پوپ فرانسس ءِ امن، راجی انصاف، بین المذاہب مکالمہ، نزور تپہ غاتا راجی آسودہی نا کوشست آتیکن یات تخنگک، صدر آصف علی زرداری

اسلام آباد۔ 21 اپریل (اے پی پی) صدر مملکت آصف علی زرداری پوپ فرانسس نا کزیت آ ڈکھیائی و است ہسونی نا درشانی ءِ کرسا آنجہانی پوپ انا بین المذاہب ہم گرنچی، ہمدردی و پرامن بقائے تین پہ تینی نا عزم ءِ خراج تحسین پیش کرینے۔ دوشنبے نادے آایوان ءِ صدر نا پریس ونگ انا رداٹ صدر مملکت پوپ فرانسس نا کزیت آ حکومت ءِ پاکستان و الس نا کنڈآن ویٹیکن و مچ آ کیتھولک کمیونٹی تون ہڑزخواہی نا درشانی ءِ کرے۔ اوپارے کہ پوپ فرانسس ءِ مچ آ دنیاٹی امن، راجی انصاف، بین المذاہب مکالمہ و نزور تپہ غاتا راجی آسودہی نا کوشست آتیکن یات تخنگک۔ صدر مملکت پارے کہ پوپ فرانسس امن و انصاف نا اسہ سوگو ءُ توار اس ئس، پوپ فرانسس چندی مذہب آتیان تعلق تخوک آ کمیونٹی تے گنڈنگ کن کوشست کرے۔ صدر آصف علی زرداری پارے کہ تین پہ تینی افہام و تفہیم نا مون آ دننگ کن پوپ فرانسس نا کوشست آتے مدام یات تخنگک۔ اوپارے کہ پوپ فرانسس نا کزیت نئے بیرہ مسیحی بلکن مذہب آتانیام اٹ امن و مکالمہ نا قدر کروک آتیکن اسہ عظیم ءُ نسخان اسے۔