اسلام آباد۔ 22اپریل (اے پی پی) بنجائی وزیر ڈٹ بندی، شونداری و خصوصی گام گیج احسن اقبال پارینے کہ پاکستان ءِ ٹیکنو۔اکانومی ٹی بدل کننگ وخت انا ہم گرج ءِ۔ نیشنل یونیورسٹی آف سائنسز اینڈ ٹیکنالوجی(نسٹ )اٹی اڈ ہلوک آسیان۔پاکستان ٹیکنالوجی ایکسپو2025آن تران کرسا احسن اقبال داہیت آ زور شاغا کہ پوسکن آ سائنس و ٹیکنالوجی ہموقوت ءِ ہراقوم تا تقدیر ءِ بدل کننگ کیک۔ اونسٹ انا نیشنل سینٹر فارروبوٹکس اینڈ آٹومیشن و آسیان کمیٹی سائنس، ٹیکنالوجی و انوویشن نا اسیجائی کوشست آتاستاءِ کرساپارینے کہ داایکسپو علاقائی کمکاری و تکنیکی شونداری نا عملی درشانی ءِ۔ اوپارے کہ وزارت ڈٹ بندی زوت آتے اٹ ’’سائنس، ٹیکنالوجی و انجینئرنگ شونداری‘‘ پروگرام نا بناءِ کرینے، ہرانا مسخت پٹ وپول و جدت ءِ پاکستان نا شونداری ہدف آتون ہم گرنچ کننگ ءِ، ننے درملکی ٹیکنالوجی نا بیرہ صارف آخا بلکن ہندی ویل آتا ایسری کن ٹیکنالوجی نا خالق جوڑ مروئی مریک، موسمیاتی بدلی، دِیر و کشت وکشار ءِ مون تروک خطرہ و ورناتیٹی ودوک آ بے روزگاری کون آ چیلنج آتا ایسر بیرہ پوسکن آ علم و ٹیکنالوجی ٹی ءِ۔ اوڈیجیٹائزیشن ، گرین انرجی ، گرین انرجی و پوسکن آ زرگزرانی حکمت عملی تے وخت انا اہم گرج گونداوپارے کہ پاکستان و آسیان ملک آک اسیجائی چیلنج آتون اواری اٹ مقابلہ ءِ کننگ کیرہ، ورناک پاکستان نا غٹ آن نہادی میرات آک ءُ واوفتا لائخی تے کاریم اٹ اتسا نن اسہ روشنا و پائیدار آخبت اسے نا بنداو ءِ تخنگ کینہ۔ اوداہیت انا درشانی ءِ کرے کہ حکومت ٹیکنالوجی نا مون آ دننگ کن ہرممکن گام گیج کننگ ءِ و آسیان کون آعلاقائی کمکاری دنیا کن اسہ رول ماڈل اسے۔ اِرادے ئی ایکسپوٹی آسیان باسک ملک آتاڈل، تعلیمی ادارہ، صنعت و خوانوک آ مارک بشخ ہلکر تانکہ سائنس و ٹیکنالوجی نا بشخ آتیٹی کمکاری ءِ مون آ دننگ مرے۔ این سی آراے نا پروجیکٹ ڈائریکٹر عمرخان وزیراحسن اقبال نا وژن نا ستاءِ کرے ہرانا کماشی ٹی چندی قومی پٹ وپولی مرکز2017-2018اٹی جوڑ مس، ہرافتے ٹی مصنوعی ذہانت، بگ ڈیٹا، سائبر سیکورٹی و خلائی ٹیکنالوجی نا بشخ آک اوار ءُ۔ اوورناتیان خواست کرے کہ او ہندن ءُ ٹیکنالوجی اسے نا تخلیق ءِ کیر ہرانئے بیرہ مارکیٹ بلکن انسانیت نا آسودہی کن مرے۔
