کوئٹہ۔ 18اپریل (اے پی پی) بنجائی وزیر ڈٹ بندی و شونداری احسن اقبال پارینے کہ پاکستان چارمیکو وار بال کننگ کن تیار ءِ ، داسہ ننے آٹی ءِ بال کروئی ءِ کہ تموئی ءِ، 2018ء نا سانحہ غان پاکستان نا بال کروک آ جہاز تماسس، اونا سوب آتے پہہ مننگ نا گرج ءِ، صوبائی حکومت تون اورای اٹ بلوچستان اٹی انفراسٹرکچر، تعلیم، جان جوڑی، کشت وکشار، مائننگ نا بشخ آتے پوسکن آوڑتتون ہم گرنچ کینہ، بنجائی حکومت اڑان پاکستان ڈٹ انا کمک اٹ بلوچستان نا الس ءِ پسماندگی نا تہاری تیان شونداری نا روشنائی ٹی اتنگ خواہک، پاکستان ءِ مون تروک ویل آتا بنداوی سوب آتے پٹسا اوفتا درمان ءِ کننگے وملک انا شونداری و شونہالی کن امن وایمنی ، سیاسی سوگوی وپالیسی تا چرجوئی برقرار سلے تو نن گچینی زرگزران والا ملک آتیٹی اوار مننگ کینہ۔ داخیال آتا درشانی ءِ او جمعہ نادے آبنجائی وزارت ڈٹ بندی نا کنڈآن اڑان پاکستان نا صوبائی سلابتی ورکشاپ آن تران کرساکرے۔ داوخت آ وزیراعلیٰ بلوچستان میر سرفرازبگٹی ، صوبائی وزیرآک و اسمبلی نا باسک بخت محمد کاکڑ، سردار کوہیار ڈومکی، میر عاصم کرد گیلو، مینا مجید بلوچ، عبدالمجید بادینی، محمد خان لہڑی، میر لیاقت لہڑی، حاجی ولی محمد نورزئی، نوابزادہ زرین خان مگسی، خیرجان بلوچ، ڈاکٹر نواز کبزئی، ایڈیشنل چیف سیکرٹری ترقیات حافظ عبدالباسط ، سیکرٹری تعمیرات و مواصلات لعل جان جعفر، سیکرٹری ایری گیشن حافظ عبدالماجد ، پرنسپل سیکرٹری وزیراعلیٰ بابرخان، عمران خان، نیاز احمد نیچاری ، شفقت انور شاہوانی، داؤد خان بازئی، سید ظفربخاری، و ایلوفک ہم ساڑی ئسر۔ ایڈیشنل چیف سیکرٹری ترقیات حافظ عبدالباسط بشخ ہلوک آتے بخیراٹ پارسا پارے کہ ورکشاپ نا مسخت اڑان پاکستان نا قومی وژن اٹی صوبائی کہول آ چندی بشخ آتیٹی اوار مننگ ءِ، پاکستان نا زرگزران ءِ ٹریلین ڈالراسکان دننگ کن گچین گام گیج کننگک۔ ورکشاپ نا بشخ ہلوک آتیان تران کرسا بنجائی وزیر ڈٹ بندی احسن اقبال بلوچستان حکومت نا منت واری ءِ ہرفساپارے کہ صوبائی حکومت اڑان پاکستان نا صوبائی سلابتی ورکشاپ اس اڈتسنے۔ اڑان پاکستان 2035ء ڈٹ انا رداٹ پاکستان نا زرگزران ءِ ٹریلین ڈالراسکان سرکننگ ءِ۔ ہراتم 2013ء نا گچین کاری تیان پد نن شونداری نا سفر نا بناءِ کرین تو مشکل حالیت مون تروک ئس ولے داسہ ڈٹ بندی اسے نا رداٹ نن اومیت نا روشنائی تالان کریسن و سرسہبی اٹ تینا ہدف آتے دوئی کریسن۔ ہراتم ہمووخت پاکستان ءِ سرسہبی اقتصادی شونداری نا کسر آ شاغنگ کریکہ تو داسہ ہم ملک ءِ شونداری نا کسر آ شاغنگ کیک۔ اوپارے کہ 2013ء ٹی 18 گھنٹہ لوڈشیڈنگ مسکہ، ہڑدے دھماکہ مسکہ، کراچی ٹی نظام زند ژند مسوسس ولے نن ولداہم کاریم کرساکرین، ہراتم ننا حکومت بس تو نن حکمت عملی اٹ کاریم کرین و 2017 آن 2018ٹی بلوچستان امن و ایمنی پورو قائم مسوسس، سد آ کلومیٹر سڑک جوڑ مسوسس، انفراسٹرکچر نا سوب آن بلوچستان اٹی حالیت آتے نارمل کننگ اٹ بھلو کمک اس رسینگا۔ اوپارے کہ ننا حکومت آن مست ہمووخت آ گوادر نا کوئٹہ اسکان ڈغاری کسر الوکہ مخلوق کچہ انگا ٹریک آ کیہی گھنٹہ سفر کریکہ، ولدا نن کیہی سد کلومیٹر روڈ تفین۔ داسڑک نا تفنگ و ہن و براٹی ودکی آن چندی علاقہ غاتیٹی روزگارکاروبار اٹی ودکی مس۔ ہرافک دہشت گردی کننگ ءُ اوہموتم ہم دا ڈٹ انا مخالف ئسر۔ ایف ڈبلیو اونا 43 ورناشہید مسر۔ دافک خواتورہ کہ مخلوق باشعور مرے۔ اوپارے کہ بلوچستان نا الس ءِ تہاری آن روشنائی ٹی اتنگ خوانہ بلوچستان اٹی چندی ڈٹ آتیاکاریم مس و داسہ ہم چندی علاقہ غاتیٹی ڈٹ آتیاکاریم برجاءِ، ننا وژن 2035 ٹی بلوچستان اٹی تعلیم، جان جوڑی، انفراسٹرکچر، کشت وکشار، چاگڑدتون اوار چندی بشخ آتا بابت اصلاحات اوار ءِ۔ بلوچستان نا پوٹینشل معدنیات نا ءِ ۔ بنجائی حکومت داجاگہ نا مخلوق ءِ تعلیم ترفنگ ءِ تانکہ ہندا مخلوق تینا صوبہ نا شونداری کن کاریم کننگ کیر۔ ننا حکومت بلوچستان و خیبرپختونخوا نا پوسکن آ اوار مروک ضلع غاتیکن 5000 اسکالر شپ نا پڑو کرے، و بلوچستان نا وکیل آتیکن پیشن نا ملک تعلیم کننگ کن اسکالر شپ جاری کننگا۔ بنجائی وزیر پارے کہ 2013آن 2018اسکان سوشیواکنامک پروگرام آ کاریم کرین۔ پاکستان شونداری ٹی مون آ ہناکہ کہ 2018ٹی اسہ شکست اس مس و پاکستان نا مسٹ میکو بال کروک آ جہاز تما۔ اوپارے کہ دُن تو آجوئی دوئی کروک ہشت عشرہ مننگ والا ءِ ولے اگہ نن ملکی شونداری نا موازنہ ءِ ایلو دنیا تون کینہ تو نظربریک کہ نن پدی سلیسونن۔ داویل آتے پہہ مننگ نا گرج ءِ ہرافتا سوب آن نن ایلو دنیا غان پدی رہینگان انتئے کہ پاکستان ذہانت، لائخی تون اوار اسہ بابت ہم کس اسے آن پدی اف۔ ننے ناجوڑی نا ماس اسکان سرمننگ نا گرج ءِ۔ نن داڑکن سازگار چاگڑد اس جوڑ کننگ نا کوشست کننگ اُن۔ شونداری و شونہالی کن سیاسی سوگوی و پالیسی تیٹی تسلسل نا گرج ءِ۔ اسہ جاگہ اس ہم دادرور ملیپک کہ اسہ ملک اس ہم سیاسی نزوری اتون شون ہلکنے۔ بھارت، بنگلہ دیش وملائیشیا ٹی پالیسی تا سوب آن شونداری مس۔ 2022اٹی زرگزرانی حالیت بھاز سخت ئس ولے ننا 16 تُو انا حکومت پاکستان ءِ ڈیفالٹ آن بچفے۔ دانا ہچ ءُ جاگہ اس درورملیپک کہ اسٹاک ایکسچینج نا انڈیکس 40 ہزار آن اسہ لکھ 15 ہزار آ کائے۔ پاکستان چارمیکو وار بال کننگ کن تیار ءِ داسہ سوج دادے کہ دادے بال کننگ کن اِلیرہ یا اودے بِٹیرہ ولے ای پیدوار کیوہ کہ ننتون بال کروک آنا تمنگ نا ہچ ءُ گنجائشت اس اف۔ سیاسی بے یقینیک ننے پدی خسار اگہ نن پورو ہم گرنچی اتون مون آ کانہ تو نن ایشیانا صف اول نا ملک آتیٹی اوار مرینہ۔ ننے تینا غٹ لائخی تے مون آاتنگ تون ایکسپورٹ اٹی ودکی کروئی ءِ پاکستان نا ہر وزارت، ہر صوبہ و ہرشاری ءِ تینا علاقہ نا شونداری وشونہالی کن اڑان پاکستان نا وژن ءِ تینا کروئی مریک۔ اوپارے کہ گوادر بندرگاہ ایکسپورٹ نا درگہ ءِ۔ بلوچستان نا محل وقوع نا پاکستان نا ایکسپورٹ لاجسٹک اٹی اہم کڑداسے۔ ریکوڈک بھلا اہم ڈٹ ءِ۔ ریکوڈک ڈٹ اولیکو پڑی ءِ ولدا ملک اٹی چرجوئی اتون زرکاری مریک۔ بلوچستان پاکستان نا شونہال صوبہ مریک۔ صوبائی و بنجائی حکومت ورناتے انفارمیشن ٹیکنالوجی نا اسکل تننگ ءُ۔ گوادر ءِ نیشنل گریڈ تون لنک کننگ اُن۔ بلوچستان اٹی توانائی ءِ مون آدننگ ننا اولیت ءِ، وزیراعظم نا وژن ءِ کہ چمن، کوئٹہ کراچی، شاہراہ ءِ اِرارویہ کینہ، بلوچستان اٹی روڈ انفراسٹرکچر نا شونہالی اتنگ نا کوشست کننگ اُن۔ بنجاو صوبہ اواری اٹ بلوچستان نا پسماندگی نا چٹفنگ کن کاریم کننگ ءُ۔ پاکستان نا 20 پدسلوک انگا ضلع غاتیٹی بلوچستان نا 11 ضلع ءُ۔ داضلع غاتا شونداری کن ٹارگٹڈ گام گیج کننگک۔ بروک آ دے تیٹی غٹ آن زیات سیبوانسانی وسیلہ غاتیامریک۔ اڑان پاکستان نا رداٹ 64 ارب روپئی آن جان جوڑی نا ڈٹ ءِ ہرانا کمک اٹ پاکستان ءِ زڑدوئی فری کننگ ءِ۔ 38 آن 40 درسد چناتے نشوونمابے پورو سلک۔
