منسک۔12اپریل (اے پی پی): مزن وزیر محمد شہباز شریف ءَ بیلاروس ءِ بنجاھی شھر منسک ءِ نزیک ءَ کان کنی ءِ ڈمپ ٹرک، بھاری جوڑیشت ءُ کان کنی ءِ مشینری ءُ گاڑی جوڑ کنوکیں کارخانہ ”بیلاز“ ءِ تر ءُ تاب کتگ۔ گلوبل فیکٹری ءِ پیداوار ءِ تہا سک باز دلچسپی زورگ ءَ کہ تعمیر ءُ دیمروئی ءِ حمایت کنت، آئی ءَ اے تر ءُ تاب ءَ را سک باز متاثر کنیں ءُ فیکٹری ءَ را یک مزنیں منصوبہ ءِ رنگ ءَ بیان کتگ۔ آئی ءَ گوشت کہ پاکستان ءَ مزنیں کوالٹی ءِ بھاری مشینری ءُ پروڈکٹس ءِ ضلورت اِنت۔ آئی ءَ بیلاروس ءِ مزن وزیر ءَ را پاکستان ءِ تر ءُ تاب ءِ دعوت دات ءُ گوشت کہ ما یکجائی ءَ ننداں ءُ یکجائی منصوبگ ءُ فیکٹری ءِ چیز ءُ سامانانی بابت ءَ گپ ءُ تران کن انت۔ ایشی ءَ چہ پیسر بیلاروس ءِ مزن وزیر الیگزینڈر تورچین ءَ بیلاروس ءَ سر بوھگ ءِ پد ءَ پاکستان ءِ مزن وزیر ءَ را وش اتک کت۔ مزن وزیر ءَ را کارجاہ ءِ سرجمیں تر ءُ تاب کنگ ءُ بریفنگ دیگ بوت۔ بریفنگ ءِ ساھت ءَ مزن وزیر ءَ را گوشگ بوت کہ اے فیکٹری 1948 ءَ جوڑ کنگ بوتگ ءُ ادا کان کنی ءَ کارمرد بوھوکیں سامان جوڑ کنگ بوھگ ءَ انت وھدیکہ 1951ءَ چہ ادا آٹوموٹو ءِ ایندگر کمپونٹس جوڑ کنگ بندات کنگ بوتگ۔ مزن وزیر محمد شہباز شریف ءَ را بیلاز کارخانہ ءِ کار ءُ پیداوار ءِ بابت ءَ سرپدی دیگ بوت، ءُ آئی ءَ را سرپدی دیگ بوت کہ 25 ٹن ءِ گنجائش ءِ ٹرک ءِ پیداوار 1958 ءَ بندات بوتگ، وھدے کہ ڈمپ ٹرک ءِ پیداوار ءِ گیشیں کشگ ءِ گنجائش ءِ گوں 1961 ءَ بندات بوتگ۔ کارخانہ ءِ تہا جوڑ بوتگیں سامان ءُ اوزاراں چہ سرپد بوتگ ءُ اے درگت ءَ جتا جتائیں جُست ءُ پُرس ہم کتگ انت۔ بریفنگ ءَ گوشگ بوت کہ 1961ءَ چہ بیلاز ءَ ٹرک ھم جوڑ کنگ بوتگ انت ایشی ءِ تہ ءَ الیکٹرک ٹرک ءُ ہائبرڈ ڈمپ ٹرک ھوار انت۔ الیکٹرک ڈمپ ءُ بیٹری ءِ سرا کار کنوکیں ٹرک 490 ٹن ءَ تاں وزن چست کنگ ءِ اہل انت۔ مزن وزیر ءَ را بھاری ڈمپ ٹرک جوڑ کنوکیں یونٹ ءَ کان کنی ءُ کان ءِ مشینری ءُ ٹرک آنی بابت ءَ ھم سرپد کنگ بوت۔ مزن وزیر محمد شہباز شریف ءَ کان ءِ مشینری ءِ تہ ءَ سک باز دلگوشی ءِ درشانی کت ءُ گاڑی آنی جوڑ کنگ ءِ تہ ءَ کارمرد بوھوکیں سامان آنی بابت ءَ ھم جست ءُ پرس کت کہ آئی ءَ را گْوشگ بوت کہ بھاری گاڑی آنی جوڑ کنگ ءِ تہ ءَ کارمرد بوھوکیں بھر دمگی رنگ ءَ جوڑ کنگ بنت، البت لھتیں انجن درآمد کنگ بنت، وھدیکہ ٹائر ھم بی ءِ تہ ءَ جوڑ کنگ بنت۔ کان کنی ءُ کان کنئگ ءِ کارمرد بوھوکیں مشینری ءُ مزنیں ٹرک آں چہ پاکستان ءَ پیداواری سیت رس اِت کنت۔ مزن وزیر ءَ را گوشگ بوت کہ فیکٹری ءَ جوڑ بوؤکیں چیز ءُ مشینری پاکستان ءَ ھم سپلائی کنگ بنت وھدیکہ بیلاز فیکٹری ءَ جوڑ بوؤکیں مشینری ءُ اے دگہ چیز گوستگیں سال ءَ 22جتائیں ملک آنی تہ ءَ برآمد کنگ بوتگ اَنت۔ مزن وزیر ءِ جست ءِ پسو ءَ گوشگ بوت کہ کان کنی ءُ کان کنی ءَ کارمرد بوؤکیں بھاری ڈمپ ٹرک فیکٹری ءَ جوڑ کنگ بوھگ ءَ انت۔ مزن وزیر محمد شہباز شریف ءَ الیکٹرک بس ءِ سرا سوار بوھگ ءَ کارجاہ ءِ جتا جتائیں دمگ آنی تر ءُ تاب کتگ۔ بریفنگ ءِ ساھت ءَ مزن وزیر ءَ فیکٹری ءِ جتاجتائیں سیکشن آنی تر ءُ تاب ءِ ساھت ءَ روسی زبان ءَ انجینئر آنی گوما ھم جُست ءُ پُرس کت ءُ گپ ءُ تران کت۔ مزن وزیر محمد شہباز شریف ءَ بیلاز ءِ تر ءُ تاب ءِ گڈ سر ءَ تران کنان ءَ گوشت کہ بیلاز ءَ جوڑ بوؤکیں مشینری ءُ سامان پاکستان ءَ پیداواری کار آنی واستہ ھم کارمرد بوت کن اَنت۔ آئی ءَ بیلاروس ءِ مزن وزیر ءَ را دعوت دات کہ آ اے درگت ءَ مزن تک ءِ ڈل ءَ پاکستان ءَ روان بہ دنت تانکہ اے درگت ءَ سرجمیں گپ ءُ تران کنگ بہ بیت۔ آئی ءَ گوشت کہ مارا فیکٹری پروڈکٹس ءِ سر ءَ سرجمیں رنگ ءَ گپ ءُ تران ءِ ضلورت اِنت تانکہ یکجائی منصوبگ آنی ھوار وت مہ وتی کمک ءِ سر ءَ کارروائی ءِ منصوبگ جوڑ کنگ بہ بیت۔ آئی ءَ گْوشتگ: مارا مزنیں کوالٹی ءِ چیزانی لوٹ بیت۔ آئی ءَ گوشت کہ منی اے تر ءُ تاب سک سوبمند بوتگ۔ منی بیلاروس ءِ تر ءُ تاب اگاں بیلاز ءِ کارخانہ ءِ تر ءُ تاب ءَ ابید نا سرجم بوتگ ات۔ آئی ءَ بیلاروس ءِ صدر ءِ مہمان داری ءِ سر ءَ ھم منت واری ءِ درشان کت ءُ گوشت کہ منی آیوکیں تر ءُ تاب ءِ موہ ءَ من بیلاز پلانٹ ءِ سر ءَ سرجمیں رنگ ءَ تر ءُ تاب کنگ لوٹ آں ۔ آئی ءَ گوشت کہ پاکستان ءَ ھم اے وڑیں پلانٹ جوڑ کنگ لوٹ ایت۔ مزن وزیر محمد شہباز شریف ءَ بیلاروس ءِ مزن وزیر الیگزینڈر تورچین ءَ را پاکستان ءِ تر ءُ تاب ءِ دعوت ھم داتگ ات کہ ایشی ءِ سر ءَ بیلاروس ءِ مزن وزیر ءَ گوشت کہ پاکستان ءِ تر ءُ تاب منی واستہ شرف ءِ بیت ءُ من پاکستان ءِ تر ءُ تاب ءَ چہ وش آں ۔ مزن وزیر محمد شہباز شریف ءَ پاکستانی واکدار آناں اے تر ءُ تاب ءِ ساھت ءَ تپاک کتگیں جیڈھ آنی سر ءَ عمل کنگ ءِ ہدایت کتگ۔ مزن وزیر بیلاز ءِ تر ءُ تاب ءَ آئی ءِ ھمراھی ءَ نائب مزن وزیر اسحاق دار ءُ وفاقی وزیر عطا اللہ ترار، جام کمال خان ءُ عبدالعلیم ھم بوتگ اَنت۔
