اسلام آباد۔14اپریل (اے پی پی): بنجاھی تہی کارانی وزیر محسن نقوی ءَ سکھ کمیونٹی ءَ را بیساکھی ءِ موہ ءَ مبارک بات دیگ ءِ وھد ءَ گوشت کہ بیساکھی سکھ کمیونٹی ءِ وشیں ءُ وشھالیں میلہ اِنت۔ یکے دومی ءِ وشیاں بہر کنگ ءَ برات ءُ یکوئی دیم ءَ کیت۔ بیساکھی میلہ ءِ روچ ءَ سکھ راج ءِ وشّی ءَ ما درست یک پیم ءَ بھر ءُ بانگ کنیں۔ پاکستان مئے درستانی اِنت ءُ مارا یکجائی ءَ ایشی ءَ مھکم ءُ مزن جوڑ کنگی اِنت۔ پارلیمنٹ ءَ وتی تران ءِ تہ ءَ وزیر ءِ تہی کار ءَ گوشت کہ پاکستان ءَ سکھ کمیونٹی ءِ پاکیں ھند است انت۔ اے ریاست ءِ ذمہ واری اِنت کہ آ اقلیتاں المی ایں حقاں بہ دنت، آہانی جان ءُ مال ءِ رکھینگ ءَ بہ کنت ءُ آہاں دیمروئی ءِ برابریں موہ بہ دنت۔ پاکستان ءِ آئین ءِ رد ءَ ملک ءَ نندوکیں درستیں اقلیتی راجاں ادا نندگ ءُ کار کنگ ءِ سرجمیں حق است انت۔ محسن نقوی ءَ گوشت کہ پاکستان ءَ سکھ کمیونٹی ءَ را ایندگہ مذھب ءِ منوگر آنی ھواری ءَ وتی عقیدہ ءِ رد ءَ زند گوازینگ ءِ سرجمیں آجوئی است انت۔ سکھ کمیونٹی ءِ گردوارہانی رکھینگ، ڈیکوریشن، ءُ سیکورٹی ءِ سرا ھاسیں دلگوش دیگ بوتگ۔ سکھ راج ءَ را مذہبی رسم آنی پیلو کنگ ءِ واستہ ہر وڑیں آسراتی داتگ انت۔
