راولپنڈی۔4اپریل (اے پی پی): کور کمانڈرز کانفرنس ءَ ناشرکاری ءَ را ھمک قیمت ءَ بے فرق ءَ ھلاس کنگ ءِ وتی جزم ءِ پدا زور داتگ ءُ اے گپ ءِ پدر کنگ بوتگ کہ ریاست راجی دژمنیں عناصر، آسراتی دیوک ءُ پاکستان ءَ را بے رھبند کنگ ءِ کوشست کنوکیں مردمانی ھلاپ ءَ وتی سرجمیں توان ءَ گوں دیم پہ دیم بیت۔ بلوچستان ءَ کس ءَ را امن ءِ ھراب کنگ ءِ اجازت دیگ نہ بیت۔ آئی ایس پی آر ءِ رد ءَ 268 کور ءِ کمانڈر کانفرنس آرمی چیف جنرل سید عاصم منیر ءِ سروکی ءَ برجم دارگ بوت۔ فورم ءَ شہید آنی واستہ فاتحہ پیش کتگ۔ دیوان ءِ تہ ءَ ھواریں مردماں ماتیں وطن ءِ امن ءُ ایمنی ءِ واستہ پاکستانی سلاھبند ءِ شھید ، کانود نافذ کنوکیں ادارگ ءُ شھمکی آنی ابدمانیں قربانی آناں ستا دات۔ فورم ءَ را دمگ ءِ استیں جاور ھال، راجی سلامتی ءِ دیم ءَ اوشتاتگیں چیلنج ءُ گیش بوھوکیں ھترہ آنی پسو ءَ پاکستان ءِ حکمت عملی ءِ ھوالگ ءَ سرجمیں بریفنگ دیگ بوت۔ اے دیوان ءَ دمگی ءُ تہی امنیت ءِ جاور ھال آنی سر ءَ ھم سرجمیں رنگ ءَ چار ءُ تپاسی کنگ بوتگ۔ کانفرنس ءِ بھمک زوروکاں گوشت کہ بلوچستان ءِ برجائی ءُ وشھالی ءَ را ھراب کنوکیں ناپاکی ءِ سیاسی مفاد ءُ چاگردی عناصر بلوچستان ءِ الس ءِ بے دروریں کمک ءَ گوں فیصلہ کنوکیں رنگ ءَ شکست دیگ بنت۔ بلوچستان ءِ تہ ءَ دراھیں ملکی ءُ درملکی عناصر ءِ آشوب ءِ شنگ ءُ تالان کنگ ءُ دیم ءَ برگ ءِ راستیں دیم، گِر ءُ دار ءُ جھد سرجم ءَ پدر بوتگ اَنت۔ فورم ءَ اے گپ ءِ پدا زور دات کہ اے وڑیں عناصر ءُ اے وڑیں کوشست کنوکیں مردماں ہچ وڑیں معافی دیگ نہ بیت۔ فورم ءَ راجی ایکشن پلان ءِ دائرہ کار ءِ چیر دستی ءَ ”استحکام ءِ عزم“ ءِ حکمت عملی ءِ ترند ءُ موثر نفاذ ءِ ضلورت ءِ سر ءَ زور پر دات۔ فورم ءَ سرجمیں راج ءِ کمک ءَ ناشرکاری ءِ ھلاپ ءَ یکجائی رپک ءِ ارزشت ءِ سر ءَ ھم زور پر دات۔ شریکیں کانفرنس ءَ اے گپ ءِ پدا زور دات کہ ریاستی ادارگ آئین ءِ دائرہ کار ءِ تہ ءَ کانود ءِ سر ءَ سک باز عمل کن اَنت۔ قانون ءِ نفاذ ءِ تہا ہچ وڑیں نرمی ءُ غفلت نہ بیت۔ آرمی چیف ءَ سرجمیں پاکستان ءَ راجی ایکشن پلان ءِ چیر دستی ءَ جوڑ بوتگیں ضلعی رابطہ کمیٹی آنی بنداتی ءَ را ھم ساڑات۔ آرمی چیف ءَ راجی ایکشن پلان ءِ سر ءَ بے رکاوٹ ءَ ترندی ءَ گوں عمل کنگ ءِ ضلورت ءِ سر ءَ زور پر دات ءُ گوشت کہ توامیں ادارگ حکومتی ہدایت ءِ رد ءَ راجی ایکشن پلان ءِ سر ءَ برجم دارگ ءِ تہ ءَ برجمیں ھمگرنچی، ھمگرنچیں کوشست ءُ کمک ءَ را دل یکیمی کنگ لوٹ ایت۔ آئی ءَ گوشت کہ پاک فوج ناشرکاری ءِ مالی کمک ءِ ھلاپ ءَ سکیں کانودی گامگیج زورگ ءَ حکومت ءُ کانود نافذ کنوکیں ادارگ آنی سرجمیں کمک ءَ کنت، ناجائزیں کاروائی ناشرکاری ءِ مالی کمک ءَ گوں اندری رنگ ءَ بندوک اَنت، پاکستان ءَ ناشرکار ءُ آھانی آسراتی ءِ واستہ جاگہ نیست۔ فورم ءَ غیر قانونی مقبوضہ جموں ءُ کشمیر ءَ بھارت ءِ نیمگ ءَ برجاھیں انسانی ھکانی لگتمالی ءِ سر ءَ سک باز جیڈھ ءِ درشانی کنگ بوت۔ فورم ءَ لائن آف کنٹرول ءِ سر ءَ بھارتی اُرد ءِ نیمگ ءَ بے سوبیں جنگ بندی ءِ ھلاپ ورزی ءِ سر ءَ ھم جیڈھ ءِ درشان کنگ بوت۔ فورم ءَ غیر قانونی مقبوضہ جموں ءُ کشمیر ءِ الس ءِ انصاف ءِ واستہ پاکستان ءِ مھکمیں ءُ بے دروریں کمک ءِ سر ءَ زور پر دات۔ فورم ءَ مقبوضہ جموں ءُ کشمیر ءَ برجاھیں انسانی ھک آنی لگتمالی ءَ را جھان ءِ تک ءَ پدر کنگ ءِ واستہ برجاھیں سفارتی کوشست آنی ضلورت ءِ سر ءَ ھم زور پر دات۔ فورم ءَ فلسطین ءِ الس ءَ گوں سرجمیں یکوئی ءِ درشانی کتگ ءُ غزہ ءَ بوتگیں انسانی ھکانی سنگینیں لگتمالی ءُ جنگی جرم آناں سک مذمت کتگ۔ فورم ءَ فلسطین ءِ اُلس ءَ را وتی بے مٹیں سفارتی، سیاسی ءُ اخلاقی کمک ءِ ھم پدر کتگ۔ کانفرنس ءِ گڈ ءَ آرمی چیف ءَ فیلڈ کمانڈر آناں ہدایت کت کہ آ آپریشنل تیاری ءُ پیشہ وارانہ لیکہ ءِ مستریں معیار ءِ برجائی ءَ برجم بہ دار اَنت۔ آرمی چیف ءَ گیش ءَ چہ گیش جنگی تیاری ءَ را برجائی ءِ واستہ سختیں تربیت ءَ را دل یکیمی کنگ ءِ سر ءَ ھم زور پر دات۔
