کوئٹہ۔ 18 اپریل (اے پی پی) بنجائی وزیر ڈٹ بندی، شونداری و اصلاحات سینیٹر احسن اقبال و وزیراعلیٰ بلوچستان میر سرفرازبگٹی پارینوکہ بنجائی حکومت بروک آ بنجائی پی ایس ڈی پی ٹی بلوچستان ءِ ایلو صوبہ غاتیان زیات فنڈ ایتک، اڑان پاکستان کن غٹ صوبہ غاتا اسہ وڑ شونداری المی ءِ، 2018نا سانحہ 1971ء نا سانحہ نا کچ بھلو سانحہ اس ئس ہراپاکستان ءِ سیاسی تنکی نا کنڈآ درے، ہرادے صادق وامین پاننگااو190 ملین پاؤنڈ نا ڈاکہ خلک، پی ٹی آئی ءِ ریلی و برانز نا جاگہ غا تینا لیڈر نا محاسبہ ءِ کروئی مرے۔ حکومت بلوچستان اڑان پاکستان نا پارٹنر ءِ اوڑتون اواری اٹ ڈٹ ءِ پورو ی اسکان سرکینہ ، ننا فوکس لس بندغ مریک۔ داخیال آتا درشانی ءِ اوفک جمعہ نادے آ کوئٹہ ٹی اسیجائی پریس کانفرنس آن تران کریر۔ داوخت آ صوبائی وزیر آک و اسمبلی نا باسک بخت محمد کاکڑ، سردار کوہیار ڈومکی، میر عاصم کردگیلو، مینامجید بلوچ، عبدالمجید بادینی، محمد خان لہڑی، میر لیاقت لہڑی، حاجی ولی محمد نورزئی، نوابزادہ زرین خان مگسی، ترجمان حکومت بلوچستان شاہدرند و ایلوفک ہم ساڑی ئسر۔ بنجائی وزیر احسن اقبال پارے کہ اڑان پاکستان نا رداٹ پاکستان نا زرگزران ءِ ٹریلین ڈالر اسکان دینہ، پاکستان اٹی 2010 ء ٹی مروک آ آئین سازی آن پد صوبہ غاتے وتواجہی ملا وداسہ اڑان پاکستان کن صوبہ غاتا کڑد وخت انا گرج ءِ۔ اوپارے کہ بلوچستان پاکستان نا اہم صوبہ ءِ آخبت نا بابت معدنیات نا سوب آن بلوچستان ہزگار انگا صوبہ جوڑ مننگ کیک۔ کچھی کینال نا کمک اٹ بلوچستان سرسوز مننگ کیک، بلوچستان نا ورناک لائخ ءُ، صوبہ نا شونداری و ڈٹ آتے ہم گرنچ کینہ۔ اوپارے کہ بروک آ بنجائی بجٹ اٹی بلوچستان نا بشخ زیات تخنگانے بلکن بروک آ بجٹ اٹی ایلو صوبہ غاتیان زیات بجٹ بلوچستان ءِ ایتنہ۔ اوپارے کہ کوئٹہ ژوب ڈیرہ اسماعیل خان ، کوئٹہ کراچی شاہراہ تون اوار ایلوتا تفنگ آن صوبہ شون ہلیک۔ میر سرفرازبگٹی نا کماشی ٹی بلوچستان بال کروک ءُ صوبہ اس جوڑمریک۔ داوخت آمیر سرفرازبگٹی پارے کہ بلوچستان اڑان پاکستان نا پارٹنر ءِ اوفتے تون اواری اٹ ڈٹ آتے پوروی اسکان سرکینہ ننا چکار لس بندغ مریک۔ داوخت آصحافی تا سوج آتا ورندی ءِ ترسا احسن اقبال پارے کہ بلوچستان اٹی امن و ایمنی نا بحالی کن کاریم کینہ، شونداری ڈٹ آتے توننگ کن دہشت گردی کننگا، گوادر روڈ آ 43 ایف ڈبلیو اونا کارندہ غاتے شہید کننگا، دا دہشت گردآک انت اکن استاد، مزور و کودک مخلوق ءِ ٹارگٹ کننگ ءُ، نن دافتا گوازی ءِ بے سہب کینہ، بلوچستان نا شونداری ءِ کس اس توننگ کپک ولے داشونداری ہموتم مریک ہراتم غٹ اوار چلینگرہ۔ اوپارے کہ 2014ٹی ٹریک آ ئس ہرانا جہانی ادارہ غاک پک کریر۔ 2018نا سانحہ 71 نا کچ بھلو سانحہ اس ئس پاکستان ءِ سیاسی تنکی نا کنڈآخسنگا۔ برطانیہ ملک ریاض آن 190 ملین پاؤنڈ ضبط کرے کہ دا پاکستان نا الس نا پیسہ غاک ءُ ولے او او زر ءِ پدی کننگ نا جاگہ غا ملک ریاض ءِ تننگ نا کوشست کرے ہرا الس خراج آ ڈاکہ اسے، اوپارے کہ پی ٹی آئی والاک کرپشن نا برخلاف ءُ ہراسٹ ءِ دُز و داڑیل پارہ ولے اوفتے تینا لیڈر نا دُزی نظربفننگ ءِ، پی ٹی آئی نا فرض ءِ کہ تینا لیڈر نا محاسبہ ءِ کے۔
