اسلام آباد۔ 18 اپریل (اے پی پی) ایران ناشار مہرستان اٹی دہشت گرد آتا جلہو اٹی زوال کروک آ ہشت پاکستانی شاری تا میت آتے پاک فضائیہ نا سی ون تھرٹی جہاز اٹی چارشنبے نا نن بہاولپور آ سرکننگا۔ زاہدان اٹی پاکستان نا قونصل ہم جہاز اٹی سوارئس۔ ترجمان دفترخارجہ نا کنڈآن جمعہ نادے آ جاری بیان نا رداٹ اوکان پد دا میت آتے بہاولپور انتظامیہ نا دُوٹی تننگاسس ہرااوفتے پدسلوک آ خاہوت آتسکان دمدستی وڑاٹ سرکننگ ءِ پک کریر۔ بیان نا رداٹ میت آتا دمدستی وطن آ پدی اتنگ نا عمل ءِ آسان کننگ کن غٹ المی کانودی و طبی عمل ءِ گچین وڑاٹ پورو کننگا ہراٹی میت آتے مہرستان آن زاہدان و اوکان پد بہاولپور آسرکننگ اوار ئس۔ ایران اٹی پاکستان نا سفیر و اونا ٹیم وطن آ پدی ءِ ترند کننگ کن ایرانی کمامدار و تعلقدار آک پاکستانی ادارہ غاتون اواری اٹ کاریم کریر۔ اوپارے کہ نن دا چرجوئی ٹی ایران نا حکومت نا کمکاری نا ستاءِ کینہ۔ ترجمان ایماندار آتا درجہ غاتا بڑزی و پدسلوک خاہوت آتا دامشکل وخت اٹی حوصلہ کن دعاکرے۔
