لاہور۔12اپریل (اے پی پی):وفاقی وزیر خزانہ محمد اورنگزیب ءَ گشتگ کہ مزن وزیر محمد شہباز شریف ملک ءِ معیشت ءِ برجائی ءِ ھاتر ءَ شپ ءُ روچ سرگرم انت۔ معدنیات سرمایہ کاری فورم ءِ ثبوت انت کہ معاشی رھبند راست انت۔ ٹیکس ءِ نظام ءَ را آسان کنگ بوھگ ءَ اِنت۔ تاجر آنی جائز جیڈھ اولویت ءِ بنیاد ءَ گیش ءُ گیوار کنگ بنت۔ مارا صنعت ءِ دیمروئی ءِ ھاتر ءَ یکجاہ کار کنگی اِنت۔ ما درملکی سرمایہ کار آناں ھمک رنگ ءِ آسراتی پجاری ءَ را دل یکیمی کنگ ءَ ایں ۔ اے ھیالانی درشانی آئی ءَ شمبے ءِ روچ ءَ لاہور چیمبر آف کامرس اینڈ انڈسٹری ءَ میڈیا ءَ گوں تران کنان ءَ کت۔ وفاقی وزیر خزانہ ءَ گوشت کہ معدنی سرمایہ کاری فورم اے گپ ءِ ثبوت اِنت کہ مئے اقتصادی رھشونی راست اِنت۔ چین، یورپ ءُ امریکہ ءَ ہوار بازیں ملکانی نمائندگاں اے دیوان ءَ بہر زرتگ۔ بازیں درملکی کمپنی ارباں ڈالر ءِ معدنیات ءِ سرمایہ کاری ءَ گوں دلگوش انت۔ ملک ءَ اقتصادی برجائی ءِ ھاتر ءَ ہر پاکستانی ءَ وتی بہر ادا کنگی انت۔ ملک ءِ معیشت ءِ برجائی ءِ واستہ مزن وزیر محمد شہباز شریف ءُ آئی ءِ باصلاحیتیں ٹیم شپ ءُ روچ سرگرم انت۔ آئی ءَ گوشت کہ من تنخواہ داریں کلاس ءِ سر ءَ ٹیکس ءَ را سک شری ءَ سرپد آں ۔ ٹیکس ءِ نظام ءَ سک سادہ کنگ بوھگ ءَ انت۔ یک طبقہ یے کہ آئی ءِ جائیداد ادا اِنت ءُ درملک ءَ نہ اِنت آ ھم پیچیدہ ٹیکس ءِ نظام ءِ تہا ھوار اِنت۔ ایف بی آر ءَ ساپ ءُ پلگاریں مردم آرگ بیگ ءَ انت ۔ ایف بی آر بیست ءُ پنچ چیزانی سرا فارم زورگ ءَ انت۔ اگاں شہری یک سادہ ئیں فارمے ءَ پُر بہ کنت گڑا ٹیکس ءِ فائل سرجم بیت۔ ھزانگءِ وزیر ءَ گوشت کہ من پاکستان ءِ بازیں چیمبر آنی تہ ءَ تر ءُ تاب کتگ۔ من شش سال ءُ نیم اِنت کہ اے ملک ءِ مزنیں بانک ءَ چلائینگ ءَ آں ۔ فیصل آباد ءُ گجرانوالہ ءِ چیمبراں ہم تر ءُ تاب کتگ۔ ما سرکاری سیکیورٹی آں ءُ ما چیمبرانی دیم ءَ پیش بوھگی اِنت۔ چیمبرانی جائزیں لوٹ منگ بنت ءُ ایشانی گیش ءُ گیوار ءِ واستہ ھمک وسائل کارمرد کنگ بنت۔ آئی ءَ گوشت کہ ما اقتصادی استحکام ءِ گپ ءَ کن آں، اے گپ سک باز المی انت کہ ما وتی ملک ءِ سرمایہ کار آنی پیسہ ءَ وھد ءِ سر ءَ واپس کت نہ کن ایں گڈا ما چون دیم ءَ شُت کن آں؟ اقتصادی استحکام ءِ ھاتر ءَ مہنگائی ءِ کم کنگ سک باز المی ات۔ پیسر ءَ سود ءِ شرح 22 درسد بوتگ بلے مرچی 12 درسد انت۔ اگاں مئے پالیسی عام مردم ءِ سرا اثر نہ کنگ ءَ انت گڑا ہچ فائدہ نیست۔ ما ہر ماہ گندگ ءَ ایں کہ دال، مرغ ءُ سبزی ءِ نرخ چے انت۔ اے گپ بوت نہ کنت کہ عام مردم ءَ نفع مہ رسیت ءُ دلال ءِ نفع برجاہ بہ بیت۔ اسٹاک مارکیٹ ءِ سرا ءُ جہل ءَ روگ ءِ سلسلہ برجاہ بیت۔ ایشی ءِ لھتیں درائیں سبب ھست اَنت۔ محمد اورنگزیب ءَ گوشت کہ مارا چارگی انت کہ ما راستیں نیمگ ءَ روگ ءَ ایں یا نہ۔ اگاں مزنیں گل سرمایہ کاری ءِ ھاترا دیم ءَ کاینت گڑا مارا اے چارگ لوٹیت کہ چوں دیم ءَ برگ بہ بیت۔ ریکو دیک پروجیکٹ سک باز المی انت۔ بلوچستان ءَ ریکو دیک پروجیکٹ مئے واب انت ۔ انڈونیشیا ءِ گوستگیں سال ءَ نکل ءِ برآمدات 22 ارب ڈالر بوتگ۔ 2028 ءَ پد مئے برآمدات ھم گیش بنت۔ آئی ءَ گوشت کہ دلیر بہ بئے ءُ رشوت دیوک آنی گپ ءِ چیر ءَ مہ کپ۔ کسٹم ءَ بے دیمیں ٹیکنالوجی ءِ دیم ءَ آرگ بوتگ کہ ایشی ءِ مول ءُ مراد دُزی یا رشوت ءِ دیم ءَ دارگ اِنت۔ اگاں ما رشوت زورگ ءَ ایں گڑا مارا کسے رشوت دیگ ءَ اِنت۔ مئے گوں شما دزبندی انت کہ رشوت دیگ ءَ بند بہ کن ات۔ آئی ءَ گوشت کہ صنعتی دیمروئی راجی دیمروئی ءِ سبب اِنت، اقتصادی برجائی ءِ واستہ راستیں راہ ءِ ٹھینگ المی اِنت، صنعتی دیمروئی ءِ واستہ مارا یکجائی ءَ کار کنگی بیت، مہنگائی ءِ شرح کم بوھگ ءَ اِنت، ءُ پالیسی ءِ شرح ءِ کمی ءَ چہ کاروبار استحکام بوھگ ءَ اِنت۔ آئی ءَ گوشت کہ جندی شوبگ ءِ گوما مشورہ کنگ ءَ برجاہ دار اَنت۔ نجی شعبہ ہر ملک ءِ چلائینگ ءِ تہا کلیدی کرد پیلو کنت۔ ادارہانی نجی کنگ ءِ ہم جہد ءَ انت کہ آ شریں وڑے ءَ بہ بنت۔ آئی ءَ گوشت کہ مزن وزیر ءِ ہدایت ءِ رد ءَ یک کمیٹی یے جوڑ کنگ بوتگ آ جی ایس پی پلس ءِ سر ءَ کار کنگ ءَ انت۔ اے درگت ءَ پانزدہ وزارت آنی تہ ءَ کار برجاہ اِنت۔ وفاقی بجٹ ءِ تیاری ءَ تاجر آنی سوج آنی سر ءَ ھم ھیال داری کنگ بیت۔ آیوکیں لھتیں ماہ ءَ مزن وزیر الس ءِ واستہ گیش ریلیف ءِ جار ءَ جنت۔ یک جستے ءِ پسو ءَ آئی ءَ گوشت کہ ملک ءِ معیشت ھما وھد ءَ استحکام بوت کنت وھدے ما ٹیکس نیٹ ءَ را گیش بہ کن آں ۔ اے وھد ءَ دہ درسد مردم ٹیکس دیگ ءَ اَنت کہ ایشی ءَ را سی ءُ یک درسد ءَ گیش کنگ لوٹ اِیت۔ کہ ایشی ءِ سبب ءَ مئے آبادی گیش بوھگ ءَ اِنت ، ھاسیں رنگ ءَ میتگ ءِ نیمگ ءَ ۔ اگاں مرچی مئے مُلک چوشیں مزنیں آبادی ءِ دارگ ءِ سوب ءَ مشکلانی آماچ اِنت گڑا جیڑ اِت کہ اگاں آبادی گیشتر گیش بہ بیت اے مُلک ءِ چے حال بیت؟ دگہ جُستے ءِ پسو ءَ آئی ءَ گوشت کہ پی آئی اے ءِ یورپی روٹ ءِ بالی گراب بحال کنگ بوتگ اَنت، ءُ امیت اِنت کہ آیوکیں روچ آنی تہ ءَ برطانیہ ءِ روٹ ھم پچ بنت۔
