منسک۔11اپریل (اے پی پی): وفاقی وزیر برائے اطلاعات ءُ نشریات عطا اللہ تارڑ ءَ مزن وزیر محمد شہباز شریف ءِ بیلاروس ءِ تر ءُ تاب ءَ را سک باز ھاسیں ءُ دوئیں ملک آنی نیام ءَ سیادی ءِ تہ ءَ جوانیں دیمروئی لیکگ ءَ گوشت کہ پاکستان جھان ءِ تک ءَ یک نوکیں معیشت ءِ رنگ ءَ دیم ءَ آیگ ءَ اِنت۔ گوستگیں یک سال ءِ تہ ءَ پاکستان ءَ را جھان ءِ تک ءَ ایوکی ءَ چہ دراتکگ ءُ فعالیں دری پالیشی ءِ نیمگ ءَ گامگیج چست کتگ۔ گلوبل سرمایہ کار پاکستان ءَ آیگ ءَ انت ءُ جتاجتائیں منصوبگ آنی تہ ءَ سرمایہ کاری کنگ ءَ انت۔ پاکستان ءِ گوں جتا جتائیں ملکاں بوتگیں معاہدہ آں عملی رنگ زرتگ۔ مزن وزیر شہباز شریف ءِ بیلاروس ءِ تر ءُ تاب ءِ ساھت ءَ زرعی مشینری، دفاع، دفاعی پیداوار ءُ جتا جتائیں شوبگ آنی تہ ءَ کمک ءَ را گیش کنگ ءِ واستہ مفاہمت نامہ آنی سر ءَ دستخط کنگ بیت۔ وفاقی اطلاعات ءِ وزیر ءَ مزن وزیر محمد شہباز شریف ءِ بیلاروس ءِ تر ءُ تاب ءِ بابت ءَ ھاسیں رنگ ءَ گپ ءُ تران کنان ءَ گوشت کہ مزن وزیر محمد شہباز شریف ءِ بیلاروس ءِ تر ءُ تاب سک باز ارزشت ءِ واھند اِنت۔ لھتیں ماہ پیش بیلاروس ءِ صدر الیگزینڈر لوکاشنکو ءِ پاکستان ءِ تر ءُ تاب ءِ ساھت ءَ بازیں شوبگ آنی تہ ءَ کمک ءِ تہ ءَ گیشی ءِ سر ءَ تپاک کنگ بوتگ۔ مزن وزیر شہباز شریف ءِ بیلاروس ءِ تر ءُ تاب ءِ ساھت ءَ زرعی مشینری، دفاع، دفاعی پیداوار ءُ جتا جتائیں شوبگ آنی تہ ءَ کمک ءَ را گیش کنگ ءِ واستہ مفاہمت نامہ آنی سر ءَ دستخط کنگ بیت۔ پاکستان ءُ بیلاروس ءِ نیام ءَ سیادی ءَ را گیش پراھی کنگ ءِ ھوالگ ءَ ھم گپ ءُ تران بیت ۔ عطا اللہ تارڑ ءَ گوشت کہ بیلاروس ءِ صدر ءِ گوں مسلم لیگ ن ءِ راہشون محمد نواز شریف ءَ ذاتی ءُ دیریں سیادی است انت۔ محمد نواز شریف ءَ را غیر رسمی شپ ءِ ورگ ءَ ھاسیں مہمان ءِ بستار ءَ دعوت دیگ بوتگ۔ آئی ءَ گوشت کہ مزن وزیر شہباز شریف ءِ بیلاروس ءِ تر ءُ تاب سک باز المی انت ءُ دوئیں ملک آنی سیادی آنی تہ ءَ جوانیں دیمروئی ءِ ثابت بیت۔ وفاقی وزیر ءَ گوشت کہ پی ڈی ایم ءِ حکومت ءِ ساھت ءَ ءُ گوستگیں یک سال ءِ تہ ءَ پاکستان جھان ءِ تک ءَ ایوکی ءَ چہ دراتکگ ءُ فعالیں دری پالیشی ءِ نیمگ ءَ گامگیج چست کتگ۔ بازیں دگنیا ءِ سروکاں پاکستان ءِ تر ءُ تاب کتگ، پاکستان ءَ شنگھائی کمکی گل ءِ سروکیں دیوان ءِ میزبانی کتگ ءُ پاکستان ءَ جتا جتائیں ملک آنی گوما ھما معاہدہ کتگ کہ آھاں عملی رنگ زرتگ۔ آئی ءَ گوشت کہ پاکستان معدنیات سرمایہ کاری فورم ءَ سرجمیں دگنیا ءَ چہ 300 ءَ چہ گیش ماہرین ءُ نمائندہ آناں بھر زوری کتگ، ءُ درائیں ملک آنی سرمایہ کار پاکستان ءَ آھگ ءَ انت ءُ جتاجتائیں منصوبگ آنی تہ ءَ سرمایہ کاری کنگ ءَ انت۔ آئی ءَ گوشت کہ کاروباری فورم آنی برجائی ءَ چہ ملکی معیشت ءَ را استحکام دیگ بوھگ ءَ اِنت وھدیکہ پاکستان جھان ءِ تک ءَ یک ابرمی معیشت ءِ بستار ءَ دیم ءَ آیگ ءَ اِنت۔
