اسلام آباد۔11اپریل (اے پی پی): صدر ءِ مملکت آصف علی زرداری ءَ ضلع ءِ دیر ءَ سوبمندیں آپریشن ءِ تہ ءَ دو خوارج ءِ کوش ءِ سر ءَ سیکورٹی فورسز ءَ را شگر ءُ منت پیش کتگ۔ جمعہ ءِ روچ ءَ صدارتی ایوان ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ صدر ءَ سیکورٹی فورسز ءِ بہادری ءِ توسیپ کتگ کہ آ فتن الخریج ءِ دو ناشرکاراں ھوار یک مزنیں ارزشت ءِ ٹارگٹ ءَ را انٹیلی جنس ءِ بنیات ءَ آپریشن ءِ وھد ءَ ھلاس کتگ۔ آئی ءَ آپریشن ءِ وھد ءَ ناشرکاریں سروک ءِ ھلاس کنگ ءِ سر ءَ سیکورٹی فورسز ساڑات ءُ گوشت کہ آپریشن ءِ تہ ءَ ناشرکاریں سروک ءِ کوش سیکورٹی فورسز ءِ واستہ مزنیں سوبمندی یے بوتگ۔ صدر ءِ مملکت ءَ گوشت کہ سیکورٹی فورسز ءِ آپریشن داں ھما وھد ءَ برجاہ بیت داں ناشرکار آناں سرجمی ءَ ھلاس کنگ مہ بیت۔ آصف علی زرداری ءَ گوشت کہ اے گپ وشی ءِ گپ انت کہ پاکستان ءِ سیکورٹی فورسز ناشرکاری ءِ ھلاسی ءِ واستہ سوبمندیں آپریشن کنگ ءَ انت۔ آئی ءَ فتنات الخریجیت ءِ سرجمی ءَ ھلاس کنگ ءِ راجی جزم ءِ ھم درشانی کتگ۔
