اسلام آباد۔ 18 اپریل (اے پی پی) وزیراعظم محمد شہباز شریف پارینے کہ ملک آن دہشت گردی ءِ ماس کش کننگ کن ننا جہاد برجاسلک، دہشت گردی و انتہاپسندی نا پورو چٹفنگ کن بنجائی حکومت غٹ صوبہ غاتا کاریم نا کچ ءِ ودفنگ کن پبی کمک کیک، ملک انا اہم شارتیٹی سیف سٹی ڈٹ آتے زوت آن زوت پورو کننگے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی امن و ایمنی نا حالیت آتیا اہم جاچ دیوان اس اڈ ہلک۔ داوخت آ گپ وتران کرسا وزیراعظم پارے کہ ملک آن دہشت گردی ءِ ماس کش کننگ کن ننا جہاد برجاسلک، دہشت گرد آتے ہندن ءُ عبرتناک شکست اس ایتنہ کہ او پاکستان نا کنڈآ خراب انگا خن تیٹی ہُننگ کپس، پاکستان نا دشمن ننا زرگزرانی سرسہبی تیان خارزدہ ءِ۔ وزیراعظم پارے کہ دہشت گردی نا برخلاف پبی گام گیج و کارروائی تا بابت غٹ ادارہ و صوبہ غاتا کوشست ستاکڑزک، دہشت گردی و انتہاپسندی نا پورو چٹفنگ کن بنجائی حکومت غٹ صوبہ غاتا کچ ءِ ودفنگ کن پبی کمک کیک۔ وزیراعظم پارے کہ ننے ننے تین پہ تین نا غٹ اختلاف آتے است آن درسا دہشت گردی نا چٹفنگ کن اواری اٹ کاریم کروئی ءِ، ننا سیکورٹی فورس آتا بہادر ورناو آفیسر آک دے و نن دہشت گرد آتون مون تننگ ءُ و تینا جون تے ندر کننگ ءُ۔ وزیراعظم پارت کرے کہ اسمگلنگ نا برخلاف غٹ ادارہ غاک تینا کوشست آتے پین ترند کیر، انسانی اسمگلنگ نا نیٹ ورک ءِ پین سخت کننگے و اسمگلر آتے کانودنا شکنجہ ٹی اتنگے، ملک انا اہم شار تیٹی سیف سٹی ڈٹ آتے زوت آن زوت پورو کننگے، دہشت گردی نا برخلاف بیانیہ نا بابت بنجاو صوبہ غاک اواری اٹ کاریم کننگ ءُ ہراکہ بھاز ستاکڑزک۔ دیوان ءِ ملک اٹی امن وایمنی نا بابت گام گیج آتیا سرجمی اٹ حوال تننگا، ہراٹی پاننگاکہ نیکٹا ٹی نیشنل اینڈ پرونشل انٹیلی جنس فیوژن اینڈ تھریٹ اسیسمنٹ مرکز اس جوڑ کننگانے۔ حوال اٹی پاننگانے کہ پنجاب نا دہ شار تیٹی سیف سٹی ڈٹ کاریم کننگ ءِ، کراچی ، حیدرآباد، سکھر ، لاڑکانہ ، میر پور خاص و نواب شاہ ٹی سیف سٹی ڈٹ خلنگ انگ ءِ، پشاور اٹی سیف سٹی ڈٹ منظور مسنے، بروک آ ریسہ ٹی ڈیرہ اسماعیل خان ، بنوں، لکی مروت اٹی سیف سٹی ڈٹ خلنگک۔ حوال اٹی پاننگاکہ گوادر سیف سٹی ڈٹ ءِ زوت پورو کننگک وخت اس کہ قومی شاہراہ این 25 و قومی شاہراہ این 40 آ واقع غٹ اہم شار تیٹی سیف سٹی ڈٹ خلنگک۔ حوال اٹی پاننگاکہ اسمگلنگ نا توننگ نا بابت چندی شاہراہ و پول آتیا ڈیجیٹل انفورسمنٹ اسٹیشن جوڑ کننگ انگ ءِ ، ملک انا اہم شارتا کیبی ٹی ساڑی غٹ غیرکانودی تفوک آتے چٹفنگ نا بابت بنجائی و صوبائی حکومت آک کارروائی کننگ ءُ۔ حوال اٹی پاننگاکہ مچ آملک اٹی پنڈوک آتا برخلاف ہم کریک ڈاؤن کننگ انگ ءِ و داوڑنا تے پیشن نا ملک سفر آن توننگ نا بابت ہم گام گیج کننگ انگ ءِ، اسلام آباد اٹی فارنزک سائنس ایجنسی اس جوڑ کننگانے وخت اس کہ پنجاب اٹی فارنزک سائنس ایجنسی ءِ پین گچین کننگ انگ ءِ۔ دیوان اٹی بنجائی وزیر کانود وانصاف اعظم نذیر تارڑ ، بنجائی وزیر داخلہ محسن رضانقوی، بنجائی وزیر اقتصادی امور احد خان چیمہ، بنجائی وزیر حوالکاری و شینکاری عطاء اللہ تارڑ، وزیراعظم نا سلاہکار بین الصوبائی رابطہ رانا ثنا ءاللہ ، وزیر مملکت داخلہ طلال چوہدری ، وزیراعلیٰ خیبرپختونخوانا سلاہکار حوالکاری بیرسٹر سیف، وزیرداخلہ گلگت بلتستان شمس الحق لون، وزیرداخلہ آزاد کشمیر کرنل ریٹائرڈ و قارنون، ہر چار آ صوبہ، گلگت بلتستان و آزاد کشمیر نا چیف سیکرٹریک و انسپکٹر زجنرل پولیس، چیف کمشنراسلام آباد کیپیٹل ٹیریٹری ، آئی جی اسلام آباد پولیس و ایلو تعلقدار سرکاری ادارہ غاتا آفیسر آک بشخ ہلکر۔
