اسلام آباد۔ 14اپریل (اے پی پی)وزیراعظم محمد شہباز شریف پاکستان و مچ آ دنیا ٹی رہینگوک آ سکھ ایلم تے بیساکھی نا خوشی نا وخت آ مبارکبادی پیش کرسا دااست خواہی نا درشانی ءِ کرینے کہ دادے خوشی و شونہالی اتسا برے۔ دوشنبے نادے آ پی ایم آفس نا میڈیا ونگ آن جاری بیان نا رداٹ وزیراعظم محمد شہباز شریف بیساکھی نا دے انا رداٹ تینا کلہو اٹی پارے کہ اینو نادے نئے بیرہ فصل آتا پکا مننگ نا پڑو ءِ بلکن دااسہ تہوار اسے نا وڑاٹ اڈتننگک انتئے کہ دابزغرآتیکن بھلو خوشی نا وخت اس مریک ہراتم او تینا خواری نا بھرم ءِ دوئی کیرہ۔ اوپارے کہ دادے اومیت، سیوت و پوسکنی نا پائیدار جوزہ نا یات دہانی نا وڑاٹ اڈتننگک ہرا ننا برادری تے یکجا و ننا قوم ءِ ٹہیفک۔ وزیراعظم دعاکرے کہ بیساکھی ہرمیدان اٹی شونہالی، ہراست ءِ سکون و پاکستان نا کونہ کونہ ٹی شونداری اتے۔ اوپارے کہ ببونن بیساکھی نا جوزہ غان زہمی مرسا اسہ روشنا، جوان و سوگو ءُ آخبت اسے نا جوڑ کننگ کن اواری اٹ مون آکان، ’’ساریاں نوویساکھی دیاں ودھائیاں!‘‘۔
