اسلام آباد۔12اپریل (اے پی پی):راجی خوراک ءِ سلامتی ءُ پٹ ءُ پول ءِ وفاقی وزیر رانا تنویر حسین ءَ گوں چین ڈونکی انڈسٹری ءِ نائب صدر ژاؤ فی ءَ وتی کارگس ءَ گند ءُ نند کتگ۔ شمبے ءِ روچ ءَ ادا جاڑی بوتگیں بیان ءِ رد ءَ گند ءُ نند ءِ ساھت ءَ ژاؤ فی ءَ گوشت کہ پاکستان ءِ چاگرد گد ءِ پروریگ ءِ واستہ سک باز سازگار انت ءُ پاکستان ءَ گد ءِ فارم جوڑ کنگ ءِ واھشت مند انت۔ اے موہ ءِ سر ءَ وفاقی وزیر رانا تنویر حسین ءَ گوشت کہ چین ءِ گوما پاکستان ءِ جوانیں سیادی است انت ءُ توامیں کانودی لوٹ آنی پیلو کنگ ءَ پد باقاعدہ معاہدے ءِ چیر دستی ءَ گد ءِ پروش ءِ واستہ فارم جوڑ کنگ ءِ اجازت دیگ بیت۔ آئی ءَ اے گپ ءِ پدرائی کت کہ اے معاہدے ءِ تہ ءَ اے گپ ءِ ھوار کنگ بیت کہ پاکستان ءَ دمگی نسل آنی نسل کشی ءَ را ھچ رنگ ءَ تاوان نہ رسیت۔ رانا تنویر حسین ءَ گوشت کہ گوادر ایکسپورٹ پروسیسنگ زون ءَ چین ءِ ڈونکی ءِ انڈسٹری ءَ را فارم جوڑ کنگ ءِ اجازت دیگ بیت، اودا کشتارگاہ ءُ برآمد ءِ آسراتی ھم دست کپ ایت تانکہ ڈونکی ءِ گوشت چین ءَ برآمد کنگ بہ بیت۔ وفاقی وزیر ءَ گوشت کہ اے گامگیج ءَ چہ نہ ایوک ءَ پاکستان ءِ برآمدات گیش بنت بلکینگ ءَ پاکستان ءُچین ءِ بیپاری سیادی ءَ را گیش مھکم بیت۔ ڈونکی ءِ صنعت ءِ دیمروئی ءَ چہ بنجاھی تک ءَ اقتصادی موہ ءُ روزگار ءِ موہ ھم پیداک بنت۔
