لاہور۔14اپریل (اے پی پی): برطانیہ ءِ پارلیمنٹ ءِ باسک محمد افضل خان ءَ گوں وفاقی تہی کارانی وزیر محسن نقوی ءَ گند ءُ نند کت۔ اے گند ءُ نند پاک برطانیہ ءِ سیادی ءَ را دیمروئی دیگ ءُ برطانیہ ءَ پاکستانی کمیونٹی ءِ دیم ءَ اوشتاتگیں جیڈھ آنی گیواری ءِ ھوالگ ءَ ھیال ءُ لیکہ آنی مٹ ءُ بدلی ءِ موہ ءِ رنگ ءَ کار کنت۔ گند ءُ نند ءَ ناشرکاری ءِ گر ءُ دار ءَ برطانیہ ءِ کمک ءِ بابت ءَ ھم ھیال ریچی کنگ بوت۔ ناشرکاری ءِ استیں لہر ءُ ایشی ءِ ھلاپ ءَ چست کتگیں گامگیج آنی سر ءَ کسانیں گپ ءُ تران کنگ بوت۔ وفاقی وزیر داخلہ محسن نقوی ءَ پاک برطانیہ ءِ سیادی ءَ را مھکم کنگ ءِ تہ ءَ برطانیہ ءِ باسک افضل خان ءِ جوانیں کرد ءِ سر ءَ کوشست آناں ساڑات۔ وزیر داخلہ محسن نقوی ءَ لبرل پارٹی ءِ سروک ءُ پارلیمنٹ ءِ باسک افضل خان ءَ را برطانیہ ءَ گچین کاری ءِ سوبمندی ءِ سر ءَ مبارک بات دیگ ءَ گوشت کہ امیت انت کہ لبرل پارٹی ءِ سروکی ءَ پاک برطانیہ ءِ سیادی نوکیں بالاد ءَ سر بنت۔ آئی ءَ گیش گوشت کہ بازیں ملک ناشرکاری ءِ چیلنج آنی دیم ءَ انت، ءُ نوں وھد اتکگ کہ ناشرکاری ءِ ھلاپ ءَ کثیر جہتی میاں اوستمانی حکمت عملی جوڑ کنگ بہ بیت ءُ بے دیر کنگ ءَ گامگیج کنگ بہ بیت۔ محسن نقوی ءَ گوشت کہ انسداد ناشرکاری ءِ ھوالگ ءَ پاکستانی ادارگ آناں صلاحیت سازی ءُ تربیت ءِ واستہ برطانیہ ءِ کمک ءَ را اولی رنگ ءَ کناں۔ وزیر داخلہ ءَ گیش گوشت کہ برطانیہ ءَ پاکستانی آنی مزنیں کساسے نندوک انت، پاکستان ءِ گوما برطانیہ ءِ معیشت ءَ را مھکم کنگ ءَ پاکستانی کمیونٹی المی کرد پیلو کنگ ءَ انت۔ برطانیہ ءِ پارلیمنٹ ءِ باسک افضل خان ءَ گشتگ کہ ناشرکاری ءِ حلاف ءَ پاکستان ءِ قربانی آں ساڑاھاں ۔ آئی ءَ گوشت کہ پاک برطانیہ ءِ سیادی ءِ گیش گہتری ءِ واستہ وتی کرد ءَ دیم ءَ پیلو کناں۔
