اسلام آباد۔ 21 اپریل (اے پی پی) پاکستان وچین نا نیام اٹ تعلقداری تا بارواٹی دوشنبے نادے آ داڑے وزارت خارجہ و چین نا سفارت خانہ ’’اسیجائی آخبت اتون چین پاکستان شریداری اٹ کمیونٹی نا تعمیر‘‘ نا سرحال آ اسہ سمپوزیم نا بست وبند کریر۔ دود اٹی سیکرٹری خارجہ آمنہ بلوچ، پاکستان اٹ چین نا سفیر، پاک چائنہ انسٹیٹیوٹ نا سروک مسکوہی سینیٹر مشاہد حسین سید، چین اٹی پاکستان نا مسکوہی سفیر نغمانہ ہاشمی، سینئر سیاسی راہشون افراسیاب خٹک و عبداللہ حمید گل آن بیدس انسٹیٹیوٹ آف سٹریٹجک سٹڈیز نا چیئرمین خالد محمود، ڈائریکٹر ڈاکٹر طلعت شبیر، حسن داؤد بٹ، تعلیم نا چاہندار، سروس و مسکوہی سفارتکار، پاکستان چین تعلقداری نا چاہندار و صحافیک بشخ ہلکر۔ داوخت آ ترانکار آک پاکستان وچین نا نیام اٹ تاریخی دوستانہ و سفارتی تعلقداری نا ذکر ءِ کریر ہرافتے تدوک آ اسہ دہائی آن چین۔ پاکستان اقتصادی راہداری(سی پیک) پوسکن ءُ جہت اس تسنے۔ اوفک پاریر کہ ہڑتوم آملک آک پاکستان اٹ اقتصادی زون تے فعال کننگ اٹ پبی کڑد ادا کننگ ءُ۔ اوفک پاریر کہ گوادر اٹی پوسکن آ جہانی بالی پٹ ان چین نا شار تسکان جہاز آتا بناءِ کننگک ہراڑآن برآمدآتا فراوانی ممکن مریک وپاکستان نا الس خاص وڑاٹ بلوچستان نا مخلوق ءِ فائدہ مریک۔ دود انا بست وبند چین نا صدر شی جن پنگ نا پاکستان نا سرکاری دورہ نا دہ سال پورو مننگ نا وخت آ کننگاسس۔
