پاکستان ءَ کرغزستان ءِ سفیر آوازبک اتاخانوف ءَ تجارت ءِ بنجاھی وزیر جام کمال خان ءَ گوں گند ءُ نند

اسلام آباد۔22اپریل  (اے پی پی): پاکستان ءَ کرغزستان ءِ سفیر آوازبک اتاخانوف ءَ وتی کارگس ءَ بنجاھی وزیر تجارت جام کمال خان ءَ گوں گند ءُ نند کت۔ گند ءُ نند ءَ وت مہ وتی بیپار، اقتصادی کمک ءُ دمگی سیادی آنی دیمروئی ءِ بابت ءَ گپ ءُ تران کنگ بوت۔ مزن وزیر ءِ کوآرڈینیٹر رانا احسان افضل ءُ وزارت تجارت ءِ مزن مزنیں کارندہ آں گند ءُ نند ءَ بہر زرتگ۔ بنجاھی وزیر ءَ کرغزستان ءِ سفیر ءَ را وش اتک کت ءُ پاکستان ءُ کرغزستان ءِ نیام ءَ راجدپتری ءُ دود ءُ ربیدگی سیادی آنی ارزشت ءِ سر ءَ زور پر دات ءُ گوشت کہ پاکستان دوئیں ملک آنی وت مہ وتی سیت ءِ واستہ اے براتی سیادی آناں یک سرجمیں اقتصادی شریداری ءِ تہ ءَ بدل کنگ لوٹ ایت۔ گند ءُ نند ءِ ساھت ءَ دوئیں نیمگ ءَ ھاسیں رنگ ءَ تجارت، سرمایہ کاری ءُ دمگی سیادی ءِ پڑ ءَ کمک ءَ را گیش گیش کنگ ءِ واستہ وتی جزم ءِ پدر کنگ بوت۔ جام کمال خان ءَ سفیر ءَ را پاکستان ءِ گہتر بوھوکیں اقتصادی جاورھال آنی بابت ءَ سرپد کت ایشی ءِ تہ ءَ مہنگائی ءُ سود ءِ شرح ءِ تہ ءَ کمی، توان ءِ نرخ آنی تہ ءَ کمی ءُ زرّ ءِ مارکیٹ ءِ تہ ءَ استحکام ھوار اِنت۔ آئی ءَ تجارتی جیڈھ آنی گیواری ءِ ضلورت ءِ سر ءَ زور پر دات ءُ دوئیں ملک آنی کاروباری براتی آنی نیام ءَ گیشاں چہ گیش ھوار بوھگ ءِ ضلورت ءِ سر ءَ زور پر دات۔ سفیر آوازبیک اتاخانوف ءَ پاکستان ءَ برجاھیں اصلاحات ساڑاتگ ءُ گوشت کہ کرغزستان ءِ نیمگ ءَ چہ یک مزنیں تجارتی ڈل زوت پاکستان ءِ تر ءُ تاب ءَ کیت۔ پاکستان ءِ جغرافیائی ارزشت ءَ را پدر کنان ءَ آئی ءَ گوشت کہ پاکستان خطہ ءَ تجارت ءِ دیمروئی ءِ واستہ کلیدی کرد پیلو کت کنت۔ کرغزستان دمگی اقتصادی دیمروئی ءُ برجائی ءِ واستہ پاکستان ءِ گوما کمک ءَ را گیش کنگ ءِ واھشت مند اِنت۔ گند ءُ نند ءَ نوکیں بیپاری راہ ءُ درانی دیمروئی ءِ بابت ءَ ھم گپ ءُ تران کنگ بوتگ ءُ دوئیں ملکاں بیپاری ءِ واستہ نوکیں موہ ءُ راہ آناں پچ کنگ ءِ ضلورت ءِ سر ءَ تپاک کنگ بوتگ۔ گند ءُ نند ءِ تہ ءَ دوئیں نیمگاں مزنیں تک ءِ رابطہ ءُ کمک ءِ برجاہ دارگ ءِ جزم ءِ درشانی کتگ ءُ پاکستان ءُ کرغزستان ءِ یکجائی بین حکومتی کمیشن ءِ پنچمی دیوان ءِ تیاری ءِ سر ءَ ھم تپاک کتگ کہ مئی 2025ءَ برجم دارگ بیت۔