اسلام آباد۔17اپریل (اے پی پی):مزن وزیر محمد شہباز شریف ءَ ملک ءِ معیشت ءَ را سرجمی ءَ ڈیجیٹل کنگ ءِ واستہ سیادی داروکیں وزارت ءُ ادارگ آناں کار ءِ ذمہ واری دیگ ءِ وھد ءَ گوشت کہ ملک ءِ معیشت ءَ را گہتر کنگ ءُ غیر رسمی معیشت ءَ را ھلاس کنگ حکومت ءِ ریفارم ایجنڈا ءِ کلیدی بھر اَنت۔ ملک ءِ معیشت ءِ ڈیجیٹل کنگ ءِ ھاتر ءَ یک متحرکیں کارگس ءِ زوت جوڑ کنگ بہ بیت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءِ سروکی ءَ اسلام آباد ءَ ملکی معیشت ءِ ڈیجیٹلائزیشن ءِ ھوالگ ءَ چار ءُ تپاسی دیوان برجم دارگ بوت۔ مزن وزیر ءَ سیادی داروکیں واکدار آناں ملکی معیشت ءِ ڈیجیٹلائزیشن ءِ واستہ ترندی ءَ یک متحرک ورکنگ گروپ ءِ جوڑ کنگ ءِ ہدایت کت ءُ گوشت کہ پاکستان ءِ دیمروئی ءِ واستہ نظام نوکیں لیکہ آنی سر ءَ جوڑ کنگ بوھگ ءَ انت۔ مزن وزیر ءَ رمضان پیکیج ءِ ڈیلیوری ءِ واستہ ڈیجیٹل والٹ ءِ کامیابیں نظام ءَ را ساڑات ءُ گیش شوبگ آنی تہ ءَ کارمرد کنگ ءِ ہدایت کت۔ دیوان ءَ گوشگ بوت کہ گوستگیں روچاں مزن وزیر ءِ ہدایت ءِ پد ءَ سرجمیں ڈیجیٹل رنگ ءَ رمضان ءِ پیکج الس آنی گور ءَ سر کنگ بوت۔ دیوان اکانومی ءِ سروکی ءَ بوت ڈیجیٹلائزیشن ءِ واستہ جاری گامگیج ءُ آیوکیں گامگیج ءُ سوج آنی بابت ءَ بریفنگ دیگ بوت۔ دیوان ءَ گوشگ بوت کہ اسلام آباد ءَ آئی سی ٹی ایپلی کیشن ءِ بندات کنگ بوتگ، ایشی ءِ تہ ءَ 150 ءَ چہ گیش سرکاری ازمت دست کپ اَنت۔ دیوان ءَ گیش سرپدی دیگ بوت کہ راست گیٹ وے ءِ وسیلگ ءَ ادائیگی ءِ کساس ءَ مزنیں گیشی بوتگ وھدیکہ حکومت اسٹیٹ بینک ءِ کمک ءَ روچ ءِ لین دین ءَ ایشی ءِ کارمردی ءَ را گیش کنگ ءِ واستہ گامگیج آنی تہ ءَ ترندی کنگ ءَ اِنت۔ دیوان ءَ حکومت ءِ 5 نکاتی ایکشن پلان ءِ بابت ءَ ھم سرپد کنگ بوت۔ دیوان ءَ سرپد کنگ بوت کہ حکومت ءَ ڈیجیٹل ادائیگی ءِ یکجا کنگ ءَ را دل یکیمی کنگ ءِ واستہ گامگیج چست کتگ، نقد ءِ بدل ءَ ڈیجیٹل ادائیگی ءِ دلبڈی ءِ واستہ خریدار ءُ کاروباری مردم آناں جتا جتائیں آسراتی پجاری کتگ، سرکاری ادائیگی ءَ را سرجمی ءَ ڈیجیٹل کنگ ءُ اے درگت ءَ سرپدی پیداک کنگ ءِ ھوار ڈیٹا ءِ نگرانی ھم کنگ بوتگ۔ دیوان ءَ اے گپ ءِ ھم سرپدی دیگ بوت کہ بنجاھی حکومت ءِ سرجمیں سرکاری ادائیگی ھوار پگار ءُ ایندگر بلنگ ڈیجیٹل سسٹم ءِ چیر دستی ءَ کنگ بوھگ ءَ انت۔ مزن وزیر ءَ اے درستیں گامگیج آنی سر ءَ عمل کنگ ءُ نگرانی ءِ واستہ ترندی ءَ کارگس جوڑ کنگ ءِ ہدایت کتگ۔ دیوان ءَ بنجاھی وزیر احد خان چیمہ، علی پرویز ملک، شزہ فاطمہ خواجہ، وزیر مملکت بلال اظہر کیانی، گورنر اسٹیٹ بینک جمیل احمد ءُ سیادی داروکیں مزنیں کارندہ آں بہر زرتگ ات۔
