اسلام آباد۔ 08 اپریل (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پائیدار زرگزرانی سوگوی کن معدنی وسیلہ غاتیان پبی فائدہ ہرفوئی مریک، معدنی وسیلہ غاتے کاریم اٹ اتنگ کن زیات آن زیات زرکاری درکار ءِ، پاکستان اقتصادی شونداری نا پوسکن آ دور اٹی پترینگ انگ ءِ۔ داخیال آتا درشانی ءِ او سے شنبے نادے آ داڑے پاکستان منرلز انوسمنٹ فورم 2025آن تران کرسا کرے۔ بنجائی دارالحکومت اسلام آباد اٹی مروک آ فورم اٹی درملکی مندوبین، بنجائی وزیر، پاکستان اٹ متعین درملکی سفیر و معدنیات نا بشخ انا چاہندار آک بشخ ہلکر۔ داوخت آ بشخ ہلوک آتیان تران کرسا نائب وزیراعظم و وزیرخارجہ پارے کہ پاکستانی قدرتی وسیلہ غاتیان شپ ءُ ملک اسے، پاکستان اٹ ساڑی معدنی وسیلہ غاتے کاریم اٹ اتنگ کن زیات آن زیات زرکاری درکار ءِ، وزیراعظم محمد شہباز شریف نا کماشی ٹی حکومت درملکی زرکارآتے آسراتی تا فراوانی کن پبی گام گیج کننگ اٹی ءِ۔ اوپارے کہ پاکستان شونداری نا پوسکن آ دور اٹی پترینگ انگ ءِ۔ ملک انا آبادی نا زیات بشخ ورناتیاتالان ءِ۔ نائب وزیراعظم سینیٹر محمد اسحاق ڈار پارے کہ پاکستان اٹ خیسن و چاندی نا بھلو کوڑی ارے، غٹ زرگزرانی ٹک آک ہم مثبت ءُ و جہانی ادارہ غاک ہم پاکستان نا زرگزرانی شونداری ءِ مننگ ءُ۔ اواومیت ظاہر کرے کہ پاکستان منرلز انوسمنٹ فورم آن معدنیات نا بشخ اٹی زرکاری نا کسر آوار مریک۔ پاکستان منرلز انوسمنٹ فورم اٹی بھلو کچ اسے ٹی درملکی مندوبینک ساڑی ءُ، ہراہرچار آ صوبہ، آزاد کشمیر و گلگت بلتستان اٹی کانڑکنی و معدنیات اٹی زرکاری نا جاچ ءِ ہلنگ نا موقع فراوان کیک۔
