اسلام آباد۔ 14 اپریل (اے پی پی) سعودی عرب اٹی پاکستان نا سفیر احمد فاروق پارینے کہ خلیجی کمکار کونسل نا ڈیہہ اٹی داوخت 55 لکھ آن زیات پاکستانی رہینگ انگ ءُ، ہرانئے بیرہ ہموجاگہ نا زرگزران نا بشخ ءُ بلکن پاکستان کن ہم زرگزرانی رداٹ تمبہ نا حیثیت تخرہ۔ دوشنبے نادے آ اوورسیز پاکستانیز کنونشن آن تران کرساکرے۔ اوپارے کہ اوورسیز پاکستانی تا ملکی زرگزرانی سوگوی ٹی بھا زاہم ءُ کڑد اسے، خاص وڑاٹ زرراہی تس نا کمک اٹ او پاکستان نا زرگزران نا سوگوی ٹی پدریسہ کڑد ادا کننگ ءُ۔ سفیر احمد فاروق مستی پارے کہ سعودی عرب نا بھلاتعمیراتی و شونداری ڈٹ آتیٹی زیات تر پاکستانی کارندہ غاک اوار ءُ، ہرا تینا خواری و لائخی تے اٹ ہموجاگہ نا انفراسٹرکچر اٹی نمان کڑد ادا کننگ ءُ۔ اوپارے کہ سعودی عرب و متحدہ عرب امارات اٹی ساڑی آسال تیٹی کیہی مثبت بدلی رونمامننگ ءِ۔ ہرافتیان پاکستانی تیکن پین وارخواہی ودی مننگ ءِ۔ دابدلی تیٹی مزور آتا حق انا رکھ، ویزہ پالیسی ٹی نرمی، و کسبکار بندغ آتیکن پوسکن روزگار نا وارخواہی اوار ءِ۔ سفیر مستی پارے کہ پاکستان داملک آتون ہڑتوم آکنڈآتا تعلقداری تے پین سوگو کننگ کن کوشست کننگ ءِ تانکہ ہموڑے رہینگوک پاکستانی تے زیات آن زیات آسودہی تننگ مرے۔ سفیر احمد فاروق داہیت آ زور شاغا کہ پیشن نا ملک روزگار نا وارخواہی تیان پبی فائدہ ہرفنگ کن ننے کسب و مہارت ءِ مون آ دننگ آ چکارکروئی مریک۔ اوپارے کہ جہانی منڈی ٹی مقابلہ ودنگ ءِ، و اگہ پاکستانی ورناک پوسکن آ خواست آتا رداٹ کسبکار مریر تو او نئے بیرہ تینا زند ءِ گچین کننگ کیرہ بلکن ملک اکن ہم نہادی سرمایہ پک مریرہ۔
