا دائرہ کار ءِ ودفنگ انگ ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او انٹرنیشنل ٹریڈ یونین کنفیڈریشن نا سیکرٹری جنرل لوک ٹرائینگل تون گپ وتران کرساکرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی علاقائی سیکرٹری جنرل آئی ٹی یو سی شوئیایوشیڈاآن بیدس بنجائی وزیر اعظم نذیر تارڑ، احدخان چیمہ، چوہدری سالک حسین ، وزیر مملکت عون چوہدری، خصوصی کمکار طارق فاطمی و تعلقدار بڑزکو کمامدارآک ساڑی ئسر۔ وزیراعظم انٹرنیشنل ٹریڈ یونین کنفیڈریشن نا جہانی کہول آ افرادی قوت نا حق اکن کوشست آتا ستاءِ کرساپارے کہ پاکستان انٹرنیشنل لیبر آرگنائزیشن تون اواری اٹ مزور و کارندہ غاتا حق اکن کاریم کننگ ءِ۔ وزیراعظم پارے کہ حکومت ایمپلائز اولڈ ایج بینیفیٹس و ورکرویلفیئر فنڈ انا دائرہ کار ءِ ودفنگ ءِ تانکہ زیات آن زیات ملازم، کارندہ و افرادی قوت فائدہ ہرفنگ کیر ۔ بنجائی کہول آ نیشنل ووکیشنل ٹیکنیکل ٹریننگ کمیشن و صوبائی کہول آ ووکیشنل ٹریننگ انسٹیٹیوٹ ورناتے کسبکار کننگ کن چندی ہیلکاری پروگرام اڈترفنگ انگ ءِ تانکہ مارکیٹ نا گرج آتا رداٹ کسبکار افرادی قوت دوئی مننگ کے۔ وزیراعظم پارے کہ پاکستان موسمیاتی بدلی آن غٹ آن زیات زہمی مروک آ ملک آتیٹی اوار ءِ۔ 2022 نا نوکاپ آن پاکستان ءِ 30 ارب ڈالر نا نسخان ہرفوئی تما۔ داموسمیاتی بدلی تا سوب آن پاکستان اٹ مزور وکارندہ غاتے روزگار نا بابت بھازانگا ویل مون تروک مس و نسخان ہرفوئی تما۔ موسمیاتی بدلی آن مون تروک آ ویلک آتا ایسری کن پاکستان و داوڑکون آ ایلو ملک آتے جہانی مالیاتی ادارہ غاتا خصوصی مالی کمک درکارمریک۔ حکومت داہیت ءِ پک کننگ ءِ کہ چاگڑدی بدلی نا خطرہ غاتا گواچی کمیونٹی تیٹی چاگڑدی بدلی تون موافقت و اونا مضراثرآتا چٹفنگ و زرگزرانی وڑاٹ نزور تپہ غاتا معاش نا رکھ مننگ کے۔ انٹرنیشنل ٹریڈ یونین کنفیڈریشن نا سیکرٹری جنرل لوک ٹرائینگل پاکستان اٹی جمہوری قدر انا ستاءِ کرسا ملک اٹی مزور و کارندہ غاتا گچینی کن کروک آ گام گیج آتا ستاءِ کرے۔