اسلام آباد۔9اپریل (اے پی پی): مزن وزیر محمد شہباز شریف ءَ غزہ ءِ بے سلاہیں فلسطینیانی سر ءَ برجاھیں صیہونی زلم ءُ زوراکی ءِ ھلاپ ءَ ھرچ میاں اوستمانی فورم ءَ وتی توار چست کنگ ءِ جزم ءِ پدر کنگ ءَ گوشت کہ فلسطینی آنی کمک ءِ ھوالگ ءَ پاکستان ءِ موقف ھاسیں رنگ ءَ پدر اِنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے جیڈھانی درشانی چار شمبے ءِ روچ ءَ امیر جماعت اسلامی حافظ نعیم الرحمن ءِ سروکی ءَ جماعت اسلامی ءِ سئے باسکی ڈل ءَ گوں گپ ءُ تران کنان ءَ کت۔ دوئیں رہشوناں اسرائیل ءِ نیمگ ءَ غزہ ءَ بے سلاہیں فلسطینی آنی سر ءَ بے سوبیں بمب تراک ءُ اے زلم ءُ زوراکی آنی سر ءَ میاں اوستمانی طاقت آنی بے تواری ءِ سر ءَ دلپروشی ءِ درشانی کتگ۔ مزن وزیر ءَ غزہ ءِ بے دفاعیں فلسطینی آنی سر ءَ برجاھیں صیہونی زلم ءُ زوراکی آنی ھلاپ ءَ ھمک میاں اوستمانی فورم ءَ کمک ءُ توار چست کنگ ءِ واستہ پاکستان ءِ عزم ءِ پدا زور دات۔ مزن وزیر ءَ گوشت کہ صیہونی ظلم ءِ آماچیں بے دفاعیں فلسطینی برات ءُ گھار آنی کمک ءِ ھوالگ ءَ پاکستان ءِ موقف ساچگ اِنت۔ جماعت اسلامی ءِ راہشوناں مزن وزیر ءِ شگر ءُ منت گپت کہ گوستگیں روچاں بجلی ءِ نہادانی تہا کمی اتکگ۔ مزن وزیر ءَ گوشت کہ توان ءِ شوبگ ءَ دراجیں مدت ءِ اصلاحات آرگ ءِ واستہ حکومتی ٹیم شپ ءُ روچ کار کنگ ءَ انت۔ توانائی ءِ شوبگ ءَ گیشیں اصلاحات عام مردم ءِ زندمان ءِ آسراتی ءَ را ھیال ءَ دارگ ءَ کنگ بوھگ ءَ انت۔ مشکل آنی باوجود ما الس ءَ را اولی ترجی داتگ ءُ اے ماموریت ءَ را دیم ءَ براں۔ انشاء اللہ پاکستان ءِ دیمروئی ءِ سفر برجاہ مان انت ۔ اے دیوان ءَ نائب مزن وزیر ءُ دری کارانی وزیر محمد اسحاق ڈار ، بنجاھی وزیر اھوالکاری ءُ شنگکاری عطا اللہ تارڑ ، جماعت اسلامی ءِ سروک لیاقت بلوچ ءُ آصف لقمان قاضی ھم ھوار اتنت۔
