منسک۔11اپریل (اے پی پی): وزیر تجارت جام کمال ءَ گوشت کہ استیں حکومت ملک ءَ سرمایہ کاری ءِ دیمروئی ءُ کاروباری مردم آناں آسراتی ءِ واستہ جوانیں گامگیج چست کنگ ءَ انت۔ پاکستان ءَ دگنیا سرمایہ کاری ءِ نیمگ ءَ دلگوش کنگ ءَ انت ۔ پالیسی ءِ شرح، بجلی ءِ ٹیرف ءِ تہ ءَ کمی، ءُ افراط زر ءِ تہ ءَ کمی ءَ ھوار اقتصادی اشارہ جوانیں نیمگ ءَ روگ ءَ اَنت۔ مرچی سرجمیں دگنیا مئے سوب مندی ءَ منگ ءَ اِنت۔ گوستگیں سال ءِ تہ ءَ مزن وزیر ءُ آئی ءِ ٹیم ءَ را چیلنج آناں چونیں رنگ ءَ دیم پہ دیم کتگ گوستگیں وھد ءَ بے درور اِنت۔ جمعہ ءِ روچ ءَ مزن وزیر ءِ بیلاروس ءِ تر ءُ تاب ءِ ھوالگ ءَ تران کنان ءَ آئی ءَ گوشت کہ لھتیں ماہ پیسر بیلاروس ءِ صدر ءَ پاکستان ءِ تر ءُ تاب کتگ۔ دوئیں ملک آنی نیام ءَ جے ایم سی ءُ کاروباری تک ءِ گند ءُ نند برجم دارگ بوت۔ نوں پاکستان ءِ مزن وزیر بیلاروس ءِ تر ءُ تاب ءَ اتکگ۔ مول ءُ مراد ایش انت کہ جتا جتائیں ملکانی تہا استیں موہاں چہ کارمرز کنگ بہ بیت۔ مرچی پاکستان ءَ چہ 100 مردم بی ٹو بی ءِ شوبگ ءَ ادا اتکگ انت ءُ ادا استیں موہ آنی پٹ ءُ پول ءَ انت۔ اے درگت ءَ مزن وزیر شہباز شریف وتی کوشست ءَ کنگ ءَ انت ۔ آئی ءَ گوشت کہ مزن وزیر درملکی تر ءُ تاب آنی تہ ءَ وت ءَ کاروباری ڈل آناں ھم برگ ءَ انت۔ مزن وزیر ءِ ھمراھی ءَ بزنس کمیونٹی ءَ را ریگولیٹرز، مزن اگدہ دار ءُ وزیر آنی گوما سیادی جوڑ کنگ ءِ موہ رس ایت، پاکستان ءَ اے اولی رند ءَ بوھگ ءَ اِنت۔ پیسرا لہتیں پسندیدہ مردم ہمراہ بوتگ انت بلے وفاقی وزیر ءَ گشتگ کہ اے رندی جتا جتائیں شعبہ آں چہ سد ءَ چہ گیش کاروباری مردم ادا انت۔ آئی ءَ گوشت کہ گوستگیں سال ءِ تہ ءَ مزن وزیر ءَ ھرچ ملک ءِ تر ءُ تاب کتگ، آئی ءَ کاروباری ڈل ھم وتی گوما برتگ، اودا سوبمندیں بی ٹو بی میٹنگ برجم داشتگ اَنت۔ اے اصل سوبمندی اِنت۔ مزن وزیر ءَ اے گپ اولی روچ ءَ چہ گشگ ءَ اِنت ءُ مرچی دنیا اے نیمگ ءَ جھکگ ءَ اِنت کہ ٹیرف ءِ دیم ءَ اتکگیں چیلنج کاروباری برادری ءِ نیمگ ءَ چہ گیش ءُ گیوار کنگ بنت۔ ما وتی کاروباری برادری ءِ حمایت ءُ مھکم کنگ ءَ ایں ۔ پاکستان ءَ بازیں چیلنج است انت بلے گوستگیں سال ءِ تہا مزن وزیر ءُ آئی ءِ ٹیم ءَ اے چیلنج آنی دیمپانی ءِ وڑ ءُ پیم بے مثال انت۔ انشاءاللہ ہر روچ گوزگ ءَ گوں شرتر بوھگ ءَ اِنت۔ دگہ چیزاں ھم گہتری گندگ بوھگ ءَ اِنت، ایشی ءِ تہ ءَ پالیسی ءِ شرح، بجلی ءِ شرح، افراط زر ءِ تہ ءَ کمی ءُ سرجمیں کرنسی ءِ ریکوری ھوار اَنت۔ مرچی سرجمیں دگنیا مئے سوب مندی ءَ منگ ءَ اِنت۔ آئی ءَ گوشت کہ پاکستان ءَ یک سوبمندیں منرل کانفرنس ءِ برجم دارگ بوت، ایشی ءِ تہ ءَ امریکہ، سعودی عرب، ءُ ترکی ءَ ھوار جتا جتائیں ملک آنی سرمایہ کار ءُ کاروباری مردم اتکگ اَنت۔ آئی ءَ گوشت کہ چست کنگ بوھوکیں گامگیج ءُ چیلنج آناں پیلو کنگ بوھگ ءَ انت ءُ چیز گہتر بنت۔
