اسلام آباد۔17اپریل (اے پی پی): بنجاھی وزیر اھوالکاری ءُ شنگکاری عطا اللہ تارڑ ءَ گوشت کہ خیبر پختونخوا ءِ ورنا آں مدام مسلم لیگ (ن) ءِ حمایت کتگ ءُ ہر گرانیں وھد ءَ پارٹی ءِ بیرک برز ءَ داشتگ۔ مسلم لیگ (ن) ءِ باسک ایوک ءَ سیاسی نہ انت بلکیں نظریاتی مشن ءِ بہر انت ءُ ملک ءِ دیمروئی ءُ ایمنی ءِ واستہ آہانی جزم مھکم انت ۔ یک نیمگے 28 مئی ءِ مردم اَنت کہ آہاں ملک ءِ دفاع ناقابل شکست جوڑ کتگ ءُ دومی نیمگ ءَ 9 مئی ءِ انارکیسٹ گل کہ آہاں وتی ملک ءِ سرا اُرش کتگ۔ اے پاکستان ءِ دژمن اَنت۔ اے ھیالانی درشانی آئی ءَ ن لیگ ءِ ورنا کوآرڈینیٹر، ڈویژنل، ضلعی ءُ تحصیل تک ءِ افسر آنی دیوان ءَ گوں تران کنان ءَ کت۔ بنجاھی وزیر ءِ اھوالکاری ءَ گوشت کہ خیبر پختونخوا ءِ دلیر، دلیر ءُ وپاداریں ورنا آں مدام پارٹی ءِ بیرک برز ءَ داشتگ ءُ ھمک مشکلیں وھد ءَ مسلم لیگ ن ءِ سرجمی ءَ کمک کتگ ۔ عطا اللہ تارڑ ءَ مسلم لیگ ن ءِ راہشون اختیار ولی خان ءَ را شگر ءُ منت گپت ءُ گشتگ کہ اگاں کسے ءَ را اے حق است کہ آئی ءَ را ’’گْرانیں وھد ءَ ہمراہ‘‘ گشگ بہ بیت گڑا آ اختیار ولی انت کہ آئی ءَ ہر مشکلیں وھد ءَ پارٹی ءِ دفاع کتگ۔ تحریک انصاف ءِ فاشزم ءِ زمانگ ءَ وہدے ضمنی گچین کاری بوتگ انت گڈا پنجاب ءِ نیمگ ءَ چہ 15 سیٹ گرگ ءِ وشی یک نیمگ ءَ ءُ نوشیرہ ءَ چہ یک سیٹ ءِ گرگ ءِ وشی بے درور بوتگ انت۔ ضمنی گچین کاری ءَ چہ نوشیرہ ءَ مسلم لیگ ءِ سوبمندی ہما وہد ءَ مزنیں سوبمندی یے بوتگ کہ اودا مخالفین بے سریں گپ ءُ تران کنگ ءَ اتنت۔ عطا اللہ تارڑ ءَ ورنا آں گوں تران کنان ءَ گوشت کہ آ وت ءَ ایوک ءَ سیاسی باسک مہ لیک اَنت بلکیں یک نظریاتی مشن ءِ بھر بہ لیک اَنت۔ بنجاھی وزیر اطلاعات عطا اللہ تارڑ ءَ مسلم لیگ ءِ ھاسیں سوبمندی آنی سر ءَ رژنائی ءِ شنگ کنگ ءَ گوشت کہ اے ملک ءَ اگاں کسے ءَ ھزمت ءُ دیمروئی ءِ سیاست کتگ گڑا آ مسلم لیگ اِنت۔ ھر جاگہ کہ دیمروی ءُ دیمروی ءِ نشانی گندگ بنت محمد نواز شریف ءُ مسلم لیگ (ن) ءِ مُہر گندگ بیت۔ مرچی خیبر پختونخوا ءَ موٹروے ءِ نیٹ ورک ایر کنگ بوتگ ءُ ہر منصوبہ ءِ سرا میان نواز شریف ءِ مہر ءِ سرا نبشتہ اِنت۔ بنجاھی وزیر ءِ اھوالکاری ءَ گوشت کہ ما 28 مئی ءَ تکبیر ءِ روچ ءَ ایں ۔ مئے سروک ءَ ایٹمی تراک کنگ ءَ ملک ءِ دفاع بے شکست کتگ ، وھدے کہ اے آشوبیں گل 9 مئی ءِ انت کہ آئی ءَ وتی ملک ءِ سرا اُرش کتگ ءُ ملک ءِ دفاع ءَ تاوان داتگ۔ اے بدبختیں مردماں پہ وتی سیاسی نفع ءَ کیپٹن کرنل شیرخان شہید ءِ بُت بے حرمتی کتگ۔ آئی ءَ گْوشتگ کہ 9 مئی ءِ وئیل ءَ پد من وت سوابی ءَ شتگ آں ءُ کیپٹن شیرخان شھید ءِ برات انورلالا ءَ گوں گند ءُ نند کتگ ءُ وتی مزن برات ءِ بُت ءِ ایراد گرگ ءِ سر ءَ آئی ءَ چہ پھلی لوٹ اِتگ۔ بنجاھی وزیر ءَ کیپٹن شیر خان ءِ بہادری ءِ ذکر کنان ءَ ہندوستان ءِ بریگیڈیئر مہندر پرتاپ سنگھ ءِ حوالہ داتگ کہ آئی ءَ کیپٹن شیر خان ءِ بہادری ءِ توسیپ کتگ ءُ آئی ءِ لاش ءِ ہمراہی ءَ نمدی یے دیم داتگ ءُ گشتگ کہ آ یک انچیں ورنا یے بوتگ کہ آئی ءِ بہادری ءِ ستا کنگ بہ بیت۔ بنجاھی وزیر اطلاعات ءَ گشتگ کہ خیبر پختونخوا ءَ تحریک انصاف ءِ 11 سال ءِ حکومت ءِ باوجود آ سی ٹی ڈی فورس ءِ جوڑ کنگ ءَ سوبین نہ بوتگ، سیف سٹی پروجیکٹ ءُ ہچ وڑیں فرانزک لیب ءِ جوڑ کنگ ءَ ہم سوبین نہ بوتگ۔ خیبرپختونخوا ءَ مہلوک ءِ گہتری ءِ واستہ ہچ وڑیں پلان نیست ۔ اودا جان سلامتی ءِ پڑ ءَ پرچا دلگوش دیگ نہ بوتگ؟ پرچا امن ءُ ایمنی ءِ نیمگ ءَ دلگوش دیگ نہ بوتگ؟ ناشرکارانی حلاف ءَ گپ جنت گڑا علی امین گنڈاپور ءِ پاد لرز اَنت، تحریک انصاف ءِ مردم نسلاں چہ غلام بوتگ اَنت ءُ گُلام مان اَنت۔ اگاں ما ملک ءِ گوما دل مخلص ایں گڈا ناشرکارانی ھلاپ ءَ الم ءَ گپ بہ جن ایں ۔ پشاور ءَ بوتگیں وئیل آنی نمونہ انگت ءَ فرانزک ءِ واستہ لاہور ءَ دیم دیگ بنت۔ وزیر ءِ اھوالکاری ءَ اے جست چست کت کہ اگاں نیت جوان بوتیں گڈا مرچی خیبر پختونخوا ءَ دیمروئی منصوبگ گندگ بوتگ انت۔ آئی ءَ گوشت کہ نیشنل فنانس کمیشن ءِ ایوارڈ ءِ چیر دستی ءَ خیبر پختونخوا ءَ را ارباں کلدار رستگ بلے ایشانی واستہ ھچ وڑیں کارآمد گندگ نہ بوتگ۔ تحریک انصاف ءِ استیں جاورانی سرا چمشانک دیان ءَ آئی ءَ گشتگ پارٹی گروپانی تہا بہر ءُ بانگ بوتگ ۔ علی امین گنڈاپور، جنید اکبر، ءُ شیر افضل مروت ءَ جتا جتائیں گل جوڑ کتگ کہ اے گپ ءِ ثبوت اِنت کہ آ نہ ملک ءِ وفادار اَنت ءُ نہ وتی پارٹی ءِ وفادار اَنت۔ بنجاھی اطلاعات ءِ وزیر ءَ مزن وزیر شہباز شریف ءِ سروکی ءَ گوستگیں سال ءِ تہ ءَ معیشت ءِ زندگ کنگ، مہنگائی ءِ کمی ءُ بجلی ءِ نرخ آنی تہ ءَ کمی ءِ واستہ چست کتگیں گامگیج آنی ذکر کت ءُ گوشت کہ مرچی میاں اوستمانی ادارگ پاکستان ءِ معیشت ءِ توسیپ ءَ کنگ ءَ اَنت کہ ایشی ءَ را ایوک ءَ ٹیم ورک، وژن ءُ مخلصیں سروکی ءِ وسیلگ ءَ ممکن بوتگ۔ آئی ءَ اقتصادی برجائی ءِ سفر ءَ آئی ءِ گوما اوشتگ ءِ واستہ جنرل عاصم منیر ءِ کرد ءَ را ھم ساڑات۔ آئی ءَ گوشت کہ ما ڈیفالٹ ءِ کش ءِ سر ءَ آں، مزن وزیر ءَ ھما مردمانی واھشت ناکام کت اَنت کہ آ ملک ءِ ڈیفالٹ ءِ گپ ءَ کنگ ءَ اَنت۔ بنجاھی وزیر ءَ گوشت کہ پاکستان ءَ شنگھائی کوآپریشن آرگنائزیشن ءِ دیوان ءِ برجم دارگ، 12 مزن وزیر آنی پاکستان ءِ تر ءُ تاب، پاکستان ءَ چیمپئنز ٹرافی ءِ وڑیں جھان ءِ مراگش آنی برجم دارگ ایشی ءِ ثبوت انت کہ پاکستان راستیں کش ءُ گور ءَ روگ ءَ انت۔ وتی کلوہ ءِ گڈسرا عطا اللہ تارڑ ءَ گشتگ کہ مسلم لیگ ن ءِ سروکی ءُ باسک ملک ءُ قوم ءِ وفادار انت ۔ خیبر پختونخوا ءِ ھمک ضلع ءَ تر ءُ تاب کنان ءَ الس ءَ را راستی آنی بابت ءَ سرپد کنگ بیت۔ آئی ءَ ورنا آنی سر ءَ زور پر دات کہ آ میدان ءَ بیا اَنت وتی ھلک ءَ برو اَنت ءُ ن لیگ ءِ کلوہ ءَ شنگ ءُ تالان بہ کن اَنت۔ خیبر پختونخوا ءِ دراہیں ضلع آنی نمائندگاں اے دیوان ءَ بہر زرتگ ات۔
