منسک ۔11اپریل (اے پی پی): پاکستان ءُ بیلاروس ءِ نیام ءَ دفاع، تجارت ءُ چاگردی رکھینگ ءَ ھوار بازیں شوبگ آنی تہ ءَ کمک ءِ دیمروئی ءِ واستہ جتا جتائیں معاہدہ ءُ مفاہمت نامہ آنی سر ءَ دستخط کنگ بوت۔ اے منگ نامہ مزن وزیر محمد شہباز شریف ءِ بیلاروس ءِ تر ءُ تاب ءِ ساھت ءَ بوتگ انت۔ دستخط ءِ مراگش ءَ مزن وزیر محمد شہباز شریف ءُ بیلاروس ءِ صدر الیگزینڈر لوکاشنکو ھم ھوار اتنت۔ دوئیں نیمگ ءِ وزیراں پیسر ءَ چہ دستخط کتگیں کاگد آنی بدلی کت۔ پاکستان ءُ بیلاروس ءِ حکومت ءَ دوئیں ملک آنی داخلہ ءِ وزارت آنی نیام ءَ کمک ءِ ھوالگ ءَ دوبر داخلہ ءِ معاہدہ ءِ سر ءَ دستخط کتگ۔ نائب مزن وزیر ءُ درئی کارانی وزیر سینیٹر اسحاق دار ءُ بیلاروس ءِ تہی کارانی وزیر آئیون کبراکوف ءَ کاگد آنی مٹ ءُ بدلی کت۔ پاکستان ءُ بیلاروس ءَ دوئیں ملک آنی وزارت دفاع آنی نیام ءَ کمک ءِ بابت ءَ معاہدے ءِ سر ءَ دستخط کت ءُ اے درگت ءَ وزیر تجارت جام کمال خان ءُ بیلاروس ءِ وزیر دفاع وکٹر خرینان ءَ کاگد آنی مٹ ءُ بدلی کت۔ دوئیں ملکاں جمہوریہ بیلاروس ءِ فوجی صنعت ءِ ھاتر ءَ ریاستی اتھارٹی ءُ دفاعی پیداوار ءِ نیام ءَ 2025-2027 ءِ ھاتر ءَ فوجی ءُ تکنیکی کمک ءِ پروگرام (روڈ میپ) ءِ سر ءَ دستخط کتگ۔ مواصلات ءِ وزیر عبدالعلیم خان ءُ بیلاروس ءِ فوجی صنعت ءِ ریاستی اتھارٹی ءِ وزیر دیمتری پینٹوس ءَ دستاویزات ءِ تبادلہ کتگ۔ تر ءُ تاب ءِ ساھت ءَ چاگردی رکھینگ، پوسٹل سروسز، کاروباری کمک، تجارتی دیمروئی، ءُ تجارتی ادارگ آنی نیام ءَ کمک ءِ ھوالگ ءَ دو نیمگی معاہدہ آنی سر ءَ ھم دستخط کنگ بوتگ۔
