اسلام آباد۔ 18 اپریل (اے پی پی) نائب وزیراعظم و وزیرخارجہ سینیٹر محمد اسحاق ڈار تون پاکستان نا سرکاری دورہ غا بروک شنگھائی کمکار تنظیم (ایس سی او) نا سیکرٹری جنرل نورلان یرمیک بائیف جمعہ نادے آ داڑے اوڑدہی کرے۔ نائب وزیراعظم یرمیک بائیف ءِ ایس سی او نا پوسکن آ سیکرٹری جنرل نا وڑاٹ تینا زمواری تے سنبھالنگ آ مبارکبادی تس و اودے شنگھائی کمکار تنظیم نا سیکرٹریٹ کن پاکستان نا کنڈآن پورو کمکاری نا باوری کرفے۔ دفترخارجہ نا رداٹ نائب وزیراعظم شنگھائی کمکار تنظیم نا باسک ملک آتون پاکستان نا خڑکی تعلقداری آ زور شاغسا شنگھائی جوزہ ءِ برقرار تخنگ کن پاکستان نا عزم انا درشانی ءِ کرے۔ اوعلاقائی امن و سلامتی ءِ مون آ دننگ کن شنگھائی کمکار تنظیم نا لائخی نا ستاءِ کرے۔ نائب وزیراعظم محمد اسحاق ڈار دارداٹ شنگھائی کمکار تنظیم نا میکانزم خاص وڑاٹ ہڑتوم آ کنڈآتا واپار، ٹرانسپورٹ و رابطہ غاتا بشخ آتیٹی تین پہ تینی وڑاٹ فائدہ مند کمکاری کن پاکستان نا تعمیری شمولیت نا درشانی ءِ کرے۔ سیکرٹری جنرل یرمک بائیف مہمانداری آ پاکستان نامنت واری ءِ ہرفے و شنگھائی کمکار تنظیم نا سرجزآتیٹی پاکستان نا فعال شمولیت نا ستاءِ کرے۔ اواکتوبر 2024اٹی اسلام آباد اٹی ایس سی او نا باسک ملک آتا حکومت نا سروک آتا کونسل نا دیوان نا پاکستان نا سرسہبی اٹ مہمانداری نا ستاءِ کرے۔ بیان نا رداٹ ہڑتوم آ شرفمندآک شنگھائی کمکارتنظیم نااولیت آتیا فائدہ ئی گپ وتران کریر۔ اوایس سی او نا رداٹ ٹرانسپورٹیشن و لاجسٹک، انرجی سیکورٹی، فوڈ سیکورٹی، جان جوڑی، ای کامرس و گرین اکانومی نا بشخ آتیٹی کمکاری ءِ مون آ دننگ نا وڑوڈول و ذریعہ غاتیا سجفیر۔ ایس سی او 15 جون 2001آن جوڑ اسہ دہ باسکی بین الحکومتی بین علاقائی تنظیم اسے۔ پاکستان 2005 اٹی ایس سی او آبزرورجوڑ کرے و جون 2007 اٹی پورو رکنیت دوئی کرے۔ پاکستان شنگھائی کمکار تنظیم ناپلیٹ فارم آ علاقائی امن، سوگوی و راجی و اقتصادی شونداری نا مخ تف ءِ۔
