پاکستان ءُ قازقستان ءِ نیام ءَ وانگ ءُ زانگ ءُ سائنسی سیادی، پٹ ءُ پول ءُ دیمروئی ءُ ٹیکنالوجی ءِ پڑ ءَ کمک ءَ را گیش کنگ ءِ سر ءَ تپاک

اسلام آباد۔9اپریل  (اے پی پی): پاکستان ءُ قازقستان ءِ نیام ءَ وانگ ءُ زانگ ءُ سائنسی کمک، پٹ ءُ پول ءُ دیمروئی ءُ ٹیکنالوجی ءِ شوبگ ءَ کمک ءِ تہ ءَ گیشی ءِ سر ءَ تپاک کنگ بوتگ۔ وفاقی وزیر سائنس ءُ ٹیکنالوجی خالد حسن مگسی ءَ چار شمبے ءِ روچ ءَ قازقستان ءِ ڈل ءَ گوں گند ءُ نند کت۔ وزارت ءِ سائنس ءُ ٹیکنالوجی ءِ نیمگ ءَ چہ جاڑی بوتگیں بیان ءِ رد ءَ گند ءُ نند ءِ ساھت ءَ پاکستان ءُ قازقستان ءِ نیام ءَ دو نیمگی کمک ءَ را دیمروئی دیگ ءِ جتا جتائیں تک ءُ پھنات آنی سر ءَ سرجمیں رنگ ءَ ھیال ءُ لیکہ آنی مٹ ءُ بدلی بوتگ ءُ وانگ ءُ زانگ ءُ سائنسی کمک، پٹ ءُ پول ءُ دیمروئی، ءُ ٹیکنالوجی ءِ شوبگ آنی تہ ءَ کمک ءَ را گیش کنگ ءِ سر ءَ زور دیگ بوتگ۔ اے موہ ءِ سر ءَ قازقستان ءِ سفیر ءَ گوشت کہ قازقستان زوت ترکمانستان اوگانستان پاکستان بھارت گیس پائپ لائن منصوبگ ءِ تہ ءَ بھر زوری ءِ باقاعدہ جار ءَ جنت ایشی ءَ چہ توانائی ءِ شوبگ ءَ کمک ءُ دمگ ءَ اقتصادی کمک ءِ نوکیں دور ءِ بندات بیت۔ خالد حسن مگسی ءَ گوشت کہ دوئیں ملک آنی نیام ءَ وانگ ءُ زانگ ءُ زانشتی کمک ءَ را زوت برگیج کنگ بیت۔ مفاہمت نامہ ءِ سرا دستخط کنگ بیت۔ قازقستان ءِ تر ءُ تاب ءَ چہ نیشنل یونیورسٹی آف سائنس اینڈ ٹیکنالوجی اسلام آباد ءَ پٹ ءُ پولی مرکز ءِ جوڑ کنگ ءِ ھاترا ھم دلگوشی پیداک بوتگ۔ دوئیں نیمگاں کاروباری چاگرد ءِ گہتری، قاچاق ءِ ھلاپ ءَ یکجائی گامگیج، وانگ ءُ زانگ ءُ ٹیکنالوجی ءِ پڑ ءَ کمک ءَ را گیش گیش کنگ ءِ سر ءَ ھم تپاک کتگ۔