لاہور۔13اپریل (اے پی پی):پٹرولیم ءِ وفاقی وزیر علی پرویز ملک ءَ گشتگ ن لیگ ءِ سرکار ءَ ملک ءِ معیشت ءَ را راستیں راہ ءَ رھادگ کتگ۔ لس کمک ءِ ھاتر ءَ بازیں عملی گامگیج زورگ بوھگ ءَ انت کہ ایشی ءِ جوانیں اثرات دیم ءَ آیگ ءَ بندات بوتگ انت۔ مزن وزیر محمد شہباز شریف ءِ سروکی ءَ حکومت الس ءَ را ریلیف پجاری، مہنگائی ءِ کنٹرول ءُ دیمروئی مکسد آنی سرجمی ءِ واستہ سرجمیں کوشست کنگ ءَ انت۔ آئی ءَ اے گپ یک شمبے ءِ روچ ءَ لاہور ءَ نامداریں صوفی سنت حضرت مدھو لال حسین ءِ سالی عرس مراگش ءَ پد میڈیا ءَ گوں تران کنان ءَ کت۔ اے موہ ءِ سرءَ صوبائی جان سلامتی ءِ وزیر خواجہ عمران نظیر، مسلم لیگ (ن) ءِ راہشون ءُ کارکناں ھوار مزنیں کساسے ءَ مردم ساڑی بوتگ اَنت۔ وفاقی وزیر ءَ گوشت کہ حکومت ءِ زانتکاریں پالیشی آنی سبب ءَ گوستگیں ھپتگ آنی تہ ءَ مہنگائی ءِ شرح ءَ مزنیں کمی بوتگ۔ بجلی ءِ نرخانی تہ ءَ کمی الس ءِ واستہ مزنیں ریلیف اِنت ایشی ءَ چہ نا ایوک ءَ ملکی صارف آناں نپ رسگ ءَ اِنت بلکیں صنعتی پیداوار ءَ را ھم گہتر کنگ بوھگ ءَ اِنت۔ آئی ءَ اے جزم ءِ یک رندے پدا گوشت کہ استیں حکومت ملک ءَ را دیمروئی ءُ وشھالی ءِ راہ ءَ دارگ ءِ واستہ وتی سرجمیں توان آناں ھرچ کنگ ءَ اِنت۔ ما کینگ ءُ آشوب ءِ سیاست ءَ ھلاس کن ایں ءُ تپاکی، براتی ءُ مھکمی ءَ دیما براں۔ اے موہ ءِ سر ءَ صوبائی جان سلامتی ءِ وزیر خواجہ عمران نظیر ءَ گوشت کہ پنجاب ءِ سر وزیر مریم نواز صوبگ ءَ راجی گہبود ءِ منصوبگ آنی سر ءَ ھاسیں دلگوشی دیگ ءَ انت۔ آئی ءَ گوشت کہ پنجاب حکومت اولی بنیات ءِ سر ءَ جان سلامتی، وانگ ءُ زانگ، روزگار ءُ بنیاتی آسراتی آنی پجاری ءَ را دل یکیمی کنگ ءَ انت۔ ایشی ءَ چہ پیسر وفاقی وزیر علی پرویز ملک ءُ صوبائی وزیر خواجہ عمران نظیر ءَ حضرت مادھو لال حسین ءِ مزار ءِ سر ءَ گلدستہ ایر کتگ ءُ ملک ءِ ایمنی ، دیمروئی ءُ برجائی ءِ واستہ ھاسیں دعا کتگ ۔
