اسلام آباد۔22اپریل (اے پی پی): منصوبگ بندی، دیمروئی ءُ ھاسیں گامگیج آنی بنجاھی وزیر احسن اقبال ءَ گوشت کہ پاکستان ءَ را ٹیکنو اکانومی ءِ تہ ءَ بدل کنگ وھد ءِ لوٹ اِنت۔ نیشنل یونیورسٹی آف سائنسز اینڈ ٹیکنالوجی ءَ برجم داشتگیں آسیان پاکستان ٹیکنالوجی ایکسپو 2025 ءَ گوں تران کنان ءَ احسن اقبال ءَ اے گپ ءِ سر ءَ زور پر دات کہ نوکیں سائنس ءُ ٹیکنالوجی ھما زور اِنت کہ راج آنی مقدر ءَ بدل کت کنت۔ نوسٹ ءِ نیشنل سنٹر فار روبوٹکس اینڈ آٹومیشن ءُ آسیان کمیٹی برائے سائنس، ٹیکنالوجی ءُ انوویشن ءِ یکجائی کوشست آناں ساڑاتگ ءَ آئی ءَ گوشت کہ اے ایکسپو دمگی کمک ءُ ٹیکنالوجی ءِ دیمروئی ءِ عملی درشان اِنت۔ آئی ءَ گوشت کہ وزارت ءِ منصوبگ بندی ءَ گوستگیں وھداں ’’دیمروئی ءِ واستہ سائنس، ٹیکنالوجی ءُ انجینئرنگ‘‘ پروگرام ءِ بنگیج کتگ ایشی ءِ مول ءُ مراد پٹ ءُ پول ءُ نوآبادیاتی ءَ را پاکستان ءِ دیمروئی ءِ مول ءُ مراد آنی گوما ھمگرنچ کنگ انت۔ ما درملکی ٹیکنالوجی ءِ محض صارف مہ بئیں بلکیں دمگی جیڑہانی گیش ءُ گیوار ءِ ھاترا ٹیکنالوجی ءِ جوڑ کنوک بہ بئیں۔ موسمیاتی بدلی، آپ ءُ کشت ءُ کشاری ءِ سرا ھترہ ءُ ورنا آنی بے روزگاری ءِ گیش بوھگ ءِ وڑیں جیڑھانی گیش ءُ گیوار ایوک ءَ نوکیں زانت ءُ ٹیکنالوجی ءِ تہ ءَ اِنت۔ آئی ءَ ڈیجیٹلائزیشن، گرین انرجی ءُ نوکیں اقتصادی حکمت عملی ءَ را وھد ءِ ضلورت لیک اِتگ ءُ گوشت کہ پاکستان ءُ آسیان ءِ ملک یکجائی ءَ یکجائی چیلنج آنی گوما دیم پہ دیم بوت کن اَنت۔ ورنا پاکستان ءِ ارزشتی ایں مڈّی انت ءُ ایشانی صلاحیتاں کارمرد کنان ءَ ما یک رژنائیں ءُ پائیداریں باندات ءِ بنیات ءَ ایر کت کناں۔ آئی ءَ یک رندے پدا گوشت کہ حکومت ٹیکنالوجی ءِ دیمروئی ءِ واستہ ھرچ وڑیں گامگیج زورگ ءَ اِنت ءُ آسیان ءِ وڑیں دمگی کمک دگنیا ءِ واستہ رول ماڈل اِنت۔ آسیان ءِ باسکیں ملک، وانگ ءُ زانگ ءِ ادارگ، صنعت ءُ نودربر آنی ڈل آں سائنس، ٹیکنالوجی ءُ نوآبادیاتی ءِ پڑ ءَ کمک ءِ دیمروئی ءِ واستہ دو روچی ایکسپو ءَ بھر زرتگ۔ این سی آر اے ءِ پروجیکٹ ڈائریکٹر عمر خان ءَ وزیر احسن اقبال ءِ وژن ءِ توسیپ کت کہ آئی ءِ سروکی ءَ 2017-2018 ءَ بازیں راجی پٹ ءُ پولی مراگش جوڑ کنگ بوتگ انت ایشی ءِ تہ ءَ مصنوعی ذہانت، بگ ڈیٹا، سائبر سیکورٹی ءُ خلائی ٹیکنالوجی ءِ پڑ ءَ ھوار انت۔ آئی ءَ ورنا آناں گوں دزبندی کتگ کہ آ انچیں ٹیکنالوجی جوڑ بہ کن اَنت کہ ایوک ءَ مارکیٹ ءِ واستہ نہ بلکینگ ءَ انسانیت ءِ پائدگ ءِ واستہ ھم بہ بیت۔
