اسلام آباد 8 اپریل (اے پی پی) اقوام متحدہ ءِ اقلیتانی کارانی ھاسیں رپورٹر پروفیسر نکولا لیورا ءَ سئے شمبے ءِ روچ ءَ انسانی حقانی وزارت اسلام آباد ءَ وفاقی وزیر قانود، انصاف ءُ انسانی حقانی واجہ اعظم نظیر تارڑ ءَ گوں گند ءُ نند کتگ۔ ترجمان ءِ رد ءَ گند ءُ نند ءَ اقلیت آنی ھک آنی رکھینگ، بین المذاہب یکوئی ءِ دیمروئی ءُ نزوریں راج آنی واستہ کانود ءُ ادارگی رکھینگ ءِ واستہ پاکستان ءِ برجاھیں گامگیج آنی سر ءَ گپ ءُ تران کنگ بوتگ۔ وفاقی وزیر ءَ اقوام متحدہ ءِ انسانی ھک آنی میکانزم آنی تہ ءَ پاکستان ءِ سرگرمیں بھر زوری ءِ سر ءَ زور پر دات ءُ گوشت کہ اقوام متحدہ ءِ ھاسیں کارروائی آنی تہ ءَ انسانی ھک آنی جھان ءِ آرکیٹیکچر ءِ یک کلیدی ستون اِنت۔ آئی ءَ او ایچ سی ایچ آر، اقوام متحدہ ءِ سئے نیمگی ادارگ ءُ ھاسیں کارروائی مینڈیٹ ہولڈرز ءِ گوما پاکستان ءِ برجاھیں کمک ءِ سر ءَ ھم زور پر دات۔ پروفیسر نکولا لویرا ءَ اقلیت ءِ ھک ءُ گیشیں انسانی ھک آنی رکھینگ ءِ تہ ءَ پاکستان ءِ پیشرفت ءِ توسیپ کت ءُ اقوام متحدہ ءِ انسانی ھک آنی میکانزم ءِ سر ءَ پاکستان ءِ برجاھیں عزم ءِ وش اتک کت۔ وفاقی وزیر ءَ مذہبی شمولیت ءُ بین المذاہب ہم آہنگی ءِ دیمروئی ءِ ھاتر ءَ راجی تک ءَ کنگ بوھوکیں گامگیج آنی سر ءَ زور پر دات ایشی ءِ تہ ءَ حفاظتی کانود ءِ جوڑ کنگ، راجی روچ آناں سرجمیں رنگ ءَ برجم دارگ ءُ منصفانہ چاگردی نیٹ ورک آنی جوڑ کنگ ھوار اِنت۔ جرنوالا وئیل ءِ حوالہ ءَ آئی ءَ ریاست ءِ وھد ءِ سر ءَ گامگیج ءُ آماچیں کمیونٹیز ءِ گوما یکوئی ءِ درشان کنگ ءُ انصاف ءِ پجارینگ ءِ عزم ءِ لوٹ کتگ۔ آئی ءَ اقلیت آنی ھک آنی دیمروئی ءُ آھانی جیڈھ آناں جوانیں گیواری ءِ واستہ یک موثر ادارگی فورم ءِ رنگ ءَ نیشنل کمشنر برائے اقلیت آنی کرد ءِ سر ءَ زور پر دات۔ وفاقی وزیر ءَ گوشت کہ پاکستان ءِ مزن وزیر محمد شہباز شریف اقلیت آنی ھک آنی رکھینگ ءَ را اولی ترجی ءَ دنت ءُ ھواریں، ھک آنی سر ءَ بنیات ءِ حکومت داری ءِ وسیلگ ءَ پاکستان ءِ انسانی ھک آنی انڈیکس ءَ را گہتر کنگ ءِ واستہ جزم اِنت۔ شفافیت ءُ تعمیری میاں اوستمانی سیادی ءِ جذبہ ءَ وفاقی وزیر ءَ اقوام متحدہ ءِ مینڈیٹ ہولڈر آنی گوما برجاھیں گپ ءُ تران ءُ کمک ءِ واستہ پاکستان ءِ تیاری ءِ درشانی کت ءُ گوشت کہ ملک ءِ تر ءُ تاب ءِ ھرچ ممکنہ درخواست ءِ سر ءَ راجی رہبند ءُ زمہ واری آنی رد ءَ چار ءُ تپاسی کنگ بیت۔ وفاقی وزیر ءَ پاکستان ءِ آئین ءِ تہ ءَ برابری ءُ عدم تبعیض ءِ ضمانت آنی سر ءَ بنیات ءِ سر ءَ انسانی ھک آنی جھان ءِ ایجنڈا ءِ سر ءَ پاکستان ءِ جزم ءِ یک رندے پدا گوشت۔ دوئیں نیمگاں اقلیتانی حقانی دیمروئی ءِ ھاتر ءَ گپ ءُ تران ءُ یکے دومی ءِ کمک ءَ گیش مھکم کنگ ءِ وتی عزم ءِ پدا پدر کت۔
