اسلام آباد۔13اپریل (اے پی پی):مزن وزیر محمد شہباز شریف ءَ گوشت کہ ما بیلاروس ءِ کشت ءُ کشاری ءِ شوبگ ءَ مہارت ءَ چہ سیت چست کن ایں۔ اللہ تعالیٰ ءَ پاکستان ءَ معدنی خزانہ داتگ۔ دیمروئی کنوکیں، وشھالی ءِ نیمگ ءَ تیزی ءَ گوں دیمروئی کنوکیں پاکستان ان شاء اللہ مئے منزل اِنت۔ مزن وزیر کارگس پریس ونگ ءِ رد ءَ مزن وزیر محمد شہباز شریف ءَ اے ھیالانی درشانی لندن ءَ اھوالکاراں گوں تران کنان ءَ کتگ اَنت۔ مزن وزیر ءَ گوشت کہ بیلاروس ءِ تر ءُ تاب جوان بوتگ، ما بیلاروس ءِ کشت ءُ کشاری شوبگ ءَ مہارت ءَ چہ سیت چست کن ایں، بیلاروس ءَ جوڑ بوتگیں کشت ءُ کشاری مشینری آنی واستہ پاکستان ءَ یکجائی منصوبگ جوڑ کنگ بنت۔ آئی ءَ گوشت کہ اللہ تعالیٰ ءَ پاکستان ءَ را معدنی ھزانگ داتگ ۔ آئی ءَ بیلاروس ءَ کان ءُ معدنیات ءِ ھوالگ ءَ مشینری جوڑ کنگ ءِ کارجاہ ءِ ھم تر ءُ تاب کتگ۔ ان شاء اللہ ما اے شوبگ ءَ ھم کمک ءَ گیش کن آں ۔ آئی ءَ گوشت کہ ما بیلاروس ءِ گوما یک مفاہمت ءِ سر ءَ اتکگ آں کہ بیلاروس ءَ یک لکھ لکھ ہزار ہنرمندیں پاکستانی ورنا آناں روزگار پجارینگ بہ بیت۔ ما کارکناں میرٹ ءِ سرا روان دئیں ان شاء اللہ۔ مزن وزیر ءَ گوشت کہ ھما چیز کہ پنجاب اسپیڈ بوتگ آ پاکستان اسپیڈ ھم بوتگ کہ نوں سپر پاکستان اسپیڈ اِنت۔ محمد نواز شریف ءِ سروکی ءَ ما راج ءِ ازمت ءَ کنگ ءَ ایں ۔ دیمروئی کنوکیں، آبادیں پاکستان انشاء اللہ مئے منزل اِنت۔ محمد شہباز شریف ءَ گوشت کہ یکجائی کوشست ءُ سرجمیں راج ءِ دعا ءِ وسیلگ ءَ ما انشاءاللہ اے منزل ءَ سر کن ایں ۔ آئی ءَ گیش کرتگ کہ من مدام گوشتگ کہ اوگانستان مئے ھمساھگیں براتیں ملک اِنت، مارا مدام ھمساھگ ءِ رنگ ءَ مانگی اِنت، اے مئے سرا اِنت کہ ما جوانیں ھمساھگ ءِ رنگ ءَ مانیں یا جنجال پیداک کن ایں ۔ مزن وزیر ءَ گوشت کہ ما اوگانستان ءِ عبوری حکومت ءَ را باز رند ءَ اے پیغام سر کتگ کہ دوحہ ءِ معاہدے ءِ رد ءَ آ اوگانستان ءِ سرزمین ءَ را ھچ وڑیں ناشرکاری ءِ واستہ کارمرد کنگ ءِ موہ نہ دنت بلے بدبھتی ءِ گپ ایش انت کہ ٹی ٹی پی، آئی ایس کے پی ءُ دگہ ناشرکاریں گل چہ اودا کار کن انت ءُ پاکستان ءِ بے گناھیں مردم شھید کتگ انت۔ مزن وزیر ءَ گوشت کہ منی گمان اِنت کہ پاکستان ءِ الس، پاکستانی سلاہ بندیں اُرد، پولیس ءُ اے دگہ کانود نافذ کنوکیں ادارگ آنی نیمگ ءَ داتگیں قربانی بے سوب نہ بنت۔ مزن وزیر محمد شہباز شریف ءَ گوشت کہ منی دل ءِ جہلانکی ءَ گوں اوگانستان ءَ پنت ءُ شون ایش انت کہ اے ناشرکاریں گل آنی سر ءَ ترندیں رنگ ءَ لگام بند بہ کن ات ءُ مئے زمین ءَ را ایشانی کارمرد کنگ ءِ مطلق اجازت مہ دئے ات۔ آئی ءَ گوشت کہ اوورسیز کنونشن مرچی بندات بوتگ ءُ ھدا ءِ شکر اِنت کہ اے سکیں مزنیں، راجدپتری کنونشن اِنت۔ اوورسیز پاکستانی پاکستان ءَ وتی گس ءِ تر ءُ تاب ءَ انت۔ شپ ءُ روچ محنت کنگ ءَ اوورسیز پاکستانی پاکستان ءَ نامدار کن اَنت ءُ ہر سال ارباں ڈالر ءِ زرّ دیم دینت۔ اے سال ءَ اوورسیز پاکستانی آں دیم داتگیں زرّ ءِ تہ ءَ مزنیں گیشی یے بوتگ۔ مزن وزیر محمد شہباز شریف ءَ گوشت کہ کنونشن درملکی پاکستانی آں گوں گپ ءُ تران ءِ واستہ جوانیں موہ انت۔ کنونشن ءِ تہ ءَ درملکیں پاکستانی آنی جائزیں لوٹ آناں جوانیں رنگ ءَ گوشدارگ بیت ءُ زوتاں چہ زوت کار کنگ بیت۔
