منسک۔11اپریل (اے پی پی): مزن وزیر محمد شہباز شریف ءُ بیلاروس ءِ صدر الیگزینڈر لوکاشینکو ءَ دوئیں ملک آنی نیام ءَ جتا جتائیں پڑ آنی تہ ءَ کمک ءِ دیمروئی ءِ واستہ مزنیں موہ آنی سر ءَ چمشانک داتگ ءُ دو نیمگی تجارتی ءُ اقتصادی کمک ءِ واستہ موہ آناں راستی ءَ کارمرد کنگ ءِ واستہ وتی جزم ءِ درشان کتگ۔ جمعہ ءِ روچ ءَ مزن وزیر محمد شہباز شریف ءُ صدر الیگزینڈر لوکاشینکو ءَ دوئیں ملک آنی نیام ءَ معاہدہ ءُ مفاہمت ءِ یادداشت آنی بدلی ءَ پد یکجائی پریس کانفرنس ءَ گوں گشتانک دات۔ اے موہ ءِ سر ءَ نائب مزن وزیر ءُ درئی کارانی وزیر سینیٹر اسحاق ڈار ، وفاقی وزیر تجارت جام کمال خان، وفاقی وزیر اطلاعات ءُ نشریات عطا اللہ تارڑ، وفاقی وزیر مواصلات عبدالعلیم خان، مزن وزیر ءِ ھاسیں کمکار طارق فاطمی، ءُ حاضریں دوئیں سرکاری وزیر ءُ دوئیں ءِ دگہ سرکاری وزیر ءُ حاضریں سینئر وزیر ھوار اتنت۔ مزن وزیر محمد شہباز شریف ءَ گوشت کہ بیلاروس ءِ کمپنی آناں پاکستان ءَ سرمایہ کاری ءِ موہ ءُ جوانیں چاگرد ءَ چہ پائدگ چست کنگ لوٹ ایت۔ مزن وزیر ءَ گرمیں وش آتک ءُ جوانیں مہمانداری ءِ سر ءَ بیلاروس ءِ سروکی ءِ منت گپت۔ مزن وزیر ءَ بیلاروس ءِ دارالحکومت منسک ءِ زیبائی ءِ توسیپ کنان ءَ گوشت کہ شہر ءِ ھما کساس ءَ توسیپ کنگ نہ بیت۔ آئی ءَ گوشت کہ بیلاروس ءِ صدر ءَ پاکستانی ڈل ءَ را وتی فارم ہاؤس ءَ دعوت داتگ ءُ آئی ءِ دعوت یک ھاندان ءِ یکوئی ءِ وڑ ءَ بوتگ۔ مزن وزیر ءَ گوشت کہ پیسریگیں مزن وزیر محمد نواز شریف ءُ بیلاروس ءِ صدر الیگزینڈر لوکاشینکو ءَ یکجائی ءَ پاکستان ءُ بیلاروس ءِ نیام ءَ دوستی ءَ را دیم ءَ برتگ ءُ 2015 ءَ صدر الیگزینڈر لوکاشینکو ءِ پاکستان ءِ تر ءُ تاب ءَ اے دوستی ءَ را مھکم کنگ ءَ ھاسیں کرد پیلو کتگ۔ مزن وزیر ءَ گوشت کہ دو نیمگی سیادی ءِ ھوالگ ءَ مئے نیام ءَ پائدگ مندیں گپ ءُ تران بوتگ۔ دوئیں ملک آنی نیام ءَ جتاجتائیں شوبگ آنی تہ ءَ کمک ءِ واستہ مفاہمت نامہ آنی مٹ بدل کنگ بوت۔ مفاہمت نامہ آناں معاہدہ ءِ تہا بدل کنگ ءِ ضلورت انت۔ آئی ءَ صدر الیگزینڈر لوکاشینکو ءِ وژنری قیادت ءِ توسیپ کت ءُ گوشت کہ بیلاروس ءَ آئی ءِ سروکی ءَ مزنیں پیشرفت کتگ۔ مزن وزیر ءَ گوشت کہ دوئیں ملک آنی نیام ءَ جتا جتائیں شوبگ آنی تہ ءَ سرمایہ کاری ءِ بے دروریں موہ است انت، بیلاروس ءِ کمپنی آناں پاکستان ءِ تہ ءَ سرمایہ کاری ءِ موہ ءُ سازگاریں چاگرد ءَ چہ پائدگ چست کنگ لوٹ ایت۔ مزن وزیر ءَ گوشت کہ پاکستان کشت ءُ کشاری ءِ ملک اِنت ایشی ءِ تہ ءَ 65درسد آبادی میتگ آنی تہ ءَ نشتگ ءُ کشت ءُ کشاری ءَ گوں بندوک اَنت۔ پاکستان ءُ بیلاروس ءَ کشت ءُ کشاری ءُ صنعتی شوبگ ءَ یکے دومی ءِ تجروبت آں چہ سیت زورگ لوٹیت۔ آئی ءَ گوشت کہ بیلاروس ءَ زرعی سامان ءُ مشینری ءِ تہ ءَ ھم مزنیں مہارت ھست ءُ آ زرعی پیداوار ءِ تہ ءَ گیشی ءِ واستہ بیلاروس ءِ کمک ءِ لوٹ ءَ کنگ ءَ اَنت ءُ وتی تجربگ آنی تہ ءَ چہ نپ چست کن اَنت۔ مزن وزیر ءَ گوشت کہ پاکستان ءَ ارباں ڈالر ءِ معدنی ذخیرہ است انت، ایشی ءِ تہ ءَ پاکستان ءُ بیلاروس کمک ءُ شریکی کت کن انت۔ مزن وزیر ءَ صدر الیگزینڈر لوکاشینکو ءِ منت گپت کہ آئی ءَ پاکستان ءِ یک لکھ لکھ ہزار ہنرمندیں کارکن آناں بیلاروس ءَ دعوت داتگ ءُ گوشت کہ بیلاروس ءَ نندوکیں پاکستانی ایشی ءِ جوڑیشت ءُ دیمروئی ءِ تہ ءَ ھاسیں کرد پیلو کن اَنت ءُ درملکی زرّ دیم دیگ ءِ تہ ءَ گیشی بیت۔ مزن وزیر ءَ گوشت کہ دوئیں ملک آنی نیام ءَ ٹیکسٹائل شوبگ ءَ بی ٹو بی کمک ءَ را گیش کنگ بیت۔ پبلک ٹرانسپورٹ ءِ شوبگ ءَ بیلاروس ءَ چہ پاکستان ءَ را ھم سیت رسیت ۔ آئی ءَ گوشت کہ سیادی ءَ را دیمروئی دیگ ءِ تہ ءَ جوانیں دیمروئی دل یکیمی ءِ وسیلگ اِنت۔ ایشی ءَ چہ پیسر بیلاروس ءِ الیگزینڈر لوکاشینکو ءَ مزن وزیر شہباز شریف ءِ بیلاروس ءِ تر ءُ تاب ءَ را وش اتک کت ءُ گوشت کہ بیلاروس پاکستان ءِ گوما وتی سیادی ءَ را سک باز ارزشت دنت۔ دوئیں ملک آنی نیام ءَ جتا جتائیں پڑ آنی تہ ءَ کمک ءِ دیمروئی ءِ واستہ مزنیں موہ است انت۔ مزن وزیر شہباز شریف ءِ اے تر ءُ تاب ءَ چہ دو نیمگی سیادی آناں نوکیں رنگ ءُ دروشم رس ایت۔ آئی ءَ پاکستان ءُ بیلاروس بزنس فورم ءِ برجم دارگ ءَ را تجارت ءِ دیمروئی ءِ واستہ سک باز المی لیک اِتگ ءُ گوشت کہ دو نیمگی تجارت ءُ اقتصادی کمک ءِ موہ آناں راستی ءَ کارمرد کنگ بہ بیت۔
