اسلام آباد۔ 14اپریل (اے پی پی) وزیراعظم محمد شہباز شریف پیشن نا ملک رہینگوک پاکستانی تا کنڈآن زرراہی تس نا تاریخ اٹی اولیکو وار اسہ تُو اٹی 4 ارب ڈالر نا حدآن گدرینگ انگ آ اوفتا منت واری و خوشی نا درشانی ءِ کرساپارینے کہ تدوک آ سال مارچ انا مقابلہ ٹی داسال مارچ انا زرراہی تس اٹی 37.4 درسد ودکی سمندر پار پاکستانی تا حکومتی پالیسی تیا پت انا ڈیک ءِ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم پارے کہ اسلام آباد اٹی برجااوورسیز پاکستانیز کنونشن نا رداٹ زرراہی تس اٹی ریکارڈ ودکی نا مستائی نا بننگ پیشن نا ملک رہینگوک پاکستانی تا لگن، جوزہ و ملکی زرگزران آ پت انا درشانی ءِ۔ وزیراعظم پارے کہ مارچ 2025اٹی زرراہی تس اسہ تُو اٹی ریکارڈ کروک تاریخ نا بڑزکو کہول 4.1 بلین ڈالر وخت اس کہ برجامالی سال داتم اسکان زرراہی تس جم وڑاٹ 28 بلین ڈالر اسکان سرمس۔ تدوک آ سال مارچ انا مقابلہ ٹی داسال مارچ اٹی زرراہی تس اٹی 37.4 درسد ودکی مسنے۔ اوپارے کہ اسلام آباد اٹی برجا اوورسیز پاکستانیز کنونشن نا رداٹ زرراہی تس اٹی ریکارڈ ودکی نا مستائی نا بننگ پیشن نا ملک رہینگوک پاکستانی تا لگن، جوزہ و ملکی زرگزران آ پت انا درشانی ءِ، زرراہی تس نا ریکارڈ کچ آ سرمننگ سمندر پار پاکستانی تا حکومتی پالیسی تیا پت انا ڈیک ءِ۔ وزیراعظم پارے کہ سمندر پارپاکستانی پیشن نا ملک دے ونن خواری و لگن اٹ کاریم کرسا نئے بیرہ ملک و قوم انا پن ءِ روشنا کیرہ بلکن زرراہی تس آن ملکی زرگزران ءِ فائدہ رسینگک۔ اوپارے کہ سمندر پار رہینگوک پاکستانیک ننا میرات ءُ، کنتون اوار مچ آ قوم ءِ تینا خواری کش سمندر پار پاکستانی تیا گمر ءِ، حکومت پاکستان پیشن نا ملک رہینگوک پاکستانی تے غٹ تر آسراتی فراوان کننگ کن سنبرینگوک ءِ۔
