اسلام آباد۔ 14 اپریل (اے پی پی) پاکستان وجمہوریہ کوریا 15 آن 16 اپریل آ اسلام آباد اٹی اقوام متحدہ نا امن مشن نا وزارتی تیاری نا مسٹ میکو دیوان نا اسیجائی مہمانداری ءِ کیرہ۔ ترجمان دفترخارجہ نا کنڈآن دوشنبے نادے آ جاری بیان نا رداٹ پاکستان جمہوریہ کوریا تون شریداری ٹی اسلام آباد اٹی نیشنل یونیورسٹی آف سائنسز اینڈ ٹیکنالوجی (نسٹ) نا سینٹر فار انٹرنیشنل پیس اینڈ سٹیبلیٹی ٹی اقوام متحدہ نا امن مشن نا وزارتی تیاری نا مسٹ میکو دیوان نا مہمانداری ءِ کیک۔ دادیوان برلن جرمنی ٹی داسال 13 و 14 مئی آ اقوام متحدہ نا امن قائم کننگ نا بروک آ وزارتی دیوان کن جہانی اسٹیک ہولڈر آتے ’’رکھوک و زیات گچین امن قائم کننگ نا کنڈآ: ٹیکنالوجی نا کاریم اٹ اتنگ و مربوط نقطہ نظر‘‘نا سرحال نا رداٹ یکجا کننگ کن مرحلہ ا س طے کیک۔ اقوام متحدہ نا دااِراسال انا دیوان اٹی خارجہ و دفاع نا وزراامن قائم کننگ نا کارروائی تے سوگو کننگ آ چکار تخرہ۔ اسلام آباد اٹی مروک آ تیاری دیوان اٹی پاکستان نا کنڈآن بڑزکو شخصیت آتیان بیدس اقوام متحدہ نا بڑزکو کمامدار بشمول امن آپریشنز نا انڈر سیکرٹری جنرل جین پیئر لیکروکس و انڈرسیکرٹری جنرل آپریشنل سپورٹ اتول کھارے بشخ ہلیرہ۔ اسلام آباد اٹی اِرادے ئی تیاری نا دیوان اٹی امن نا آخبت آ چکار کننگ کن پینل شرہ مریک ہراٹی امن نا کارروائی تے مون تروک چیلنج آتیا سجفنگ کن چندی ذیلی سرحال آتیا گپ وتران اوار ءِ ہراٹی امن نا آخبت ءِ رکھوک و زیات گچین کننگ کن ٹیکنالوجی نا کڑد، ٹیکنالوجی نا کاریم اٹ اتسا امن فوجی تا رکھ و سلامتی ءِ مون تروک خطرہ غاتا مقابلہ ءِ کننگ، اقوام متحدہ نا امن کارروائی تا مخ تفی ٹی علاقائی و بین علاقائی تنظیم تا کڑد، امن فوجی تا گچین کارکڑد و پائیدار و پائیدار امن کن اسہ جوان ءُ نقطہ نظر اس اوار ءِ۔
