لاہور۔ 21 اپریل (اے پی پی) بنجائی وزیر ڈٹ بندی و خصوصی گام گیج پروفیسر احسن اقبال پارینے کہ علامہ اقبال نا رغاموک آک ننکن کسر نا ڈیواءُ، حکومت اقبال نا فکر ءِ تعلیمی پڑانا بشخ کیک۔ داخیال آتا درشانی ءِ او دوشنبے نادے آ اقبال نا مزار آ حاضری نا وخت آ میڈیا تون گپ وتران کرساکرے۔ بنجائی وزیرپارے کہ علامہ اقبال برصغیرنا مسلمان تیکن اسہ جتا ءُ مملکت اسے نا پیدوار تصور و شعور پیش کرے، ہرادے عملی دروشم اس قائد اعظم محمد علی جناح تس۔ اوپارے کہ اینو بطور قوم ننے راجی بشخنگ و جہانی چیلنج مون تروک ءِ، ہرانا بنداوی سوب اقبال نا فکر خودی و کلام آن مُری ءِ، علامہ اقبال نا رغاموک آک ننکن کسر نا ڈیوا و ننا غٹ مشکل آتا ایسر ءُ۔ ننے اونا فلسفہ ءِ تینا کرسا زرگزرانی خودانحصاری ، تعلیمی انقلاب و قومی یکجہتی ءِ مون آ دروئی مریک۔ احسن اقبال پارے کہ ننا ورناک قومی میرات ءُ، علامہ اقبال ہم مدام ورناتے قوم انا اصل سرمایہ گوندا، اونا خڑک ورناک ہی ہمو طاقت ءُ ہراقوم تے زوال آن کشنگ کیرہ۔ بنجائی وزیرپارے کہ حکومت اقبال نا فکر ءِ تعلیمی پڑانا بشخ کیک، ورناتے اگہ فکر اقبال آن روشناس کرفن تون انتہاپسندی آن مُرمننگ کیرہ، ورناتے مرے کہ او اقبال نا کلہو ءِ سمجھر، پوسکن ءُ علم دوئی کیر، و ملک انا شونداری ٹی تینا پبی کڑد ءِ اداکیر۔ اوپارے کہ اینو مفکر پاکستان نا 87می کزیہ دے ءِ، ای ایون مچ آ قوم انا کنڈآن مفکر پاکستان ءِ خراج عقیدت پیش کننگ کن بسونٹ، ہراتم 20274اٹی علامہ اقبال نا 150 می ودی دے مریک تو جہانی کہول آ اقبال ڈے اس اڈ ایتنہ۔ اومستی پارے کہ اقبال نا فلسفہ و اونا شاعری ءِ مون آتخسا اسہ بے مٹ ءُ راج اس ٹہیفنگ مریک تانکہ ہموڑے انصاف، خواری و اخلاقیات ءِ فوقیت دوئی مرے۔ داکان مست وزیر ڈٹ بندی و خصوصی گام گیج پروفیسر احسن اقبال ، اقبال نا مزار آ حاضری تس ، پھل آتا چادر اس شاغا و دعاپاتیاکرے۔
