اسلام آباد۔ 14 اپریل (اے پی پی) بنجائی وزیر داخلہ محسن نقوی سکھ برادری ءِ بیساکھی نا تہوار نا وخت آ مبارکبادی ترسا پارینے کہ بیساکھی سکھ برادری نا خوشی تیان پُر روایتی تہوار ءِ، اسہ ایلو نا خوشی تیٹی شریک مننگ آن ایلمی و یکجہتی ءِ مون آ دننگک، نن غٹ بیساکھی نا تہوار آ سکھ برادری نا خوشی تیٹی بریبرنا شریک اُن، پاکستان ننا غٹ انا ءِ و اودے ننے اواری اٹ سوگو و عظیم کروئی ءِ۔ دوشنبے نادے آ تینا بیان اٹی وزیرداخلہ پارے کہ پاکستان اٹ سکھ برادری نا مقدس ہند آک ساڑی ءُ۔ اقلیت آتے بنداوی حق انا فراوانی، اوفتا جون ومال انا رکھ و اوفتے شونداری نا اسہ وڑ وارخواہی فراوان کننگ ریاست نا زمواری ءِ۔ آئین پاکستان نا رداٹ ملک اٹی رہینگوک آ غٹ اقلیتی برادری تے داڑے رہینگ انگ و کاریم کننگ نا پورو حق دوئی ءِ۔ محسن نقوی پارے کہ پاکستان اٹ سکھ برادری تون اوار ایلو مذہب آتا منوک آتے تینا عقیدہ نا رداٹ زند ءِ تیر کننگ نا پورو آجوئی ءِ۔ سکھ برادری نا گوردوار آتا چیٹ، زیب و زینت و سیکورٹی آ خاص چکار کننگانے۔ سکھ برادری ءِ مذہبی رسم آتا اداکننگ کن ہروڑنا آسراتی فراوان کننگانے۔
