اسلام آباد۔ 14 اپریل (اے پی پی) اٹلی ٹی پاکستان نا سفیر علی جاوید پارینے کہ اوورسیز پاکستانی ملکی شونداری ٹی اہم کڑد ادا کننگ ءُ، اٹلی ٹی رہینگوک پاکستانیک اسہ ارب ڈالر آن زیات نا زرمبادلہ پاکستان آ مون تسنو ہراکہ ملک انا زرگزران کن اسہ بھلو کمکی اسے۔ داخیال آتا درشانی ءِ او دوشنبے نادے آ اوورسیز پاکستانیز نا اولیکو سالانہ کنونشن آن تران کرساکرے۔ اوپارے کہ اٹلی ٹی پاکستانی خوانوک آتا تعلیمی شونداری کن عملی گام گیج کننگ انگ ءِ۔ داتم اسکان 2500 آن زیات پاکستانی خوانوک آ مارتے پی ایچ ڈی نا ویزہ جاری کننگانے، ہرا تعلیم نا بشخ اٹی اسہ نمان سرسہبی اسے۔ اوپارے کہ اٹلی ٹی رہینگوک پاکستانی خوانوک آ مارک نئے بیرہ بڑزکو تعلیم دوئی کننگ ءُ بلکن او پاکستان نا مثبت دروشم ءِ ہم تالان کننگ ءُ۔ پاکستانی سفارت خانہ تعلیمی ویزہ غاتا جاری کننگ و خوانوک آ مارتا راہشونی کن پبی کمک فراوان کننگ ءِ۔ پاکستان نا سفیر علی جاوید پارے کہ اوورسیز پاکستانی تا ویل آتا ایسری کن سفارت خانہ نا کنڈآن ’’کھلی کچہری ‘‘ باقاعدہ اڈتننگ انگ ءِ۔ دا کھلی کچہری تا مسخت اٹلی ٹی رہینگوک پاکستانی تا غاوتے براہ راست بِننگ و دمدستی ایسر فراوان کننگ ءِ۔ اوپارے کہ سفارت خانہ السی رابطہ غاتے سوگو کننگ و کمیونٹی نا آسودہی کن ہرممکن گام گیج کننگ ءِ۔ اٹلی ٹی تعینات پاکستان نا سفیر علی جاوید پارے کہ اوورسیز پاکستانی ملک انا شونداری ٹی نمان کڑد ادا کننگ ءُ۔
