وزیراعظم شہباز شریف صدر رجب طیب اردوان نا سلہ غا اِرادے ئی دورہ غا انقرہ غا روانہ مس

اسلام آباد۔ 22 اپریل (اے پی پی) وزیراعظم شہباز شریف ترک صدر رجب طیب اردوان نا سلہ غا اِرادے ئی دورہ غا انقرہ کن روانہ مسنے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ دورہ ٹی وزیراعظم صدر طیب اردوان تون ہڑتوم آ کنڈآتا تعلقداری تون اوار اوار ساڑی آ جہانی و علاقائی پیش رفت آ گپ وتران کیک۔ متکن آ سیوتی و تزویراتی شریدار آتاوڑاٹ پاکستان و ترکیہ باقاعدہ بڑزکو کہول انا ہن وبرنا روایت آتے برقرارتخرہ ہراہڑتوم آ ملک آتا نیام اٹ ایلمی نا بھلا رشتہ غاتا عکاسی ءِ کیک۔ ہڑتوم آملک آک تین پہ تینی است خواہی نا چندی امور تیا کمک و ہم گرنچی کن بڑزکو کہولی سٹریٹجک کوآپریشن کونسل (ایچ ایل ایس سی سی ) نا دروشم اٹ سرکڑدہ غاتا کہول آ وڑوڈول اس ہم ٹہیفینو۔ ایچ ایل ایس سی سی نا 7 می دیوان 12،13فروری 2025آ اسلام آباد اٹی اڈہلک۔ صدر رجب طیب اردوان و وزیراعظم محمد شہبا زشریف 7می دیوان نا اسیجائی کماشی ءِ کریر۔ گمانی اوڑدہی داسوگو مکالمہ نا چرجوئی نا نمائندگی ءِ کیک و پاکستان و ترکیہ نا نیام اٹ کثیر الجہتی شریداری ءِ پین بڑز کننگ نا اسیجائی عزم ءِ تالان کیک ۔ نائب وزیراعظم و وزیرخارجہ محمداسحاق ڈار ، وزیر حوالکاری و شینکاری عطاء اللہ تارڑ و خصوصی کمکار طارق فاطمی ئسک ہم وزیراعظم تون اوار ءُ۔