اسلام آباد۔4اپریل (اے پی پی): بنجاھی حکومت ءَ رمضان ریلیف پیکج ءِ چیر دستی ءَ 3ملین بزگریں ھاندان آناں ریلیف داتگ۔ امدادی پیکج ءَ را گیش شفاف ءُ باوقار جوڑ کنگ ءِ ھاتر ءَ ڈیجیٹل لین دین ءِ رھبند ءِ سرا عمل کنگ بوتگ ءُ ڈیجیٹل پرس ءِ وسیلگ ءَ بزگریں ھاندان آناں ادائیگی کنگ بوتگ۔ منصوبہ بندی، دیمروئی ءُ اصلاحات ءِ بنجاھی وزیر پروفیسر احسن اقبال، فوڈ سیکیورٹی ءُ پٹ ءُ پول ءِ بنجاھی وزیر رانا تنویر حسین ءُ بنجاھی انفارمیشن ٹیکنالوجی ءُ ٹیلی کمیونیکیشن ءِ بنجاھی وزیر شزہ فاطمہ خواجہ ءَ بنجاھی حکومت ءِ نیمگ ءَ رمضان ءَ داتگیں ریلیف پیکج ءِ ھوالگ ءَ میڈیا بریفنگ داتگ۔ اے موہ ءِ سر ءَ بنجاھی وزیر احسن اقبال ءَ گوشت کہ اے زرّ بزگریں ھاندان آناں ساپ ءُ پلگاریں رنگ ءَ داتگ انت۔ اے پروگرام ءِ چیر دستی ءَ 1.9ملین ڈیجیٹل لین دین کنگ بوتگ ءُ اے عمل ءِ تہا نجی شعبہ ءَ ہم سک باز ھاسیں کرد پیلو کتگ۔ بنجاھی وزیر احسن اقبال ءَ گوشت کہ حکومت ءَ رمضان ریلیف پیکج ءِ چیر دستی ءَ 3ملین بزگریں ھاندان آناں مالی کمک داتگ ءُ اے عمل ءَ را شفاف کنگ ءِ واستہ ڈیجیٹل پرس ءِ وسیلگ ءَ ادائیگی کنگ بوتگ۔ اے گامگیج ڈیجیٹل پاکستان وژن ءِ بھر اِنت ایشی ءِ مول ءُ مراد مالی کمک ءِ نظام ءَ را نوک کنگ ءُ شفاف کنگ اِنت۔ آئی ءَ گوشت کہ 1.9ملین ڈیجیٹل لین دین ءِ رد ءَ اے گپ ءِ پدر بوھگ ءَ اِنت کہ حکومت ءَ بینکنگ یا موبائل والیٹ ءِ وسیلگ ءَ ادائیگی ءِ نوکیں وسیلگ کارمرد کتگ، ایشی ءِ تہ ءَ نجی شوبگ ءِ کمک ھم المی اِنت، ایشی ءَ چہ منصوبگ ءِ سوبمندی ءَ را دل یکیمی کنگ ءَ کمک رستگ۔ فوڈ سیکیورٹی ءُ پٹ ءُ پول ءِ بنجاھی وزیر رانا تنویر حسین ءَ گوشت کہ حکومت ءَ رمضان ءِ ریلیف پیکج ءَ را گیش شفاف ءُ باوقار جوڑ کنگ ءِ واستہ ڈیجیٹل ٹرانزیکشن ءِ رھبند زرتگ۔ اے گامگیج ءِ مستریں مول ءُ مراد ایش ات کہ بزگریں مردماں براہ راست مالی کمک دیگ بہ بیت دانکہ آہانی عزت نفس ءَ را تاوان مہ رسیت۔ بنجاھی وزیر ءَ گوشت کہ اے ریلیف ھما مردمانی واستہ بوتگ کہ آ دگہ سرکاری ریلیف پروگرام ءِ تہ ءَ ھوار نہ بوتگ اَنت، ایشی ءَ چہ پدر بیت کہ حکومت ءَ گیش ءَ چہ گیش بزگریں مردم آناں سر کنگ ءِ کوشست کتگ۔ آئی ءَ آیوکیں سال ءَ اے پروگرام ءَ را گیش گہتر کنگ ءِ جزم ءِ درشان کت تانکہ گیشاں چہ گیش زلورت مندیں مردم ایشی ءَ چہ سیت چست بہ کن اَنت۔ آئی ءَ گوشت کہ اے گامگیج چاگردی گہبودی ءُ شفافیت ءِ رد ءَ جوانیں دیمروئی اِنت ھاسیں رنگ ءَ وھدے کہ حکومت ڈیجیٹل فنانشل سسٹم ءَ را دیم ءَ برگ ءَ اِنت۔ انفارمیشن ٹیکنالوجی ءُ ٹیلی کمیونیکیشن ءِ بنجاھی وزیر شزہ فاطمہ خواجہ ءَ گوشت کہ رمضان ریلیف پیکج ءِ 79درسد فنڈز سکیں شفافیں رنگ ءَ بزگریں مردم آناں سر کنگ بوتگ۔ آئی ءَ گوشت کہ رمضان ریلیف پیکج ءِ ھوالگ ءَ سرجم ءَ 1273 شکایت اتکگ، ایشی ءِ واستہ ایشانی گیواری ءِ واستہ ترندیں گامگیج چست کنگ بوتگ۔ رمضان پیکج ءِ تہ ءَ 1.9لکھ ڈیجیٹل ادائیگی کنگ بوتگ ءُ 9,51,191 ڈیجیٹل پرس کارمرد کنگ بوتگ، ایشی ءَ چہ ڈیجیٹل نیشن پاکستان ءِ وژن ءِ سرجمی ءِ نیمگ ءَ ھاسیں گامگیج اِنت۔ آئی ءَ گوشت کہ 823653 زالبول آنی نیمگ ءَ ڈیجیٹل والیٹ کارمرد کنگ بوتگ، وھدیکہ 2541 ھاسیں مردم آناں ڈیجیٹل والیٹ ءِ وسیلگ ءَ زرّ رستگ۔
