اسلام آباد۔ 22 اپریل (اے پی پی) وزیراعظم محمد شہباز شریف سپیس ٹیکنالوجی، سپیس سٹیلائیٹ و ٹیلی کمیونیکیشن و سٹیلائیٹ انٹرنیٹ نا بشخ آتیٹی کمکاری ءِ ودفنگ نا است خواہی نا درشانی ءِ کرسا پارینے کہ پاکستان اسپیس ٹیکنالوجی نا بشخ ءِ بھاز اہمیت تننگ ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او چین آن تعلق تخوک آ سپیس ٹیکنالوجی کمپنی ’’گلیکسی سپیس‘‘ نا ڈل اتون گپ وتران کرساکرے ہراچیئرمین زومنگ نا کماشی ٹی سے شنبے نادے آ داڑے اوڑتون اوڑدہی کرے۔ اوڑدہی ٹی بنجائی وزیر اقتصادی امور احدخان چیمہ، بنجائی وزیر انفارمیشن ٹیکنالوجی و ٹیلی کام شزافاطمہ، وزیر نا سلاہکار ڈاکٹر توقیر شاہ و تعلقدار سرکاری ادارہ غاتا آفیسر آک بشخ ہلکر۔ داوخت آ وزیراعظم پارے کہ پاکستان اسپیس ٹیکنالوجی بشخ ءِ بھاز اہمیت تننگ ءِ۔ چین ننا بھاز پت انا قابل سنگت و سٹریٹجک شریدار ءِ۔ وزیراعظم پارے کہ چین اتون اسپیس ٹیکنالوجی، اسپیس سٹیلائیٹ و ٹیلی کمیونیکیشن ، سٹیلائیٹ انٹرنیٹ نا بشخ آتیٹی کمکاری ءِ ودفنگ نا خواہندار اُن۔ گلیکسی اسپیس نا ڈل پاکستان نا سپیس ٹیکنالوجی انڈسٹری ٹی زرکاری و پاکستانی سپیس ٹیکنالوجی نا ادارہ و نجی ٹیلی کام کمپنی تتون اسیجائی ڈٹ آتا بابت بھاز است خواہی نا درشانی ءِ کرساپارے کہ وزارت انفارمیشن ٹیکنالوجی و ٹیلی کام و سپارکو نا کمامدارآتون اوڑدہی بھاز فائدہ ئی مس۔ ڈل پاکستان اٹی جم وجوش اٹ مہمانداری آ حکومت پاکستان نا منت واری ءِ ہرفے۔
