اسلام آباد۔ 22 اپریل (اے پی پی) وزیراعظم محمد شہباز شریف روانڈا تون واپار و زرکاری تون اوار چندی بشخ آتیٹی کمکاری ءِ پین مون آدننگ نا عزم انا درشانی ءِ کرسا پارینے کہ کاروباری رابطہ غاتیان ہڑتوم آ کنڈآتا واپار ءِ ودفنگ اٹ کمک رسینگک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او جمہوریہ روانڈا نا خارجہ امور و جہانی کمکار نا وزیر اولیویئے جین پیٹرک ڈوہنجیریہے تون گپ وتران کرساکرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی وزیراعظم روانڈا نا وزیرخارجہ ءِ بخیر کرے و صدر پال کاگامے و وزیراعظم ایڈورڈ گیر نٹے کن نیک است خواہی نا درشانی ءِ کرے۔ اوصدر پال کاگامے ءِ پاکستان نا سرکاری دورہ ءِ کننگ نا سلہ خلک۔ ہڑتوم آملک آتا نیام اٹ ہڑتوم آ کنڈآتا تعلقداری تا مون آ دننگ آ است جمی نا درشانی ءِ کرسا وزیراعظم روانڈاتون چندی بشخ خاص کر واپار، زرکاری والسی ہن وبراٹی تین پہ تینی وڑاٹ فائدہ ئی کمکاری ءِ پین سوگو کننگ کن پاکستان نا است خواہی نا درشانی ءِ کرے۔ وزیراعظم روانڈاءِ اسلام آباد اٹی تینا مشن ءِ ملنگ آ مبارکبادی تس وپارے کہ بزنس ٹوبزنس رابطہ غان ہڑتوم آ کنڈآتا واپار ءِ ودفنگ اٹ کمکار مریک۔ روانڈا نا وزیرخارجہ وزیراعظم نا نیک است خواہی تیا منت واری ءِ ہرفے وپارے کہ روانڈاپاکستان تون واپاری و اقتصادی تعلقداری تے سوگو کننگ نا خواہندار ءِ۔ اومستی پارے کہ اسہ واپاری ڈل اس اوڑتون پاکستان آ بسوسس و لاہور اٹی واپار نا مون آدننگ کن اڈ ہلوک دود اٹی شریک مس۔ اوڑدہی ٹی ہڑتوم آملک آتا نیام اٹ اقوام متحدہ ٹی کثیر الجہتی کمکاری آ ہم گپ وتران مس۔ پاکستان و روانڈا نا نیام اٹ جہانی فورم تیا اسیجائی قدر، تین پہ تینی پت و کمکاری آ تالان دوستانہ و خوشگوار تعلقداری ءِ۔
